ओलीको विकल्प खोज्दा मुलुकको हित हुन्छ : उपेन्द्र यादव

रिपोर्टर्स क्लब नेपालले आईतबार आयोजना गरेको साक्षात्कारमा उनले भने, ‘आफू छिट्टै भुतपूर्व हुने देखेर होला ओली विशिष्टहरुको सुविधा बढाउने तिर लागेका छन् ।’ यादवले बालुवारटार र बालुवाटार नेक्ससले ‘ब्ल्याक ईकोनोमी’बाट कमाईरहेकोले समस्या समाधान गर्न नचाहिरहेको आरोप पनि लगाए । ‘सरकार आन्दोलन लामो होस् भन्ने चाहन्छ । वीरगञ्ज बाहेकका नाकाबाट सयौं ट्याङकर र बुलेट आउँछन्, वीराटनगरसहितका ठाउँमा तेल राख्ने ठाउँ छैन ती तेल सबै ब्लाक मार्केटमा जान्छ । सरकार यसैमा लागिरहेको छ,’ उनले भने ।

उनले समस्या समाधानमा प्रधानमन्त्री नै बाधक भएको दावी गर्दै भने, ‘जबजब समस्या समाधानतिर जान्छ तबतब प्रधानमन्त्री गल्लीको डन र माफीया जस्तै बोल्छन् । मधेसी जनतालाई जनावर जस्तो गैरजिम्मेवार भाषा बोल्नु प्रधानमन्त्रीका लागि सोभनीय होइन । सडकको जस्तो भाषा प्रधानमन्त्री बोल्छन् ।’

मोर्चाकै नेता राजेन्द्र महतो लगायतको अतिवादले समस्या पारेको हो ? भनी सोधिएको प्रश्नमा उनले उत्तर र दक्षिणका अतिवादीले देशको हित नहुने बताए । ‘एउटा अति राष्ट्रवाद र अर्को पहाडे समूदायलाई होलसेलमा राखेर विष बमन गर्ने चिन्तन जुन तराईमा देखिएको छ । यसले जनताबीचको दुरी बढाउँदै छ । यो दुबैखाले चिन्तन ठीक छैनन्,’ उनले भने ।

अध्यक्ष यादवले मधेसमा भईरहेको आन्दोलन पहाडे वा मधेसी कुनै पनि समूदायको विरुद्ध नभई विभेद विरुद्धको संघर्ष भएको भन्दै खस क्षेत्रीहरुसमेत विभेदमा परेकोले आन्दोलनलाई कसैको पक्ष विपक्षमा बुझ्न नहुने तर्क गरे ।

विश्वासिलो आधार भए तीन महिनापछि सीमांकन टुङग्याउने कुरामा समेत सहमति हुन सक्ने भए पनि पटकपटक धोका पाएकाले विश्वास गर्ने आधार नभएकाले तत्काल समाधान हुनु पर्ने अडान ब्यक्त गर्दै उनले राजनीतिक समाधान किस्ताबन्दी र सेमेष्टर प्रणालीमा हुन नसक्ने बताए ।

उनले समस्याको समाधान नहुन्जेलसम्म आन्दोलन नरोकिने र वीरगञ्ज नाकाको धर्ना समेत बताए । उनले कांग्रेससँग सकारात्मक वार्ता भइरहेको पनि बताए । उनले राष्ट्रपति विद्या भण्डारीको जनकपुर भ्रमणमा भएको घटनाले आफूलाई समेत दुख लागेको भन्दै त्यस्तो घटना हुन नहुने थियो भन्ने धारणा राखे ।