एमाले र माओवादी एकतामा ढिलाइ गरे भड्किन्छ : शाही

कान्तिपुर संवाददाता

काठमाडौँ — काठमाडौं । बिनाविभागीय मन्त्री एवं माओवादी केन्द्रका नेता महेन्द्रबहादुर शाहीले ६ महिनाभित्र एमाले र माओवादी केन्द्रबीच एकता नभए यो प्रक्रिया भड्किन सक्ने बताएका छन् । दुई पार्टीबीचको गठबन्धन र एकता प्रक्रियालाई भाँड्ने षड्यन्त्र देशभित्र र बाहिरबाट भइरहेको आरोप लगाउँदै उनले ढिला भएमा एकता नहुने दाबी गरे । 

‘सरकार गठन र पार्टी एकता प्रक्रिया सँगसँगै लैजाने भन्ने छ । छलफल भइरहेकै छ’शनिबार ललितपुरको मन्त्री निवासमा केही सञ्चारकर्मीसँगको कुराकानीमा शाहीले भने, ‘यो छ महिनाभन्दा पर जाँदैन । ढिला गरिए एकता हुँदैन, हुन दिँदैनन् ।’एकता प्रकिया बिगार्न माओवादी र एमालेभित्रका एउटा शक्तिलाई भड्काउन सक्ने प्रति उनको आशंका छ । अहिले एमाले, कांग्रेस र माओवादीभित्र गुट-उपगुट रहेको स्वीकार्दै उनले बेलैमा एकढिक्का नभए ती समूहहरु पनि विभाजित हुने धारणा राखे ।

कम्युनिस्ट पार्टीहरुको अन्तिम लक्ष्य समाजवाद हुँदै साम्यवादसम्म पुग्ने रहेकोले एमाले र माओवादीबीच एकतापछि अवलम्बन गर्ने विचारधारामा कुनै समस्या नरहेको उनको दाबी छ । ‘वामपन्थी शक्तिहरुबीच समाजवादबाट साम्यवादमा जाने विषयमा डिबेट नै छैन’ उनले प्रस्ट्याउँदै भने, ‘अन्तिम लक्ष्यमा कसरी पुग्छौं भन्ने कार्यनीतिमा मात्र बहस हो ।’ शान्तिपूर्ण तरिकाले संसदीय व्यवस्थाबाटै साम्यवादसम्म पुग्नेमा एमाले र माओवादी सहमत भइसकेकाले एकता गर्न लागिएको उनको भनाइ छ । नेत्रविक्रम चन्दबाहेक सबै नेपाली कम्युनिटहरु शान्तिपूर्ण बाटो अर्थात् संसदीय व्यवस्थामा आइसकेका छन् ।

एकतापछि एमाले अध्यक्ष केपी ओली र माओवादी अध्यक्ष पुष्पकमल दाहालबीच शक्ति बाँडफाँटमा समेत सहमति नजिक पुगेसकेको नेता शाहीले बताए । उनले भने, ‘दुई पार्टीमा दुई शीर्ष नेता हुनुहुन्छ, केपी ओली प्रधानमन्त्री हुनुभएमा प्रचण्ड पार्टी अध्यक्ष, प्रचण्ड प्रधानमन्त्री बनेमा ओली अध्यक्ष बन्नु हुनेछ ।’ एकतापछि एउटै पार्टी बन्ने भएकोले प्रधानमन्त्री आलोपालो भन्नै नहुने भन्दै शाहीले व्यक्ति फेरिन सक्ने बताए ।

वाम गठबन्धन बन्दादेखि नै एमाले र माओवादीबीच ६०/४० को भागबन्डा गरिएको भन्दै मन्त्री शाहीले प्रदेशको मुख्यमन्त्री समेत त्यही आधारमा हुने औंल्याए । ६ नम्बर प्रदेश माओवादीको भागमा परेमा मुख्यमन्त्रीको दाबेदारका रुपमा हेरिएका छन् शाही । आफूलाई पार्टी नेतृत्वले प्रतिनिधिसभातर्फ चुनाव लड्नका लागि टिकट दिए पनि नेपालको दुर्गम प्रदेश ६ लाई विकास र समृद्धिमा लैजाने उद्देश्यसहित प्रदेशसभा सदस्यमा चुनाव लडेको उनले बताए । ‘मेरो सीप, क्षमता र अनुभव ६ नम्बर प्रदेशको विकासमा लगाउने सोंच छ’ उनले भने, ‘पार्टी निर्णय र गठबन्धनको डिसिजन के आउँछ, त्यसको पालना गर्नेछु ।’शाही कालिकोटको प्रदेशसभा ‘ख’बाट निर्वाचित सांसद् हुन् ।

उर्जा मन्त्रालयको जिम्मेवारी सम्हालेका शाही गत असोज अन्तिम साता राप्रपाबाट मन्त्री थपिएपछि बिनाविभागीय बनेका हु्न् ।

प्रकाशित : पुस ८, २०७४ १६:५६
प्रतिक्रिया
पठाउनुहोस्

मेसी भर्सेस रोनाल्डो

स्पेनी लिगमा रियल म्याड्रिड र बार्सिलोनाको खेल आज १७:४५ बजे सुरु हुँदैछ ।
राजु घिसिङ

काठमाडौँ — स्पेनी फुटबलका दुई महारथी बार्सिलोना र रियल म्याड्रिडको प्रतिस्पर्धालाई फुटबलमा हार—जितको खेलको रुपमा मात्र लिइँदैन ।

