सिरहा दंगाग्रस्त घोषणा, सेना परिचालन
लहान — प्रदर्शनकारी र प्रहरी बिच झडपपछि स्थिति तनावग्रस्त भएपछि जिल्ला प्रशासन कार्यालयले सिरहाको राजमार्ग क्षेत्रमा बिहीबार दिउसो २ बजे देखि लागु हुने गरी अर्को आदेश नहुन्जेलसम्का लागि दंगाग्रस्त क्षेत्र घोषणा गरेको छ ।
सिरहाका प्रमुख जिल्ला अधिकारी मानबहादुर विश्वकर्माले जिल्लाको पूर्वी सिमाना बलान खोलादेखि पश्चिममा कमला नदिसम्म पूर्व पश्चिम राजमार्ग दायाँ बायाँ पाँच सय मिटर आसपासको क्षेत्रमा बिहीबार दिउसो २ बजेदेखि अर्को आदेश नभएसम्मका लागि दंगाग्रस्त क्षेत्र घोषणा रिएको जानकारी दिए । त्यसैगरी नयाा चोहर्वादेखि दक्षिण सिरहा सदरमुकाम लच्का पुलसम्मको सहायक मार्गमा समेत दंगाग्रस्त क्षेत्र घोषणा गरिएको छ । दंगा ग्रस्त घोषणा संगै सिरहामा सेना परिचालन गरिएको छ ।
प्रशासनले आज मध्यान्ह १२ बजेदेखि राजमार्ग र आसपास क्षेत्रलाई निषेधाज्ञा जारी गरेपनि प्रदर्शनकारीले लहान एउटा मालवाहक ट्रक सहित मोटरसाइकल जलाएर प्रदर्शन जारी राखेपछि दंगाग्रस्त क्षेत्र घोषणा गरेको हो । यसैबिच लहानमा प्रदर्शनकारीहरुले बजार क्षेत्रका विभिन्न ठाउमा टायर बालेर प्रदर्शन गरिरहेका छन् ।
प्रकाशित : भाद्र २४, २०७२ १६:००
