काष्ठमण्डपलाई थप पाँच करोड

कान्तिपुर संवाददाता

काठमाडौँ — काठमाडौं महानगरपालिकाले काष्ठमण्डप पुनर्निर्माणका लागि शनिबार पाँच करोड रुपैयाँ उपलब्ध गराएको छ । मेयर विद्यासुन्दर शाक्यले पुनर्निर्माण समिति अध्यक्ष तथा सांसद राजेश शाक्यलाई रकम हस्तान्तरण गरेका हुन् ।

२०७२ को भूकम्पले काष्ठमण्डप पूरै क्षतिग्रस्त हुन पुगेको थियो ।

महानगरले यसअघि समितिलाई ५० लाख रुपैयाँ दिइसकेको छ । काष्ठमण्डप पुनर्निर्माणका लागि महानगरले चालु वर्ष आठ करोड रुपैयाँ विनियोजन गरेको छ । ‘काष्ठमण्डप पूर्णरूपमा महानगरपालिकाले बनाउनेछ,’ रकम हस्तान्तरण गर्दै मेयर शाक्यले भने । उनले चालु आवमा कम्तीमा एक तला निर्माण हुने दाबी पनि गरे । अहिले काठ र इँटा खरिद प्रक्रिया चलिरहेको छ ।

पुनर्निर्माणमा १८ करोड रुपैयाँभन्दा बढी लाग्ने अनुमान छ । महानगरले हनुमानढोका क्षेत्रको संवर्द्धनका लागि ‘हनुमान ढोका दरबार क्षेत्र संरक्षण कार्यक्रम’ सञ्चालन गरिरहेको छ । यसैअन्तर्गत महानगरले भूकम्पबाट आंशिक र पूर्ण क्षतिग्रस्त सम्पदा पुनर्निर्माण, जीर्णोद्धार र मर्मतसम्भार गरिरहेको छ ।

महानगरले माजुदेग: पुनर्निर्माणका लागि हालै बोलपत्र आहवान गरेको छ । चाँडै कुमारी घरको जीर्णोद्धार थाल्ने तयारी छ । कामपा-२४ का वडाध्यक्ष मचाराजा महर्जनका अनुसार कुमारी घरको ‘स्ट्रकचल एलानाइसिस’ भइरहेको र मंसिरभित्र प्रतिवेदन तयार हुनेछ ।

प्रकाशित : आश्विन २७, २०७५ २०:१७
प्रतिक्रिया
पठाउनुहोस्

किनमेल गर्ने घटे

सामानको मूल्य बढ्दा दसैंमा किनमेलमा कमी
कान्तिपुर संवाददाता

कास्की — बजारमा चहलपहल निकै छ । यसले राम्रै व्यापार भइरहेको हुन सक्ने अनुमान लगाउन सकिन्छ । तर, विभिन्न सामानको मूल्य बढेकाले दसैंको बेलामा पनि किनमेल गर्नेको संख्या घटेको विक्रेता बताउँछन् ।

पोखराको चिप्लेढुङ्गामा कपडा किन्दै ग्राहक । तस्बिर : विना थापा/कान्तिपुर 

‘गाउँदेखि वर्षमा एक पटक झरेका ग्राहक पसलमा आएर कपडाको मूल्य सोध्छन् मूल्यभन्दा तर्सिन्छन्, खरिद अनुसारको मूल्य भन्नैपर्‍यो,’ पोखराको बगरस्थित गुरुङ फेन्सी सञ्चालक सन्तोष गुरुङले भन्छन्, ‘दसैंले गर्दा सबै कपडा उतैबाट महँगो मूल्य तिरेर ल्याउनुपर्छ, घटाएर दिने कुरा भएन ।’ बजारमा चहलपहल बढेको देखिए पनि सोचेअनुसारका व्यापार नभएको उनले बताए ।

हुनेखानेले अघिपछि किनमेल गर्ने भए पनि आर्थिक अवस्था कमजोर हुनेले दसैंमा नयाँ कपडा लगायत सामान किन्ने चलन छ । मल्ल इम्पोरियमका सञ्चालक शिव मल्लका अनुसार मूल्यवृद्धिकै कारण ग्राहक घटेका हुन् ।

संघीयता सुरुसँगै बजेट कार्यान्वयन नभएको र यसले विकास निर्माणका काम रोकिएकाले पनि समस्या आएको उनको अनुभव छ । ‘कतिपय सामानको मूल्य ५० प्रतिशत्सम्म बढेको कारण ग्राहक घटेको कञ्चन ट्रेडर्सका सञ्चालक रिसिकेश शर्माले बताए ।

सामान्य एउटा जिन्सको पाइट १ हजार ७ सय घटी नपाईने महेन्द्रपुलमा कपडा किन्न आएका विनोद गुरुङ बताउँछन । ‘सरकारी कार्यलयमा काम गर्नेहरुका लागि ठिकै होला किनकी उनीहरुको तलब पनि बढेको हुन्छ’, उनले भने,‘तर हामीजस्ता समस्या परेका छौ ।’

कपडा किन्दा भोकै बस्नुपर्ने अवस्था आएको उनको भनाई छ । पोखरा नयाँबजार बस्दै आएका गोरखाका गुरुङले सामान बेच्ने भ्यान चलाउने र मासिक १५ हजार तलब पाईने तर दसैं भत्ता केही नपाईने गुनासो गरे । दसैंको बेला आफन्त र ईष्टमित्रलाई देखाउन पनि राम्रो लगाउनुपर्ने बाध्यता रहेको उनले बताए ।

प्रकाशित : आश्विन २७, २०७५ २०:०२
पूरा पढ्नुहोस्
प्रतिक्रिया
पठाउनुहोस्