विराटनगरका ठाउँ–ठाउँमा झडप
विराटनगर — आन्दोलनकारी र प्रहरीबीच आज पनि विराटनगरका विभिन्न स्थानमा झडप भएको छ । विराटनगर–रानी सडक खण्डअन्तर्गत रोडशेष चोक र मलाया रोडमा झडप भएको हो । त्यसक्रममा प्रदर्शनकारीले एमएम प्लाष्टिक उद्योगका सुरक्षा गार्डको टाउको ढुंगाले हानेर फुटाइदिएको मोरङका प्रहरी प्रवक्ता डिएसपी प्रमोद खरेलले बताए ।
मलाया रोडस्थित स्नातकोत्तर क्याम्पस आसपास क्षेत्रमा पनि दुई पक्षबीच झडप भइरहेको छ । यसैबीच, मोरङका विभिन्न गाउँबाट प्रदर्शनका लागि आन्दोलनकारी दलले कार्यकर्तालाई सदरमुकाम ल्याउने तयारी गरिरहेको खरेलले दाबी गरे ।
आन्दोलनकारी दलमध्येको संघीय समाजवादी फोरमका केन्द्रिय सदस्य जयराम यादवले आन्दोलनकारीलाई आतंकित पार्ने उद्देश्यले प्रहरीले अश्रुग्यास र हवाइ फायर गरेको दाबी गरे । शान्तिपूर्ण प्रदर्शनमा प्रहरीले दमन गरेको उनले आरोप लगाए । मोरङको बुधनगरलगायत दक्षिण क्षेत्र जाने सडकमा आन्दोलनकारीले रुख लडाएर सडक अवरोध गरेको प्रहरी उपरीक्षण तारिणीप्रसाद लम्सालले बताए ।
आन्दोलनकारीले कोसी राजमार्गको विराटनगर ढाट क्षेत्रमा मोटरसाइकल सञ्चालनमा रोक लगाएका छन् । उनीहरुले कोसी राजमार्गका विभिन्न स्थानमा प्रदर्शन गरिरहेका छन् । सुनसरीको दुहबीमा प्रदर्शनकारीले एउटा भ्यानमा आगजनी गरी क्षति पुर्याएका छन् । सुनसरीका दुहबी, इनरुवालगायत स्थानमा पनि आन्दोलनकारीले प्रदर्शन गरिरहेका छन् । मुख्य र सहायक सडकहरुमा रुख ढालेर अनि ठूल्ठूला खाल्डा खनेर अवरोध गरेका छन् ।
यसैबीच, चालकलाई पिटिएको र एम्बुलेन्स तोडफोड गरिएको भन्दै एम्बुलेन्स चालकहरुले मोरङ प्रशासन कार्यालयअघि पुगेर प्रशासनसमक्ष सुरक्षा माग गरेका छन् । बुधबार विराटनगरको रानी, मिल्स एरिया, भन्सार नाका, बुधनगरलगायत स्थानमा दुई पक्षबीच भएको झडपका कारण दिनभरजसो तनाव भएको थियो । आन्दोलनकारीले प्रहरीलाई ढुंगा र पेट्रोल भरिएको बोतल प्रहार गरेका थिए भने प्रहरीले अश्रुग्यास र हवाइ फायर गरेको थियो ।
