काठमाडौं — गृहमन्त्री विमलेन्द्र निधि विना सूचना संसदमा उपस्थित नभएपछि संसदको कामकारवाही प्रभावित भएको छ । संसदको कार्यसूचीमा रहेको निर्वाचन कसुर तथा सजाय विधेयक पारित गर्ने प्रकृया अवरुद्ध भएको छ ।

सोमबार दिउँसो १ बजेका लागि बोलाइएको संसदको बैठकमा गृहमन्त्री निधिले उक्त विधेयक पारित गर्नका लागि प्रस्ताव पेश गर्ने कार्यसूचि रहेको थियो । तर, संसदको बैठकमा बिशेष समय र सुन्य समयमा साँसदहरुले बोल्ने पालो सकिसक्दा पनि गृहमन्त्री संसदमा उपस्थित नभएपछि बैठक नै स्थगित गर्नुपर्‍यो ।

सभामुख ओनसरी घर्तीले कार्यसूचिबाट उक्त विषय हटाउँदै गृहमन्त्री बोलाएर पुन: साँढे दुई बजे संसदको बैठक बोलाएकी छन् ।

सरकारले आफु निर्वाचनको लागि तत्पर रहेको भनिरहेको बेला गृहमन्त्री निर्वाचनका लागि आवश्यक विधेयक पारित गराउनका लागि पेश गर्न नै समयमा उपस्थित नहुँदा यसले प्रश्न उब्जाएको छ । यसअघि नै निर्वाचन आयोगले बेलैमा निर्वाचन कानुनहरु बन्न नसके जेठ १५ गतेभित्र निर्वाचन संभव नहुने बताइसकेको छ । त्यसपछि बर्षा लाग्ने हुादा निर्वाचन संभव हुँदैन ।

हालसम्म संसदले मतदाता नामावली र निर्वाचन आयोगको काम कर्तव्य र अधिकार सम्बन्धी विधेयक पारित गरेको छ । अझै पनि निर्वाचनका लागि महत्वपूर्ण कानुन निर्वाचन र राजनीतिक दल सम्बन्धी गरि दुई बिधेयक संसदको राज्य व्यवस्था समितिमा नै थन्किरहेो छ ।