तातोपानी नाका खुल्ने आशा : यसरी बनाइँदै छ चीन जोड्ने मितेरी पुल 

‘बेलीब्रीजको ‘ब्रीज’ निकाल्ने र पुलको तल्लो भागबाट ‘डाइर्भसन’ बनाएर ‘ट्रयाक’ खन्ने काम भइरहेको छ,’ चिनियाँ ब्रीज कम्पनीका ठेकेदार ‘पुबु क्वी जी’को भनाइ उद्धृत गर्दै भोटेकोसी गाउँपालिकाका प्रमुख राजकुमार पौडेलले भने । आउँदो ‘मे’ महिनामा यहाँको भौतिक संरचनाको काम सकिसक्ने कार्ययोजना लिएको ठेकेदार कम्पनीले बाढीपछि राखिएका ‘सर्पोट रड’हरु निकालेको उनले सुनाए ।

‘ब्रीज’ निकालिसकेपछि केही प्राविधि तैयारी सकेपछि तत्कालै पुरानो संरचना भत्काउन सुरु गरिनेछ । पुल पारीबाट तल्लो छेउसम्म जोडिएको ट्र्याक बनाइसकेपछि मेसिनबाट भत्काउने कार्य गरिने उनको भनाइ छ । सरकारी सम्झौतानुसार आहिलेको ८ मिटर मितेरी पुललाई पछि १२ मिटरको फराकिलो बनाइने कम्पनीले जनाएको छ ।

मितेरी पुलपारीको खासासम्मको बजारक्षेत्रलाई ठुला र अत्याधुनिक मेसिनबाट नयाँ प्रविधि अपनाएर पुनर्निर्माण भइरहेको छ । चीनको खासा र कुतीको बीचमा रहेको छेपसाङमा पहिरो जाँदा आएको भोटेकोसी बाढीले तहसनहस भएको सीमावर्ती क्षेत्रको सबै भौतिक संरचनाको मर्मत थालिएको छ ।

चिनियाँ कम्पनी चाइना रेल्वे कन्स्ट्रक्सन ग्रुप कम्पनी (सिआरसीसी)ले सीमा जोड्ने सडकको मर्मत सम्भार गरिरहेको छ । ‘सुख्का बन्दरगाह र सडक तथा पुलको कामलाई एकैसाथ अगाडि बढाइनुले नाका खुल्ने शुभ संकेत मिलेको देखिन्छ,’ उनले भने ।

तातोपानी क्षेत्रको लिपिङको सडक बनाइसकेपछि सवारी आउजाउ गरेर एकपटक नाका खुलाइने छ । त्यसपछि मितेरी पुलको संरचनासँगै लिपिङ बजारको भग्नावेश बनेको संरचना भत्काउँदै लगिने चीनको योजना छ । चीनको सीमातर्फ सुरक्षार्थ बसेका प्रहरी अधिकारीका अनुसार तातोपानी नाका खुलाउनमा चीन पूर्ण तयारीमा जुटेको छ । क्षतिग्रस्त चिनको मितेरी पुलदेखि खासासम्मको ७ किमी सडक पुनर्निर्माण सकिने तरखरमा रहेको छ ।

‘आउँदो ‘मे’ मा नाका खोल्नको लागि भनेर ५ महिना नबित्दै यहाँको भौतिक संरचना तयार बनाइँदैछ,’ खासादेखि मितेरी पुलसम्मको निरीक्षण अनुगमन गरिरहेका चिनियाँ प्रहरी कप्तान टसीले भने ।

तातोपानी क्षेत्रको लिपिङको सडक बनाइसकेपछि सवारी आउजाउ गरेर एक पटक नाका खोलाइनेछ । त्यसपछि मितेरी पुलको संरचनासँगै लिपिङ बजारको भग्नावेश बनेको संरचना भत्काउँदै लाने चीनको योजना छ । सडकलाई विशेष रुपमा निर्माण गरिरहेको चीनले अन्य महत्वपूर्ण भौतिक संरचना बलियो बनाउने कार्ययोजना अघि सारेको उनले प्रष्ट्याए । सुख्का बन्दरगाहमा सिधै सामान ओराल्ने लक्ष्य राखेको चीनको केन्द्रिय सरकारले ३ महिनामै बन्दरगाह र ८ महिनामा सडकलाई सकाउन निर्देशन दिएको छ ।

‘सुख्का बन्दरगाह रंगरोगन गरेर चिटिक्क भइसकेको छ, सबै भित्रि र बाहिरी संरचना बनाइँदैछ,’ सीमास्थित सशस्त्र प्रहरी बलका डीएस्पी कृष्णगोपाल गुरुङले भने । सीमामा व्यवस्थित सुरक्षामय वातावरण बनाइरहेका उनले कार्यरत चिनिया कम्पनीलाई सघाइरहेको जनाए ।

‘उनीहरुले चाहे अनुसारको नियम अनुकुल सुरक्षा दिइरहेका छौं,’ उनले भने । यसअघि नाका खोल्नको लागि चीनले सुरक्षासम्बन्धी दुइपटक अनौपचारिक बैठक राखिसकेको छ । भुकम्पपछि सुनसान बनेको सीमाको भौतिक पुनर्निर्माण हुन थालेपछि हेर्न र घुम्न आउनेले तातोपानी धारा र होटेल भरिन थालेको उनको कथन छ ।