‘एल क्लासिको’ले धेरै अर्थ बोक्ने गर्छ। क्रिस्टियानो रोनाल्डो सन् २००९ मा म्याड्रिड पुगेयता लियोनल मेसीविरुद्ध रोनाल्डोको खेल पनि बनेको छ, एल क्लासिको।

विश्व फुटबलमा एक दशकयताका सबभन्दा ठूला स्टार नै पोर्चुगिज रोनाल्डो र अर्जेन्टिनी मेसी हुन्। यी दुईमध्ये नम्बर १ खेलाडीको नाम लिनुपऱ्यो भने धेरैसँग स्पष्ट जवाफ हुदैन। रियल र बार्सिलोनाका यी दुई सुपरस्टारले समग्रमा स्पेनी ला लिगा १० पल्ट, युरोपेली च्याम्पियन्स लिग सातपल्ट, बेलन डि’अर (विश्वको सर्बोत्कृष्ट खेलाडीको अवार्ड) १० पल्ट जितेका छन्। त्यसक्रममा उनीहरूले एकपछि अर्को गर्दै लगभग सबै पुराना कीर्तिमान तोडेका छन्। त्यसैले पनि एल क्लासिको रोनाल्डोविरुद्ध मेसीको खेल बन्यो।

पछिल्लो वर्ष रियलले ला लिगा, च्याम्पियन्स लिग, युईएफए सुपरकप, स्पेनी सुपरकप र क्लब विश्वकप गरी ५ उपाधि जित्यो। बार्सा भने कोपा डेल रेको ट्रफिमै सीमित रह्यो। तर यो सिजन (सन् २०१७—१८) बार्सा फेरि उत्कृष्ट लयमा फर्कियो। रियल भने खस्कियो। ला लिगामा बार्साले ११ अंकको अग्रता लिएको छ। आजको एल क्लासिको बार्सासँग दूरी घटाउने अवसर पनि हो रियललाई। र, रोनाल्डोका निम्ति मेसीविरुद्धको प्रतिस्पर्धालाई अझ चर्को बनाउने मौका।

रियलको घरेलु मैदान बर्नाबाउमा खेल हुने भएकोले पनि सट्टेबाजीमा रोनाल्डोले गोल गर्ने संभावना उच्च देखाइएको छ। त्यसपछि मेसी र बार्सामा उसका सहकर्मी लुइस स्वारेज छन्। एल क्लासिकोका सर्बाधिक गोलकर्ता मेसी (२४) हुन्, तेस्रोमा रोनाल्डो (१७) छन्।

रोमाञ्चक तथ्य: रोनाल्डो र मेसीले सन् २०१७ मा ५३—५३ गोल गरेका छन्। क्यालेन्डर वर्षको होडमा एकअर्कालाई उछिन्ने अवसर पनि हो एल क्लासिको। लिगमा मेसी (१४ गोल) सर्बाधिक गोलकर्ता हुन्। उनले यो सिजन १८ गोल गरेका छन्। पछिल्ला चारै खेलमा गोल गरेका रोनाल्डो बल्ल लयमा देखिएका छन्। लिगमा ४ गोलमात्र गरेपनि उनले यो सिजन गोल संख्या १६ पुर्‍याइसकेका छन्।

रोनाल्डोले हालै पाँचौंपल्ट बेलन डि’अर अवार्ड जित्दै मेसीको कीर्तिमान बराबरी गरे। उनको चाहना सातपल्ट अवार्ड जित्ने हो। तर सजिलो छैन। ३२ वर्षीय उनको गोल मेसिन खिया लाग्न थालेको छ। हुन त ३० वर्षीय मेसीको पनि गोलको औसत घटेको छ। क्लब फुटबलमा मेसीले प्रतिखेल ०.८६ र रोनाल्डोले ०.७४ को औसतमा गोल गरेका छन्।

ला लिगामा मेसी ४ र रोनाल्डो ३ सिजन सर्बाधिक गोलकर्ता भए। मेसी क्याटलन क्लब र रोनाल्डो रियलका कीर्तिमानी गोलकर्ता पनि हुन्। युरोपेली च्याम्पियन्स लिगमा रोनाल्डो (११४) को कीर्तिमान छ। उनलाई मेसी (९७) ले पछ्याइरहेका छन्। ला लिगामा मेसी (३६३ गोल) लाई रोनाल्डो (२८९) पछ्याइरहेका छन्। बार्साको ला मसिया एकेडेमीमा हुर्किएका मेसीले सन् २००४ देखि ला लिगा खेलिरहेका छन्।

पोर्चुगलको स्पोर्टिङपछि इंग्ल्यान्डको म्यानचेस्टर युनाइटेड हुदै रोनाल्डो २००९ मा म्याड्रिड पुगेका थिए।

ला लिगाको ह्याट्रिक होडमा रोनाल्डो ३२—२८ ले अगाडि छन् तर उनले बार्साविरुद्ध एकै खेलमा ३ गोल गर्न सकेका छैनन्। मेसीले भने एल क्लासिकोमा दुईपल्ट ह्याट्रिक गरिसकेका छन्। यी दुईवीच क्लब फुटबलको उपाधि होडमा मेसी ३०—२६ ले अगाडी छन्।
(एजेन्सीहरुको सहयोगमा)

प्रकाशित : पुस ८, २०७४ १६:४५
पूरा पढ्नुहोस्
प्रतिक्रिया
पठाउनुहोस्