किस्टका कर्मचारी आन्दोलनमा

कान्तिपुर संवाददाता

ललितपुर — किस्ट मेडिकल कलेज शिक्षण अस्पताल ग्वार्कोमा कार्यरत नर्सलगायत कर्मचारीले कलेज व्यवस्थापनले माग सुनुवाइ नगरेको भन्दै आन्दोलन थालेका छन् ।

अस्पतालको विनियमावली श्रम ऐनअनुसार हुनुपर्ने, तलबभत्ता समयानुकूल वृद्धि, औषधि उपचार, जोखिम भत्ता नपाएको र अस्पतालमा ठेकेदारमार्फत कर्मचारी आपूर्ति बन्द गर्नुपर्नेलगायत १५ बुँदे माग राखेर कर्मचारीहरू आन्दोलनमा उत्रेका हुन् । अस्पतालको ओपीडी र प्रशासन सेवा ९ दिनयता ठप्प छ । मागका सम्बन्धमा अस्पताल प्रशासन र कर्मचारीबीच २ वर्ष अघि सेवासुविधा वृद्धिका लागि सम्झौता भएको थियो । माग सुनुवाइप्रति ६ महिनादेखि व्यवस्थापनलाई ध्यानार्कषण
गराउँदा पनि चासो नदिएकाले कडा रूपमा प्रस्तुत भएको आन्दोलित कर्मचारीहरू बताउँछन् ।
कर्मचारीले शुक्रबार अस्पताल परिसरमा नाराबाजी गरे । ओपीडी र प्रशासन सेवा ठप्प हुँदा आएका बिरामी उपचारै नगरी फर्कन बाध्य भए । अखिल नेपाल स्वास्थ्य श्रमिक संघ किस्ट अस्पतालका अध्यक्ष रूपेश केसीले अस्पताल प्रशासनले पटकपटक माग पूरा गरिदिने आश्वासन दिए पनि कार्यान्वय नगरेको बताए । अस्पतालमा डाक्टर र प्रोफेसरबाहेक ३ सय ७५ कर्मचारी छन् । २०७२ असारबाट प्रत्येक कर्मचारीको मासिक तलबबाट १.५ र व्यवस्थापनबाट १ प्रतिशत रकम बेहोर्ने गरी कल्याणकारी कोष खडा गरिएको थियो । कोषमा जम्मा भएको रकमबारे कर्मचारी अनविज्ञ रहेको संघकी सचिव सुस्मिता कट्टेल बताउँछिन् । भन्छिन्, ‘जागिर छोडेर जाने कर्मचारीसमेत उक्त कोषको रकम फिर्ता दिएनन् ।’ अस्पतालका वरिष्ठ प्रशासक अक्षयप्रसाद गौतमले कर्मचारीको माग कलेजमा हुने विद्यार्थी भर्नासँग सम्बन्धित रहेको दाबी गरे । ‘माग जायज छ,’ उनले भने, ‘सरकारले विद्यार्थी भर्ना ९० सिटमा सीमित र विद्यार्थीबाट उठाइने शुल्कमा कडाइ गर्दा आम्दानी कम भएकाले माग पूरा गर्न नसकिएको हो ।’ उनले कलेजले १ सय ५० विद्यार्थी भर्ना गरी सञ्चालन गर्न सके मात्र कर्मचारीको माग पूरा गर्न सकिने बताए ।

प्रकाशित : पुस ८, २०७४ ०८:३६
प्रतिक्रिया
पठाउनुहोस्

दमकल भवन पुनर्निर्माण अन्योल

कान्तिपुर संवाददाता

भक्तपुर — जिल्लाको एक मात्र जुद्ध वारुण यन्त्र (दमकल) को कार्यालय भूकम्पले क्षतिग्रस्त छ । क्षतिग्रस्त भवनबाटै करिब ३२ महिनायता कार्यालय सञ्चालन हुँदै आएको छ । २००१ सालमा कार्यालय स्थापना भएको हो । स्थापनाकालदेखि भोगचलन गर्दै आएको भए पनि जग्गा आफ्नो नाममा नहुँदा क्षतिग्रस्त भवन पुनर्निर्माण अन्योलमा छ ।

कार्यालय प्रमुख विजयप्रसाद द्यौभडेलका अनुसार साबिक भक्तपुर नगरपालिका १७ दुधपाटीको २२७ नम्बर कित्ताको ९५ रोपनी सार्वजनिक जग्गा २०४० असोजमा ‘सैन्य तालिम केन्द्र’ को नाममा नामसारी भयो । जसमध्ये हालको भक्तपुर नगरपालिका १, दूधपाटीस्थित सैनिक आवासीय महाविद्यालयको पूर्वपट्टिको पर्खालसँगै जोडिएको ‘सैन्य तालिम केन्द्र’को ३ रोपनी ७ आना २ पैसा क्षेत्रफल जग्गा दमकलको कार्यालयले ओगटी भोगचलन गर्दै आएको छ । भूकम्पले क्षतिग्रस्त भवन पुनर्निर्माणका लागि सरकारले आव ०७२/७३ मा ५ करोड रुपैयाँ विनियोजन गरेको थियो । चालु आव ०७४/७५ मा सहरी विकास तथा भवन विभाग डिभिजन कार्यालय भक्तपुरमार्फत कार्यालय पुनर्निर्माणका लागि थप ५ करोड रुपैयाँ विनियोजन भएको द्यौभडेलले बताए । तर, भवन बसेको जग्गा ‘सैन्य तालिम केन्द्र’का नाममा भएकाले नक्सापासमा कठिनाई भएकाले छ । ‘यसैले पुनर्निर्माण अन्योलमा पर्‍यो,’ द्यौभडेलले भने ।
गृह मन्त्रालयमार्फत सोही स्थानमा भवन पुनर्निर्माणका लागि कार्यालयले ३० वर्षका लागि जग्गा दिन केन्द्रलाई पत्राचार गरेको थियो । तर, केन्द्रले ५ वर्षका लागि भाडामा दिने सहमति गरेको द्यौभडेलले बताए । ‘५ वर्षमा त भवन पनि बनिसक्दैन,’ उनले गुनासो गरे । जुद्ध बारुण यन्त्रको कार्यालयले भने आफ्ना नाममा अन्त कहीं जमिन नभएको र केन्द्रलाई भवन पुनर्निर्माणका लागि जमिनको मञ्जुरीनामा माग गरेको जनाएको छ । ‘सैन्य तालिम केन्द्रको जग्गा दमकलका नाममा नामसारी गर्नु पर्दैन,’ द्यौभडेलले भने, ‘२००१ देखि भोगचलन गर्दै आएको जग्गामा भवन पुनर्निर्माणका लागि मञ्जुरीनामाको मात्र माग गरेको हो ।’ मञ्जुरीनामाका लागि केन्द्रलाई २ वर्षअघि नै पत्र पठाए पनि प्रतिक्रिया दिन ढिलाइ भएको उनले बताए । भवन निर्माणका लागि जिल्ला प्रशासन कार्यालयमार्फत सम्बन्धित मन्त्रालयमा पटक/पटक पत्र पठाइसकेको समेत उनले बताए ।

प्रकाशित : पुस ८, २०७४ ०८:३५
पूरा पढ्नुहोस्
प्रतिक्रिया
पठाउनुहोस्