पोर्चुगलमा नेपाली दम्पती रोगले थलिएपछि बिचल्ली

श्रीमान्लाई पक्षाघात, श्रीमतीको मिर्गौला फेल
भरत प्रधान

लिस्बन (पोर्चुगल) — वैदेशिक रोजगारीका सिलसिलामा पोर्चुगल आएको एक नेपाली दम्पती ठूला रोगले समातेपछि बिचल्लीमा परेका छन् ।

फोटो सौजन्य : भरत प्रधान ।

आठ वर्षदेखि पोर्चुगल बस्दै आएका भक्तपुर, सूर्यविनायक नगरपालिका–९, सिपाडोलका ४८ वर्षीय चन्द्रकिशोर पराजुली र उनकी श्रीमती ४६ वर्षीया शर्मिला शाक्य रोगले ग्रसित छन् । चन्द्रकिशोर एक्कासि पक्षाघात भई देब्रेतर्फको पूरै हर नचल्ने भएपछि दुई महिनादेखि ओछ्यानमै थलिएका छन् । उनकी श्रीमती शर्मिलाको दुवै मिर्गौला बिग्रेपछि दुई महिनादेखि ओछ्यानमै छिन् ।

गत माघ २६ गते बिहान उठ्न खोज्दा देब्रेतर्फको शरीरको एक हर नचल्ने, मुखबाट र्‍याल मात्र बग्ने र बोल्नसमेत नसक्ने भएपछि श्रीमतीले उपचारका लागि तत्काल अस्पताल पुर्‍याएकी थिइन् । उच्च रक्तचापका कारण पक्षाघात भएका चन्द्रकिशोरलाई १० दिनको उपचारपछि घर फर्काइएको भए पनि ओछ्यानमै थलिनुपरेको छ । चिकित्सकको सल्लाहअनुसार चन्द्रकिशोरले दैनिक व्यायाम गर्नुपर्ने र नियमित औषधि सेवन गर्नुपर्ने भएको छ । उपचारपछि बोल्न सक्ने भए पनि उठ्न, बस्न र चल्नसक्ने स्थिति भने छैन ।

यता श्रीमान्को औषधोपचार, रेखदेख र स्याहार गरिरहेकी शर्मिलाको श्रीमान्लाई अस्पतालबाट ल्याएको केही दिनमै एक्कासि खुट्टा सुनियो । स्वयं ओछ्यानमै थला परेका चन्द्रकिशोरले श्रीमतीको उपचारका लागि अस्पताल पुर्‍याए । सामान्य खुट्टा सुन्निएकी शर्मिलाको उपचार गर्न अस्पताल लैजाँदा दुवै मिर्गौला बिग्रिएको चिकित्सकले बताए ।

शर्मिलाले भनिन्, “दुवै मिर्गौला फेल भइसकेको कुरा सुन्दा बूढाबूढी नै रोइकराइ गर्यौँ तर हाम्रो रोइकराइ सुनिदिने कसले ? दुवै जना थलिएपछि हाम्रा दिन रोएर नै बित्ने गरेका छन्”, गहभरी आँशु निकाल्दै शर्मिलाले आफ्नो पीडा रासससँग सुनाइन्, “हामी त बेसहारा भयौं, सहारा दिने कोही छैन । जीवन र मृत्युको दोसाँधमा छौं हजुर । परदेशको बसाइ, त्यसमाथि श्रीमान् श्रीमती दुवै जना ओछ्यानमा थलिनुपर्दा हाम्रो त बिजोक नै भएको छ ।” कागजपत्र मिलाएर दुई वर्ष अगाडि मात्र पोर्चुगल आएकी शर्मिलाले छ महिनादेखि सानोतिनो कामसमेत गर्दै आएकी थिइन् ।

