सिलिगुडीबाट ३२ किलो सुनसहित तीन पक्राउ

पर्वत पाेर्तेल

काँकडभिट्टा — यहाँ ३३ किलो सुन हराएको काण्ड चर्चामा रहेकै बेला भारतको सिलिगुडीबाट ३२ किलो सुनसहित तीन भारतीय पक्राउ परेका छन्  ।

भारतको केन्द्रीय राजश्व गुप्तचर विभागको टोलीले शुक्रबार अपरान्ह सिलिगुडीको सेवोक रोड क्षेत्रबाट सुनसहित तीन जनालाई पक्राउ गरेको हो।

भारतीय प्रहरीलाई उद्धृत गर्दै भारतीय संचारमाध्यमले जनाएअनुसार पक्राउ पर्नेमा प्रवीण समराव फदम, धनाजी साहेव राव वावर र अक्षय हरिदास छन्। तीनै जना महाराष्ट्रका बासिन्दा हुन्।
उनीहरुले कम्मरमा वाँधिएको विशेष किसिमको पेटीभित्र लुकाएर सुन तस्करी गरी महाराष्ट्र लैजान लागेका थिए। उक्त सुन चीनबाट नाथुला मार्ग हुँदै सिलिगुडी भित्रिएको प्रहरी अनुमान छ।

प्रकाशित : जेष्ठ १९, २०७५ ११:३६
ADVERTISEMENT
प्रतिक्रिया
पठाउनुहोस्
ADVERTISEMENT

काँकडभिट्टा–ढाका बस सेवा

बंगलादेशको राजधानी ढाकाबाट वैशाख १० गते काँकडभिट्टाका लागि बस छु्ट्ने
पर्वत पाेर्तेल

काँकडभिट्टा — सम्झौता भएको करिब ३ वर्षपछि बंगलादेश, भारत र नेपालबीच सोझो बस सेवा सञ्चालन हुने भएको छ ।

नेपालसहितका चार देश बंगलादेश, भुटान र भारतबीच सोझो बस सेवा सञ्चालनका लागि सन् २०१५ जुनमा ‘बीबीआईएन मोटर भेइकल’ सम्झौता भएको थियो । तर, भुटानले भने यो सम्झौतामा हस्ताक्षर गरेको छैन ।

सोही सम्झौताअनुसार परीक्षणका रूपमा बस सेवा सञ्चालन गर्न लागिएको हो । मेची भन्सार कार्यालयका प्रमुख टेकबहादुर अर्यालले सम्झौताअनुरूप पहिलोपटक वैशाख १० देखि १३ गतेसम्म बंगलादेश, भारत र नेपालबीच बस सेवा सञ्चालन गर्न लागिएको बताए ।

बंगलादेशको राजधानी ढाकाबाट वैशाख १० गते काँकडभिट्टाका लागि बस छु्ट्नेछ । बस सेवा शुभारम्भका लागि भन्सार प्रमुख अर्यालसहितको एउटा प्रतिनिधिमण्डल ९ गते ढाका पुग्नेछ । ढाकाबाट छुटेको बस भारतको फूलबारी, पानीट्यांकी हुँदै काँकडभिट्टा प्रवेश गर्नेछ ।

बीबीआईएन मोटर भेइकल सम्झौतापछि नै एसियाली विकास बैंकले नेपाल, भारत, भुटान र बंगलादेश जोडिने सडकलाई एसियन हाइवेका रूपमा विकास गर्ने उद्देश्यका साथ स्तरोन्नति गरिरहेको छ । बंगलादेश क्षेत्रको सडक स्तरोन्नति लगभग सकिएको छ । भारतीय क्षेत्रमा भने अझै काम जारी छ । आकाशेपुलसहित चार लेनको सडक निर्माण गरिएको छ ।

नेपालले विगत २० वर्षदेखि व्यापारिक मार्गका रूपमा प्रयोग गर्दै आएको काँकडभिट्टा–फूलबारी–बंगलाबन्ध मार्गबाटै बस सेवा सञ्चालन गर्न भारत तथा बंगलादेश सहमत भएका हुन् । सन् २०११ मा यो नाकाबाट भारतले समेत बंगलादेशसँग व्यापार सुरु गरेको छ । सन् २०१५ देखि फूलबारी नाकामा अध्यागमन नै खडा गरिएको छ । विगतमा च्याङ्ग्राबन्ध नाकामा मात्रै अध्यागमन थियो । तर, फूलबारी–बंगलाबन्धको चहलपहलपछि यो नाकामा पनि अध्यागमन कार्यालय नै स्थापना गरिएको हो । अब यो नाका व्यापारिक मार्गका रूपमा मात्रै सीमित रहने छैन । यात्रु बस नै सञ्चालन गरेपछि यसको महत्त्व अझ बढेर जाने विश्वास नेपाल–बंगलादेश व्यापार संघका अध्यक्ष पन्नालाल जैनको छ । ‘सोझो बस सम्पर्कले बंगलादेशीलाई नेपाल आउन र नेपालीहरूलाई बंगलादेश जान सहज हुनेछ,’ जैनले बताए ।

प्रकाशित : वैशाख ६, २०७५ ०७:१५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
×