बाह्य बाधा नभए ४० दिनभित्र सुन्दरीजलमा पानी 

‘हडताल लगायतका कुनै बाधा अडचन नआए पुस मसान्तसम्म सुन्दरीजलमा पानी आइसक्छ,’ उनले भने । ३ स्थानमा सुरुङभित्रको हावा बाहिर निकाल्न भेन्टिलेटर निर्माणका लागि जग्गाको मुआब्जा दिने तथा अन्य कानुनी प्रक्रिया पनि पूरा गरिसकिएको उनले बताए ।

सिन्धु, शिवपुरी वन्यजन्तु आरक्ष र ग्यालथुम खण्डमा भेन्टिलेटर निर्माण हुनेछ । ‘मेसिन आइसकेको छ, अब केही दिनभित्र प्वाल पार्ने काम पनि हुन्छ,’ उनले भने, ‘अब खास समस्या छैन ।’ हालको मेसिनबाट भेन्टिलेटर निर्माण गर्दा वनजंगलमा क्षति नहुने उनले बताए । अम्बाथान हेडवक्र्समा समेत पनि काम तीब्ररुपमा भइरहेको आयोजानाले जनाएको छ ।

सरकारले गत असोजमा मेलम्चीको पानी उपत्यका ल्याउने प्रतिबद्धता जनाएको थियो । पटक–पटक प्रतिबद्धता फेर्दै आएको सरकारले नयाँ वर्षको सुरुमै उपत्यकामा पानी ल्याउने दाबी गरेको थियो । तर, ठेकेदारको लापरबाहीले गर्दा काममा ढिलाइ भएको प्रमुख कँडेलले बताए । उनले याङ्ग्री र लार्केबाट दैनिक १७/१७ करोड लिटर पानी ल्याउने आयोजना निर्माणका लागि डिपीआर पनि स्विकृत हुने चरणमा रहेको बताए । डीपीआर स्विकृत हुने बित्तिकै टेन्डर आव्हान गर्ने भन्दै उनले दोस्रो चरणमा याङ्ग्री र लार्के खोलाबाट पानी ल्याइने बताए ।

मेलम्चीबाट याङग्री सुरुङको लम्बाइ ९ किमि र याङग्री–लार्केबीचको सुरुङको लम्बाइ करिब २ किमि छ । याङग्रीसम्म सडकको पहुँच भए पनि लार्केमा पुर्‍याउन कठिन रहेको उनले बताए ।

मेलम्चीदेखि लार्केबीचको सुरुङको लम्बाइ ११ किमि छ । मेलम्चीबाट आउने दैनिक १७ करोड लिटर पानी उपत्यकाका ३५ लाख बढी जनतालाई समानुपातिक ढंगले वितरण गरिने उनले बताए । १७ करोड मेलम्ची, १७ करोड याङग्री र १७ करोड लार्के गरी दैनिक ५१ करोड लिटर पानी उपत्यकामा ल्याइनेछ । हाल उपत्यकामा दैनिक ३८ करोड लिटर पानी आवश्यक भए पनि काठमाडौं उपत्यका खानेपानी लिमिटेडले १२ करोड लिटरमात्र वितरण गर्दै आएको छ । बर्खामा भने उपत्यकामा १७ करोड लिटर पानी आपूर्ति हुन्छ ।