दुई मधेसी मोर्चाबीच सहकार्यको तयारी
काठमाडौं — विजय गच्छदार नेतृत्वको संघीय लोकतान्त्रिक मोर्चासँग कार्यगत एकताको तयारी गर्न तमलोपा अध्यक्ष महन्थ ठाकुर र उपाध्यक्ष हृदयेश त्रिपाठी काठमाडौं आइपुगेका छन् । बिहीबार साँझ विराटनगरबाट काठमाडौं ओर्लेका ठाकुरले सरकारसँग वार्ता संभावना भने नरहेको बताए ।
कार्यगत एकताका लागि फोरम लोकतान्त्रिक अध्यक्ष विजयकुमार गच्छदारसँग ठाकूरले आजै भेट गर्दैछन् । संविधानको विरोधमा रहेका दल, मोर्चा र संगठनसँग मोर्चाबन्दी गर्ने बुधबार राजविराज बैठकको निर्णयअनुरुप मधेसी मोर्चा र गच्छदारनेतृत्वको संघीय लोकतान्त्रिक मोर्चाबीच कार्यगत एकताका लागि छलफल हुने मोर्चा स्रोतले जानकारी दिएको छ । गच्छदार मोर्चाको बैठक सानेपास्थित फोरम लोकतान्त्रिक कार्यालयमा बसिरहेको छ । बैठकपछि ठाकुरसँग भेट गर्ने गच्छदारले बताए ।
मधेसी मोर्चाका अरु नेतामध्ये फोरम अध्यक्ष उपेन्द्र यादव विराटनगरमा, सद्भावना अध्यक्ष राजेन्द्र महतो राजविराज र तमसपा अध्यक्ष महेन्द्र राय यादव सर्लाहीमा छन् ।
