आतंकको छायाँमा वार्ता हुँदैन : महतो

सुनसरीको इनरुवामा शुक्रबार आयोजित पत्रकार भेटघाटमा सरकारले पठाएको पत्रको जवाफ दिँदै उनले वार्ताका लागि न्यूनतम चार सर्त अघि सारेपनि सरकार लचिलो रुपमा प्रस्तुत नभएको र भयरहित वातावरण नबनाएको आरोप लगाए ।

संयुक्त मधेसी मोर्चाले आयोजना गरेको विरोध सभामा सहभागी हुन मोटरसाइकलमा आएका महतोले पत्रकार समक्ष आफूहरुले तेस्रो चरणको अवज्ञा आन्दोलन थालेको बताए । उनले गान्धीले अंग्रेजका विरुद्ध चालेको अहिंसात्मक अवज्ञा आन्दोलन गरेर आफूहरुले काठमाडौंलाई मागहरु पुरा गराउन बाध्य बनाउने बताए । उनले भारतले सीमा नाकामा नाकाबन्दी गरेको नभई आफूहरुले नाका बन्दी गरेको जिकिर गरे ।

भारतको परराष्ट्र मन्त्रालयले प्रधानमन्त्रीलाई पठाएको ७ वटा संशोधनका बुँदा र तपाईहरुको ७ बुँदा उस्तै छन् नी ? भन्ने जिज्ञासामा आफूहरुले भारतले राख्नु अघि नै सरकारलाई ति मागहरु पेस गरिसकेको बताए ।

आफ्नो आन्दोलन मधेसको आन्दोलन भएको बताउँदै मधेसी देख्ने वित्तिकै बिहारी वा भारतीय देख्नु शासकहरुको कमजोरी भएको बताए ।
 
यो आन्दोलननै निर्णयक हुने बताउँदै महतोले सरकारले निम्नतम् शर्त पुरा गरे वार्ता नै अन्तिम विकल्प रहेको बताए । तर अब उधारो सम्झौता नहुने उनले बताए । उनले भने, ‘वार्तामा बसेपछि सम्झौता नगदानगदी हुनु पर्छ । उधारो सम्झौता हुँदैन ।’ मोर्चा वार्ता गर्न तयार रहेको बताउँदै सरकारले सेना, प्रहरी फिर्ता बोलाएर वार्ताका वातावरण बनाउन आवश्यक रहेको उनले बताए ।