कान्तिपुर वेबसाईट
AdvertisementAdvertisement
२०.१२°C काठमाडौं
काठमाडौंमा वायुको गुणस्तर: १६४

नेपाली युवतीहरूलाई बन्धक बनाई देह व्यापारमा लगाउने ३ जना पक्राउ 

काठमाडौँ — नेपाली युवतीहरूलाई भारतमा बेचबिखन गरी वेश्यावृत्तिमा लगाएको आरोपमा मानव बेचबिखन अनुसन्धान ब्युरोले तीन जनालाई पक्राउ गरेको छ । प्रहरीका अनुसार पक्राउ पर्नेहरुमा मकवानपुर भिमफेदी–९ की २० वर्षीया सेन्जी भनिने सम्झना तामाङ, धादिङ धुनिबेंशी नगरपालिका–२ का २५ वर्षीय भुवन तामाङ र उनकी श्रीमती २० वर्षीया सुष्मा मगराती छन् । 

ब्युरोका प्रवक्ता एसपी कृष्णप्रसाद पंगेनीका अनुसार उनीहरूले काठमाडौं माछापोखरी, बसपार्कलगायतका स्थानहरुमा मनोरञ्जन क्षेत्रमा काम गर्ने युवतीहरुलाई सम्पर्क गरी प्रलोभनमा पारेर नेपालगञ्ज हुँदै जमुनाहा नाका पार गराएर भारतको दिल्ली पुर्‍याई जबरजस्ती वेश्यावृत्तिमा लगाएको पाइएको छ ।

उनीहरूले होटल, रेस्टुरेन्ट, फेन्सी पसलमा आकर्षक तलबको काम लगाइदिने भनि प्रलोभनमा पारी दिल्ली पुर्‍याई बन्धक बनाई जबरजस्ती वेश्यावृत्तिमा लगाएको भन्ने गोप्य सूचनाको आधारमा ब्युरोले भारतस्थित नेपाली दूतावास र सामाजिक संस्था कीन इन्डियासँग सहकार्य गरी ९ जना पीडितको उद्धार गरेको एसपी पंगेनीले बताए । उनीहरूलाई चैत ७ गते काठमाडौं ल्याइएको हो । उद्धार गरिएको पीडित युवतीहरुलाई सामाजिक संस्थाको संरक्षणमा राखिएको ब्युरोले जनाएको छ ।।

गत असोजदेखि फागुनसम्ममा ती ९ जना पीडित युवतीहरुलाई दिल्ली पुर्‍याएका थिए । केही पीडितलाई भने गाडीमा समेत लगिएको अनुसन्धानबाट खुलेको एसपी पंगेनीले जानकारी दिए । दिल्ली पुगेपछि उनीहरूले मोबाइल र भारतीय नम्बर पनि उपलब्ध गराई फेसबुक आईडी समेत खोलिदिएर फेसबुकको पासवर्ड समेत आफैले राखी निगरानी गर्ने गरेको समेत अनुसन्धानमा खुलेको ब्यूरो प्रमख एसएसपी जीवन कुमार श्रेष्ठले बताए । त्यसैगरी, पीडित युवतीहरुलाई दिल्ली किशनगढस्थित पन्जाबीढावा भन्ने स्थानमा भाडामा लिएको फ्ल्याटमा सिसिटिभीको निगरानीमा राखिएको थियो ।

ग्राहकलाई हृवाट्सएप मार्फत युवतीहरूको फोटो पठाउने र छनोटमा परेका युवतीलाई वेश्यागमनमा आउने व्यक्तिहरुले भनेको होटल, घरहरुमा ट्याक्सी बुक गरी पुर्‍याईदिने गरेको समेत अनुसन्धानमा खुलेको छ । चिनजानकै विश्वासिला ट्याक्सी ड्राइभरमार्फत ग्राहकले भनेको ठाउँमा युवतीहरुलाई पुराउने व्यवस्था समेत गरेको पाइएको छ ।

प्रहरीका अनुसार एक जना युवतीले एक महिनामा कम्तीमा १८० जनासँग शारीरिक सम्पर्क गर्नुपर्ने दबाब थियो । गिरोहले पीडित युवतीहरूलाई दिल्लीबाहेक अन्य सहरहरूमा समेत पठाउने गरेको पाइएको छ । उनीहरूविरुद्ध ब्युरोले काठमाडौं जिल्ला अदालतबाट ७ दिनको म्याद थप लिई अनुसन्धान थालेको जनाएको छ ।

सम्बन्धित समाचार

प्रकाशित : चैत्र १४, २०७९ ११:२२
प्रतिक्रिया
पठाउनुहोस्
जनताको राय

बैंकमा लगानीयोग्य रकम थुप्रिएर साढे ६ खर्ब नाघेको छ। बैंकहरूले ब्याजदर घटाउँदासमेत कर्जा प्रवाह बढ्न नसक्नुको कारण के हो?