राजपाका नेताहरुको समर्थन फिर्ता लिने चेतावनीपछि प्रधानमन्त्रीले भने, 'एक हप्ता पर्खनुस्'
काठमाडौँ — प्रधानमन्त्री केपी ओलीले एक हप्ता पर्खन राष्ट्रिय जनता पार्टी (राजपा) का शीर्ष नेताहरुलाई आग्रह गरेका छन् । आफ्ना मागहरु पूरा नगरेको भन्दै सरकारलाई दिएको समर्थन फिर्ता लिने चेतावनी दिँदै आएका राजपा नेताहरुलाई मंगलबार बालुवाटार बोलाएर ओलीले उक्त आग्रह गरेका हुन् ।
भेटमा सहभागी राजपा अध्यक्ष मण्डलका सदस्य महिन्द्र राय यादवले कान्तिपुरसित भने, 'हाम्रा मागका सम्बन्धमा कुरा भयो, ठोस धारणा माग्यौं तर प्रधानमन्त्रीले एक हप्ता समय दिनुस् भन्नु भएको छ ।'
राजपाले कैलाली क्षेत्र नम्बर १ बाट निर्वाचित सांसद रेशम चौधरीलाई रिहा गरेर शपथ खुवाउनुपर्ने र आन्दोलनका बेला आफ्ना नेता तथा कार्यकर्तालाई लगाएको मुद्दा फिर्ता गराउनु पर्ने, घाइतेको उपचार, पीडितलाई क्षतिपूर्ति दिनुपर्ने, संविधान संशोधनलगायत माग राखेको छ । सोही माग पूरा नगरेको भन्दै राजपा नेताहरुले सार्वजनिक रुपमै सरकारलाई दिएको समर्थन फिर्ता गर्ने चेतावनी दिँदै आएका छन् ।
यो पनि पढ्नुहोस् : सरकारलाई दिएको समर्थन फिर्ता लिने : महतो
राजपा नेता कर्णको चेतावनी, 'चार दिनपछि सरकारलाई दिएको समर्थन फिर्ता लिन्छौं'
प्रधानमन्त्रीलाई भेट्न राजपा अध्यक्ष मण्डलका संयोजक राजेन्द्र महतो, सदस्यहरु महन्थ ठाकुर, शरदसिंह भण्डारी, महिन्द्र राय यादव, राजकिशोर यादव र अनिलकुमार झा बालुवाटार पुगेका थिए ।