मोरङ — मधेस आन्दोलन निश्कर्षमा नपुगुन्जेल काठमाडौं नजाने अडान लिंदै आएका सदभावना पार्टीका अध्यक्ष राजेन्द्र महतो शुक्रबार साँझ विराटनगरवाट काठमाडौं गएका छन् । साढे पाँच बजेको सौर्य एयरलायन्सको बिमानवाट उनी राजधानी गएका हुन् ।

आन्दोलन सुरु भएपछि तराई झरेका उनले विभिन्न जिल्लामा सभाहरूलाई सम्बोधन गर्दा आफु मधेश आन्दोलन निश्कर्षमा नपुगुन्जेल राजधानी नजाने अडान दोहोर्‍याउँदै आएका थिए । आफ्नो अडानकै कारण गत हप्ता भारतीय प्रधानमन्त्री नरेन्द्र मोदीको बिशेष दुतका रुपमा विदेश सचिव एस जयशंकर आउँदा पनि उनी राजधानी गएनन् ।

शुक्रवार सुनसरीको इनरुवामा सभालाई सम्बोधन गरि ४ वजे विराटनगर आइपुगेका महतोले साता अघि प्रहरीको गोली लागि घाइते भएकाहरूको परिवारलाई भेटनुका साथै महाबीर चौकमा आयोजित कोण सभालाई सम्बोधन गरेका थिए । त्यसपछि सिधै उनी बिमानस्थल पुगेका थिए ।

विमानस्थलमा सञ्चारकर्मीसित कुरा गर्दे महतोले आफु विरगन्ज जानका लागि राजधानी जान लागेको बताए । यस अघि वीरगन्जवाट उनी भारतीय वाटो हुँदै गत मंगलवार मोर्चाको बैठकमा सहभागी हुन राजविराज आएका थिए । शुक्रबार राति काठमाडौंमा बस्ने र भोलि बिहान सिमरा हुँदै विरगन्ज जाने उनले बताए । मोर्चाले भन्सार केन्द्रित आन्दोलन सुरु गरेको र आफनो पार्टीको भागमा वीरगन्ज नाका संयोजक गर्ने जिम्मा आएकाले हतारिएर विरगन्ज जान लागेको उनले बताए ।

बिमानस्थलमा सञ्चारकर्मीसित कुरा गर्दे महतोले अबको वार्ता सिंहदरबार, भारतीय दुतावास वा काठमाडौं कहि नभएर मधेशकै धर्तीमा हुने बताए । उनले ४० दिन सम्म मधेसमा आन्दोलन हुँदा सरकारले कुनै ध्यान नदिएकाले काठमाण्डौको दानापानी बन्द गर्ने हिसावले भन्सार राजमार्ग केन्द्रित आन्दोलन थालेको बताए ।

उनले मोर्चाको शान्तिपूर्ण आन्दोलनमा भारत सहित बिदेशी राष्ट्रहरूले समर्थन गरेको बताए ।