अहिले शर्मिलाको दुवै मिर्गौलाको डायलासिस भइरहेको छ भने चन्द्रकिशोरको पनि उपचार भइरहेको छ । चन्द्रकिशोर दम्पती ओछ्यानमै थला परे पनि पानीसम्म दिने मान्छे साथमा छैनन् । बिरामीको रेखदेख र स्याहार त कता हो कता, बिहान बेलुकीको खानाको जोहोसम्म गरिदिने कोही छैनन् । पराजुली दम्पती राजधानी लिस्बनस्थित आरोइसको एउटा घरको सानो कोठा भाडामा लिएर बस्दै आएका छन् ।

दुई छुट्टाछुट्टै ओछ्यानमा थलिएका दम्पतीको दैनिकी एकार्कालाई टुलुटुलु हेरेर बित्ने गरेको छ । आफूहरु दुवै थला परेपछि औषधोपचार र दैनिक छाक टार्न समेत धौधौ भएको चन्द्रकिशोरले बताए । मृत्युसँग लडिरहेको चन्द्रकिशोर दम्पतीले सहयोगका लागि याचना गरेका छन् । युरोप आउँदा लिएको ऋण चुक्ता गरी धनसम्पत्ति जोड्ने सुनौलो सपना बुनेको दम्पत्तीका एक छोरा छन् ।

बिरामी भई थला परेपछि काममा जान सकिएन, पैसा आउने बाटो छैन, घरभाडा, बिजुली पानी, बिहान बेलुकीको छाक टार्न समेत समस्या भएको उनले सुनाए । “खाना पकाइदिने मान्छे छैन, पानी दिने कोही छैन”, भक्कानिँदै चन्द्रकिशोरले भने, शौचालय जान पनि सक्दिन, दुवै जना थलिएका छौं, यस्तो वज्रपात त कसैलाई पनि नपरोस् ।”
“के गर्नू हजुर हाम्रो त रोएर नै दिन बित्ने गरेको छ, न उपचार गर्न पैसा छ, न त छाक टार्न नै ” चन्द्रकिशोर दम्पतीले बिलौना गर्दै भने, “लौ न हजुर हाम्रो समस्याका विषयमा समाचार लेखिदिनुपर्‍यो । विश्वभर रहेका नेपाली दाजुभाइको सानो सानो सहयोग पाइयो भने पनि बाँच्न सकिन्छ कि भन्ने आशा छ ।”

मिर्गौला प्रत्यारोपणका लागि सहयोग जुटाउन सकियो भने श्रीमतीलाई बचाउन सकिन्छ भन्ने आशा व्यक्त गर्दै चन्द्रकिशोरले भने । श्रीमान्श्रीमती दुवै थलिएपछि औषधोपचारका लागि सहयोग संकलन अभियान शुरु गरिएको चितवन समाज पोर्चुगलका अध्यक्ष तुलसीराम थपलियाले राससलाई जानकारी दिए ।

चन्द्रकिशोर दम्पतीको जीवनरक्षाका लागि विश्वभर रहेका सबै नेपालीलाई आर्थिक सहयोगका लागि आह्वान गरिएको थपलियाले बताए । उनीहरुको औषधोपचार र सहयोगका लागि आफूहरु संस्थागत रुपमा लागिपरेको गैरआवासीय नेपाली संघ पोर्चुगलका अध्यक्ष कुबेर कार्कीले बताए । यहाँको सरकारीस्तरबाट पाउनसक्ने सेवा सुविधा र औषधि उपचारका लागि पनि पहल भइरहेको उनले बताए ।
–रासस

प्रकाशित : चैत्र २५, २०७४ १६:२८
प्रतिक्रिया
पठाउनुहोस्

बाल यौन दुराचारको आरोपमा एक क्यानेडीयन पक्राउ

दीपेन्द्र विष्ट

काठमाडौँ — प्रहरीले गरीब तथा विपन्न परिवारका बालबालिकालाई पढाइ दिने प्रलोभन देखाउँदै लामो समयदेखि बाल यौन दुराचार गर्दै आएको आरोपमा ६० वर्षीय क्यानडियन नागरिक पिटर जोन डालगिल्सलाई पक्राउ गरेको छ । 

