किशोरी बलात्कार प्रकरण: आरोपी सार्वजनिक पछि झन् चर्कियो आन्दोलन

प्रहरीको उक्त कदमप्रति स्थानीयले आक्रोश व्यक्त गरेका छन् । उनीहरुले वास्तविक दोषीलाई जोगाउन मानसिक अवस्था ठिक नभएको व्यक्तिलाई सार्वजनिक गरेको भन्दै मंगलबार बिहानैदेखि स्वतस्फूर्त रुपमा बजार बन्द गराएका छन् । स्थानीयले महेन्द्रनगरमा नारा जुलुस सहित प्रदर्शन गरिरहेका छन् । उनीहरुले जिल्ला प्रशासन कार्यालय अगाडि प्रहरी प्रशासनविरुद्ध नाराबाजी गरेका छन् ।

नगर क्षेत्रका व्यापारी, विद्यार्थी र सर्वसाधारण सबै आन्दोलनमा उत्रिएका छन् । उनीहरुले यातायात पनि बन्द गराएका छन् ।

आइतबारदेखि अपराधी पत्ता लगाउनुपर्ने माग सहित नागरिक समाजका अगुवाहरुले सुरु गरेको रिले अनसन पनि जारी छ । सामाजिक सञ्जालमा समेत प्रहरीले मानसिक अवस्था ठिक नभएकालाई देखाएर अपराधि जोगाउन खोजेका भन्दै व्यापक विरोध भइरहेको छ ।