दिल्ली उत्रिए लगत्तै दाहाल भेटघाटमा व्यस्त- समाचार - कान्तिपुर समाचार

दिल्ली उत्रिए लगत्तै दाहाल भेटघाटमा व्यस्त

सुरेशराज न्यौपाने

नयाँदिल्ली — नेकपा अध्यक्ष पुष्पकमल दाहाल तीनदिने भारत भ्रमणका लागि बिहीबार दिउँसो दिल्ली आइपुगेका छन् । दिल्ली उत्रिए लगत्तै उनी भेटघाटमा व्यस्त भएका छन् । 

फाइल तस्बिर

दाहालले बिहीबार साँझ भारतका राष्ट्रिय सुरक्षा सल्लाहकार अजित डोभलसँग भेट गरेका छन् । भारतको सुरक्षा तथा विदेश मामिलामा डोभल प्रभावशाली मानिन्छन् । शुक्रबार बिहान गृहमन्त्री राजनाथ सिंहसँग उनको भेट तय भएको छ । शुत्रबार दिउँसो ३ बजे बारखम्बास्थित इन्डिया काउन्सिल अफ वल्र्ड अफेयर्सको ‘लेक्चर सिरिज’ मा सहभागी हुनेछन् । त्यहाँ उनले नेपालमा विकसित पछिल्लो घटनाक्रम तथा भारत–नेपाल सम्बन्धका विषयमा भनाइ राख्नेछन् ।


यसैगरी शनिबार साँँझ दाहाल इन्डिया–नेपाल सेन्टरले आयोजना गर्ने भारतका उद्योगी–व्यवसायीसँगको अन्तक्र्रियामा सहभागी हुनेछन् । नेपालका लागि पूर्वभारतीय राजदूत केभी राजन सेन्टरको अध्यक्ष छन् । भारतीय प्रधानमन्त्री नरेन्द्र मोदी र विदेशमन्त्री सुष्मा स्वराजसँगको भेट पनि शनिबारकै लागि तय भएको स्रोतले जानकारी दिएको छ । दिल्ली बसाइक्रममा उनले सत्ताधारी भारतीय जनता पार्टी र विपक्षी दलका नेता तथा बुद्धिजीवीसँग पनि भेटघाट गर्ने कार्यक्रम छ ।


दिल्लीस्थित विश्लेषकहरूले दाहालको भ्रमण आफूलाई भविष्यको प्रधानमन्त्रीका रूपमा ‘प्रोजेक्ट’ गर्न र भारतसँग सम्बन्ध सुमधुर बनाउन केन्द्रित हुने दाबी गरेका छन् । ‘दाहाल भ्रमणको दुईवटा उद्देश्य देखिन्छ । पहिलो, नेपालको सबैभन्दा ठूलो पार्टीको अध्यक्ष र प्रधानमन्त्रीको दाबेदारका रूपमा प्रस्तुत गर्नु, दोस्रो दिल्लीसँग सुमधुर सम्बन्ध चाहेको सन्देश दिनु हो,’ दिल्लीस्थित थिंक ट्यांक आईडीएसएका निहार नायकले भने ।


नेपालका लागि भारतका पूर्वराजनीतिक रञ्जित रेले यस किसिमको उच्चस्तरको राजनीतिक भ्रमणले दुई देशबीचको सम्बन्धलाई थप बलियो बनाउन र आपसी विश्वास बढाउन सघाउ पुर्‍याउने बताए । दाहालप्रति दिल्लीमा रहेको आशंकाप्रति संकेत गर्दै रेले भने, ‘हिजो के–कस्तो अविश्वास र असमझदारी थियो भन्दा पनि दाहाल नेपालका प्रभावशाली नेता रहेको कुरालाई नकार्न सकिँदैन । यस किसिमको भ्रमणले आपसी विश्वास बढाउन मद्दत गर्छ ।’



प्रकाशित : भाद्र २१, २०७५ १९:३०
प्रतिक्रिया
पठाउनुहोस्

त्रिविमा तोडफोड

कान्तिपुर संवाददाता

काठमाडौँ — परीक्षाअगावै प्रश्नपत्र बाहिरिएको घटना छानबिनमा आलटाल गरेको भन्दै विद्यार्थीहरुले त्रिभुवन विश्वविद्यालय उपकुलपतिको कार्यालय तोडफोड गरेका छन् । 

शिक्षाशास्त्र संकायअन्तर्गत स्नातकोत्तर प्रथम वर्षको परीक्षामा मनोविज्ञान र गणितको प्रश्न आउट भएको थियो भने एजुकेसन फाउन्डेसनमा गत वर्षकै हुबहु प्रश्न सोधिएको थियो । यसमा लापरबाही भएको प्रमाणित भएपछि त्रिवि डिन कार्यालयले विद्यार्थीहरुसँग तीनै विषयको पुन : परीक्षा लिने र दोषीलाई कारबाही गर्ने सहमति गरेको थियो ।

तर, पदाधिकारीले दुई विषयमात्र पुन:परीक्षा लिने तालिका सार्वजनिक गरेपछि आक्रोशित विद्यार्थीले बिहीबार कीर्तिपुरस्थित उपकुलपति कार्यालय तोडफोड गरेका हुन् । कार्यालयको झ्याल, दराज, टेबल, इन्भर्टर क्षतिग्रस्त बनाइएको छ ।

प्रहरीले तोडफोडमा संलग्न सात विद्यार्थी नियन्त्रण लिएको नयाँ शक्ति विद्यार्थी युनियन त्रिवि समितिका अध्यक्ष बलबहादुर रम्तेलले बताए । ‘पक्राउ गरिएका विद्यार्थी विना शर्त अविलम्ब रिहाई हुनुपर्छ,’ उनले भने, ‘त्यसपछि डिन कार्यालयसँग भएको सहमतिअनुसार अघिल्लो वर्षकै प्रश्न दोहोर्‍याउने र आउट गर्ने अधिकारीलाई कारबाही हुनुपर्छ । र, पुन: परीक्षा हुनुपर्छ ।’

प्रकाशित : भाद्र २१, २०७५ १९:२१
पूरा पढ्नुहोस्
प्रतिक्रिया
पठाउनुहोस्
×