आन्दोलनबाट २ अगुवा अलग्गिए
नेपालगन्ज — थरुहट आन्दोलनका नेतृत्वकर्ता आन्दोलनबाट टाढिएका छन्। आन्दोलनका अगुवा चन्द्रबहादुर चौधरी र मधेसी नेता इस्तियाक राई नेतृत्वबाट बाहिरिएका हुन्।
एमाले बाँकेका सचिवालय सदस्य समेत रहेका चौधरीले कोहलपुर र पूर्वश्रममन्त्री राई केही दिनको अन्तरमा नेतृत्व त्यागे। उनीहरू नेतृत्वबाट बाहिरिएपछि आन्दोलनको प्रभाव मत्थर हुँदै गएको छ। लामो र कष्टकर बन्दको अवज्ञा गर्दै बुधबार स्वस्फूर्त ढंगले यातायात सञ्चालनमा आएका छन्। बजार खुलेको छ। एकअर्कामा पीडा साटासाट गर्न र दर खान बुधबार मात्रै नेपालगन्जका महिलाले दुई वटा सार्वजनिक कार्यक्रमहरू गरे। त्यसमा थुप्रैको उत्साहजनक सहभागिता देखियो। स्थानीय प्रशासनले जारी गरेको निषेधाज्ञा कायमै छ। जुलुस र धर्ना बन्द भएका छन्। बजारमा चहलपहल बढेको छ।
सीमांकनप्रति आपत्ति जनाउँदै जारी आन्दोलनको नेतृत्व गर्ने नेताहरू पछि हटेपछि कार्यकर्तामा अन्योलता थपिएको छ। थारू अगुवा चौधरीलाई आन्दोलनबाट पछि हट्न उनको माउ पार्टी एमालेको पनि दबाब थियो। तर, राईले भने प्राविधिक कारणले नेतृत्वको जिम्मेवारी छाडेको बताए।
उनीहरूले नेतृत्व छोड्नुको कारण राजनीतिक घटना क्रम र आन्दोलन हिंसात्मक हुनु हो। तीन दलको संशोधन विधेयकमा संवैधानिक मुस्लिम आयोग र थारू आयोग बनाउने प्रस्ताव छ। मुख्य राजनीतिक दल आबद्ध कतिपय थारू र मधेसी नेताहरूले उक्त प्रस्तावको स्वागत गरेका छन्। एक हदसम्म माग पूरा भएको भन्दै विज्ञप्तिमार्फत नै स्वागत गरेका हुन्। प्रदर्शनकारीको ढुंगा प्रहारबाट गत शुक्रबार कोहलपुर–नेपालगन्ज सडक खण्डको पिप्रहवा चोकमा एक युवाको ज्यान गएपछि नै मतमतान्तर देखिएको एक नेताले बताए।
पछिल्लोपल्ट बुधबार कोहलपुरमा थरुहट आन्दोलनको नेतृत्व गरिरहेका चौधरी पछि हटेका हुन्। पार्टी कार्यालयमा पत्रकार सम्मेलन गरी उनले थरुहट मागलाई सम्बोधन गराउन पार्टीभित्रै अन्तर संघर्ष गर्ने बताए। ‘संवैधानिक थारू आयोग बन्ने प्रस्तावको स्वागत गर्छु,,’ उनले भने, ‘अन्य मागहरू पूरा गराउन पार्टीभित्रै बसेर संघर्ष गर्नेछु। त्यसका लागि काठमाडौं गएर शीर्ष नेताहरूलाई भेट्ने कार्यक्रम समेत तय गरेका छौं।’ साउन २७ गतेदेखि सुरु भएको आन्दोलनको मोर्चा सम्हालेका संयुक्त थरुहट मधेस संघर्ष समितिका संयोजक राई तराईमा आन्दोलन गर्दै आएको संघीय समाजवादी फोरमका केन्द्रीय सदस्य हुन्। ‘म नेतृत्वबाट पछि हटेकै हो तर आन्दोलनबाट पछि हटेको छैन,’ उनले कान्तिपुरसँग भने, ‘घरायसी कामको बोझले संयोजक पद अरू साथीले लिनुभएको छ। आन्दोलनलाई सशक्त बनाउन गाउँगाउँमा प्रशिक्षण दिइरहेको छु।’ उनको अनुपस्थितिमा समितिले विजय गुप्तालाई कार्यवाहक जिम्मेवारी दिएको जनाएको छ।
प्रदेशको सीमांकनप्रति आपत्ति जनाउँदै प्रमुख दलसहितका थारू नेताहरूले थरुहट संघर्ष समिति गठन गरी साउन २७ गतेदेखि आन्दोलनको घोषणा गरेका थिए। माग सम्बोधन नगरिएको भन्दै सरकारलाई दबाब दिन आन्दोलनका कार्यक्रमहरू थपिँदै गएका थिए। आन्दोलनकै क्रममा थरुहट नेताहरूले मोर्चामा आबद्ध मधेसी दलहरूसँग सहकार्य गरी संयुक्त संघर्ष समितिसमेत गठन गरेका थिए।
चौधरीले सडक संघर्ष त्यागेर शान्तिपूर्ण आन्दोलनलाई निरन्तरता दिने घोषणा गरे। एमाले बाँकेले यसअघि नै थारू बाहुल्य पश्चिम कैलाली लगायतका जिल्लाहरू समेटेर प्रदेश ५ मा मिलाउनुपर्ने प्रस्ताव पार्टी केन्द्रमा पठाइसकेको जिल्ला अध्यक्ष अशोक कोइरालाले बताए। बुधबारदेखि एमाले सम्बद्ध थारू नेता तथा कार्यकर्ताको आन्दोलनमा सहभागिता नरहने पनि जारी प्रेस विज्ञप्तिमा उल्लेख गरिएको छ।
एमाले सम्बद्ध नेपाल लोकतान्त्रिक थारू संघले एक कार्यदल गठन गरेको छ। चौधरीको नेतृत्वमा रामचरण थारू र तुलसी थारू सम्मिलित उक्त कार्यदलले काठमाडौं गएर एमाले तथा अन्य पार्टीका शीर्ष नेताहरूलाई आफ्ना माग सम्बोधनका लागि दबाब दिनेछ।
