जोगबनी नाकाबाटमात्रै १३९ ट्यांकर इन्धन, अहिलेसम्मकै सर्वाधिक आयात

जोगबनी नाकाबाट शुक्रबार अहिले सम्मकै सर्वाधिक इन्धनका ट्यांकर भित्रिएका छन् ।

अगाडिका सामान्य अवस्थामा पनि दैनिक सरदर ४० ट्यांकर भित्रिने गरेको यो नाकाबाट शुक्रबार साँझसम्म १ सय ३९ ट्यांकर भित्रिएको विराटनगर भन्सारले जनाएको छ ।

जोगबनी नाकाबाट शुक्रवार अहिलेसम्मका सवैभन्दा बढी पेट्रोलियम पदार्थ भित्रिएको भन्सारले जनाएको छ । विराटनगर भन्सार प्रमुख कृष्णवहादुर बस्नेतका अनुसार डिजलका ९४, पेट्रोलका २८ ट्यांकर र खाना पकाउने एलपी ग्यासका १७ बुलेट भित्रिएका छन् । बुधबार राति यहाँबाट ५३ ट्यांकर पेट्रोलियम भित्रिएको थियो ।

पूर्वी नाका काँकरभिट्टाबाट शुक्रबार २ ट्यांकर इन्धन भित्रिएको मेची भन्सारले जनाएको छ । भन्सार प्रमुख भीमप्रसाद अधिकारीका अनुसार ४ ट्यांकर भित्रिने तयारीमा छन्।