प्रतिकात्मक तस्बिर ।



काभ्रेको मन्डन, देउपुर नगरपालिका १ मा करीब १४ रोपनी जग्गामा विलासी ‘भिल्ला’ बनाएर बाल यौन दुराचार गरेको आरोपमा नेपाल प्रहरीको केन्द्रीय अनुसन्धान ब्यूरोले डालगिल्सलाई पक्राउ गरेको हो ।

‘एकजना स्थानीयको नाममा त्यो घर छ, लामो समयदेखि त्यही घरमा बस्दा रहेछन् । २ जना बालकलाई पढाई दिने प्रलोभन देखाएर यौन शोषण गरेको अवस्थामा भेटिए,’ ब्यूरो प्रमुख डिआइजी पुष्कर कार्कीले भने, ‘लामो अनुसन्धानपछि यो पत्ता लागेको हो ।’

उक्त घर स्थानीय चिलकाजी महर्जनको नाम रहेको प्रहरीले जनाएको छ । दुई वर्षदेखि पटकपटक नेपाल आउने गरेको उनले हिमालयन कम्युनिटी फाउन्डेसन नामक संस्था खोली विपन्न तथा गरीब वर्गका बालबालिका पढाइ दिने गरेको खुलेको छ ।

शिक्षा, खानेपानी र स्वास्थ्य क्षेत्रमा काम गर्ने आडमा उनले बाल यौन दुराचार गरेको कार्कीले बताए । २ जना बालकलाई उद्धार गरे पनि अरु पनि पीडित हुनसक्ने प्रहरीको अनुमान छ ।

‘अहिले भन्न सकिने अवस्थामा छैन,’ उनले भने, ‘अनुसन्धान गर्दैछौं ।’

डालगिल्स सन् २०१० देखि २०१४ सम्म सयुक्त राष्ट्रसंघमा काम गरेको अनुसन्धानबाट खुलेको छ । नेपाल आउनु अघि प्रहरीले डालगिल्सले बालयौन दुराचारी रहेको सूचना पाइसकेको भन्दै उनले त्यसपछि प्रहरीले पछ्याएको बताए ।

१५ जना भन्दा बढी बालकलाई यौन दुराचार गरेको प्रहरी अनुसन्धान खुलेको छ । डालगिल्सले द्वन्द्व पीडित, बाल मजदूर तथा सडक बालबालिकाका लागि नेतृत्वदायी भूमिका निर्वाह गरेको भन्दै पाएका ३ वटा मानार्थ विद्यावारिधिसमेत प्राप्त गरेको प्रहरी अनुसन्धानमा देखिएको छ ।

डालगिल्सले लाइबेरियामा विश्व स्वास्थ्य संगठनमा वरिष्ठ सहरी विकास सम्बन्धी सल्लाहकारको रुपमा काम गरेको, अफगानिस्तानमा यूएन हेविटयटमा राष्ट्रिय प्रतिनिधिमा रुपमा काम गरेको समेत अनुन्धानमा देखिएको छ । त्यसका साथै डाफरमासमेत काम गरेको उल्लेख छ ।

डालगिल्सलाई जिल्ला अदालत काभ्रेबाट बालयौन दुराचारमा मुद्दा चलाई अनुसन्धान थालिएको कार्कीले बताए ।

घटनामा नेपालीको संलग्नता रहेको भन्दै त्यसबारेमा पनि अनुसन्धान जारी रहेको उनले बताए । बालयौन दुराचारमा ७ वटा मुद्दा दायर गरेको भन्दै उनले ६ जना विदेशी र एकजना नेपाली गरी ७ जनालाई पक्राउ गरेको बताए ।

मुलुकी ऐन अनुसार बाल यौन दुराचार अपराध प्रमाणित भए बढीमा १५ वर्ष कैद सजाय तथा पीडितलाई मनासिव क्षतिपूर्तिको व्यवस्था रहेको छ ।

प्रकाशित : चैत्र २५, २०७४ १६:२२
पूरा पढ्नुहोस्
प्रतिक्रिया
पठाउनुहोस्