काठमाडौं — ५० हजार रुपैयाँ घूससहित पक्राउ परेका गोंगबुका प्रहरी निरीक्षक हरिहर सुनुवारविरुद्ध विशेष अदालतमा मुद्दा दायर भएको छ । अख्तियारले सुनुवारसहित घूस उठाउने काममा संलग्न प्रहरी जवान वीरेन्द्रबहादुर बमविरुद्ध समेत मुद्दा दायर गरेको हो ।
गोंगबु क्षेत्रका गेस्टहाउस सञ्चालकसँग घूस मागेको उजुरीपछि अख्तियारको टोलीले उनीहरूलाई रंगेहात पक्राउ गरेको हो ।
दाङ — प्रतिनिधि र प्रदेशसभा चुनाव भाँड्न सक्ने भन्दै नियन्त्रणमा लिएका नेपाल कम्युनिस्ट पार्टीका ३१ नेता/कार्यकर्तालाई प्रहरीले सोमबार थुनामुक्त गरेको छ । चुनावविरोधी गतिविधि गर्नसक्ने आशंकामा उनीहरूलाई एक महिनाअघि पक्राउ गरिएको थियो ।
चुनाव सकिएपछि जिल्ला प्रशासनले सामान्य धरौटीमा छाडेको जिल्ला प्रहरी कार्यालयका प्रहरी निरीक्षक हरिबहादुर बीसीले जानकारी दिए । नेकपाका जिल्ला सेक्रेटरी सविन पोख्रेलले बिनाकारण प्रहरीले आफ्ना नेता/कार्यकर्तालाई पक्राउ गरी हिरासतमा यातना दिएको बताएका छन् ।
प्रकाशित : पुस ४, २०७४ ०७:१२
