गोकर्णेश्वरको गाई फार्ममा आगलागी, ५२ गाई मरे, ६८ घाइते

शनिबार बिहान ११ बजेतिर अचानक ओम कृषि फार्ममा आगलागी भएको हो । नेपाली सेना र प्रहरीको टोलीको सहयोगमा आगो निभाइसकेको फार्म सञ्चालक बाबुराम कार्कीले जानकारी दिए ।

महानगरीय प्रहरी वृत्त बौद्धले टोली घटनास्थलमा खटिइरहेको बताएको छ । वृत्तका अनुसार ठूलो आगलागीको घटना भएकोले क्षतिको विवरण आउन बाँकी छ । बिहान ११ बजेपछि लागेको आगो दुई घण्टाको अवधिमा निभाइएको छ ।

आगलागीबाट १२ टन दाना, डेढ सय गाईलाई ‌ओछ्याउने म्याट जलेका छन् । २ सय २० लम्बाई र ४० फिट चौडाई रहेको गोठ पूरै जलेको छ । फार्म सञ्चालक कार्कीले आगलागीबाट झन्डै चार करोडको क्षति भएको कान्तिपुरसँग बताए । उनी त्रिभुवन विश्वविद्यालयका अर्थशास्त्रका उपप्राध्यापक पनि हुन् ।

घाइते पशुको स्थानीय तीन पशु चिकित्सकले उपचार गरिरहेको आगलागीस्थलमा रहेका स्थानीय जनार्दन खड्काले जानकारी दिए । उनले घाइते गाई सबै मर्ने अवस्थामा रहेको बताए । आगलागीको कारण अझै पत्ता लागेको छैन । उक्त फार्मबाट दैनिक १ हजार लिटर दूध बिक्री हुँदै आएको थियो ।