बेल्जियम — गायक जोडी (हीरा) अर्थात् हिमाल सागर र रामकृष्ण ढकालले युरोपका विभिन्न मुलुकहरुमा आफ्नो सांगीतिक प्रस्तुति प्रस्तुत गर्दै सोमवार बेल्जियम आएका छन् । स्विडेन, स्विजरल्यान्ड, पोर्चुगल हुँदै बेल्जियम आएको जोडीले आफ्ना नयाँ, पुराना थुप्रै गीतहरु गएर नेपालीलाई मनोरन्जन प्रदान गरे  ।

पोर्चुगलको लिस्बोनबाट करिव ७ घन्टा उडान ढिलो भएर करिव २ घण्टा ढिलो बेल्जियमको कार्यक्रममा पुगेका ढकालले आफ्नो प्रस्तुति हेर्न पर्खेर बसेका दर्शक सामु सुनाउँदै भने ‘तपाईंहरु टिकट त लिनु भएको छ, तर पैसा भन्दा पनि ठूलो नेपाली गीत संगीत प्रतिको माया हो, तपाईंको यो पर्खाइले नेपाली गीत संगीतलाई कति माया गर्नुहुन्छ भनेर अब भनिरहनु पर्दैन ।’

विदेशमा कलाकारहरुलाई गरिएको माया र सम्मान देखेर नै कार्यक्रम गर्नका लागि आएको बताउँदै ‘आफ्नो मान्छे आफ्नै हुन्छ..’ भन्ने गीतबाट सुरु गरेका ढकालले करिव ३ घन्टाको समयमा ‘म हुरीमा दियो जलेको देख्छु..’, ‘चरीले त छाडेर गइ गयो..’, ‘बाचून्जेलीलाई..’, लगायत नयॉ र पुराना गरि करिव दर्जन गीत गएर दर्शकलाई मनोरञ्जन प्रदान गरे । ‘नेपाली कला संस्कृतिले नेपालीलाई जोड्छ,’ ढकालले भने, ‘प्रवासमा थोरै थोरै नेपालीहरु भएका र नपुगेका देशमा पनि पुग्न मन छ ।’

ढकालसँगै युरोप आएका अर्का गायक हिमाल सागरले ‘न मैले लेखे न उनले लेखिन..’, ’मेरो माया मारे पछि..’, ’तीन ढिक्के फूली..’, ‘तिम्रो चोलीको तुनामा..’ लगायतका गीतहरु गएर दर्शकहरुलाई खुवै नचाए । आधा दर्जन बढी क्यासेट बाहिर ल्याइसकेका सागरले प्रवासमा नेपालीको नेपाली कला संस्कृति प्रतिको माया देखेर खुसी लागेको बताउँदै आफू थप उत्साहित भएको बताए ।

नेपाली समाज स्वीडेनको निमन्त्रणामा गत हप्ता स्विडेन आएका गायकद्वय आफ्नो झन्डै दुइ हप्ताको सांगीतिक कार्यक्रमसँगै बिहीबार नेपाल फर्किदै छन् । बेल्जियममा एनआरएनए बेल्जियमले कार्यक्रमको आयोजना गरेको थियो ।