नाकाबन्दीले सीमाक्षेत्रको जनजीवन प्रभावित (फोटो)

भारतले गरेको नाकाबन्दीका कारण सीमा क्षेत्रका सर्वसाधारणको जनजीवन बिथोलिएको छ ।

नाकाबन्दीका कारण पूर्वी नाकामा बसोवास गर्ने सर्वसाधारण प्रभावित बनेका हुन् । ‘अब त सहज होला भनेको झन् कडाई शुरु भयो’, स्थानीय भन्सार एजेन्ट रोसन अग्रवाल गुनासो पोख्छन्, ‘सम्पूर्ण व्यापार चौपट्ट भइसक्यो ।’

नाकाबन्दीले नेपाल छिर्न नपाएर थन्किएका करिब चार सय ट्रक तथा कन्टेनरले भारतको पानीट्यांकी भन्सार परिसर अस्तव्यस्त छन् । ट्राफिक जामले उपभोग्य सामान लिन भारतीय बजार जाने नेपाली उपभोक्तालाई प्रत्यक्ष असर परेको छ । ‘मेची पुल तरेर पानीट्यांकी बजार पुग्न कम्तिमा एक घण्टा लाग्न थालेको छ’, स्थानीय डिल्ली अधिकारीले समस्या सुनाए, ‘हामीजस्ता सर्वसाधारणलाई नराम्रो असर परेको छ ।’

ट्रकको लामले पैदल यात्री र रिक्सा आवात जावतमा समेत कठीनाई भएको छ । नाकाबन्दीले पूर्वको व्यस्त मेची भन्सार सुनसान छ । मेची भन्सारका सूचना अधिकृत दिपेन्द्र झाले भने, ‘पहिला काम गर्न भ्याइनभ्याइ थियो अहिले फुर्सदैफुर्सद छ ।’