कान्तिपुर वेबसाईट
AdvertisementAdvertisement
२२.१२°C काठमाडौं
काठमाडौंमा वायुको गुणस्तर: १५२

सूर्यविनायक-धुलिखेल ६ लेन विस्तार सुरु

लिला श्रेष्ठ

काठमाडौँ — अरनिको राजमार्ग सडकखण्डअन्तर्गत भक्तपुर सूर्यविनायकदेखि काभ्रेपलाञ्चोक धुलिखेलसम्मको १५.८ किलोमिटर सडक विस्तारको काम सुरु भएको छ । ‘सूर्यविनायक–धुलिखेल, धुलिखेल– सिन्धुली–बर्दिबास सडक आयोजना’ का अनुसार सूर्यविनायकदेखि धुलिखेलसम्म दुई खण्डमा विस्तार गर्ने गरी ठेक्का सम्झौता भएको छ ।

सूर्यविनायक-धुलिखेल ६ लेन विस्तार सुरु

सूर्यविनायक–साँगा र साँगा–धुलिखेलको सडकखण्ड विस्तार गर्न छुट्टाछुट्टै सम्झौता भएको छ । जसअन्तर्गत, पहिलो खण्डमा साँगादेखि धुलिखेलसम्मको ८.३ किलोमिटर सडक विस्तारको जिम्मा लामा कन्स्ट्रसन कम्पनीले पाएको छ । उक्त सडक खण्डको विस्तारका लागि २०२२ डिसेम्बर १३ मा सम्झौता भएको हो । सडक विस्तार ३ वर्षभित्र सम्पन्न गर्ने गरी निर्माण कम्पनीसँग सम्झौता भएको आयोजनाकी सूचना अधिकारी इन्जिनियर राधिका प्रजापतिले बताइन् । साँगा–धुलिखेलसम्मको सडक ४ अर्ब ५ करोड ६४ लाख रुपैयाँ लागत छ ।

त्यस्तै, सूर्यविनायक–धुलिखेल सडक विस्तारको दोस्रो खण्डअन्तर्गत सूर्यविनायकदेखि साँगासम्मको ७.५ किलोमिटर सडक विस्तारको जिम्मा आशिषकुमार श्रेष्ठ, बन्दन भगवती जेभीले पाएको छ । उक्त सडकखण्ड सडक विस्तारका लागि सन् २०२३ जनवरी ८ मा सम्झौता भएको हो भने सम्झौता भएको मितिले ३ वर्षमा सम्पन्न गर्ने लक्ष्य छ । सूर्यविनवायक–साँगासम्मको सडक विस्तारका लागि भ्याटसहित ३ अर्ब ८८ करोड ९३ लाख रुपैयाँमा ठेक्का सम्झौता भई काम सुरु भएको आयोजनाले जनाएको छ ।

अरनिको राजमार्ग सडक खण्डअन्तर्गत कोटेश्वर–सूर्यविनायक सडकखण्ड ६ लेन सडक विस्तार भएपछि पूर्वी भेगतर्फको सवारी चाप बढ्दो छ । सूर्यविनायक ६ लेन सकिनेबित्तिकै जाम सुरु हुन्छ । सोही सवारी जामको समस्या समाधानका लागि आयोजनाले सडक विस्तारको काम थालेको हो । सूर्यविनायकदेखि धुलिखेलसम्म निर्माण गर्नुपर्ने पुलका लागि भने छुट्टै ठेक्का आह्वान गरिने आयोजनाको भनाइ छ ।

यसका लागि विस्तृत अध्ययन प्रतिवेदन (डीपीआर) मा केही परिवर्तन हुँदा थप पुल निर्माण गर्न आवश्यक पर्ने भएकाले बजेट बढ्ने देखिएको छ । आयोजना प्रमुख रवीन्द्र दासका अनुसार सडक विस्तारको प्रक्रियासँगै राजमार्गको मापदण्डअनुसार हाल भवन तथा जग्गाको लगत संकलन सुरु गरिएको र सडकको बीचबाट दायाँबायाँ २५ मिटरको मापदण्डअनुसार कार्यालयले राजमार्गअन्तर्गत पर्ने चार वटा नगरलाई सहयोगका लागि पत्राचार गरिएको छ ।

सूर्यविनायक–धुलिखेल सडकखण्डमध्ये बनेपा नगरपालिकाको साँगादेखि बनेपा बजारनजिकको चण्डेश्वरी खोलासम्म ४.६ किलोमिटर सडकको केन्द्रबिन्दुबाट दायाँबायाँ २५ गज अर्थात्, २२.८६ मिटर कायम हुनेछ । सूर्यविनायक–साँगा सडकखण्डभित्र पर्ने मापदण्डभित्रको संरचना सूर्यविनायक नगरपालिका–८ का वाग्मती प्रदेशसभा सदस्य किरण थापाको नेतृत्वमा ट्र्याक खुलाएको छ । उक्त सडक खण्डमा ४ लेन मुख्य सडक र दुई लेन फुटपाथसहितको सर्भिस ट्र्याक निर्माणको लक्ष्य आयोजनाको छ ।

प्रकाशित : चैत्र १०, २०७९ ०८:०४
प्रतिक्रिया
पठाउनुहोस्
जनताको राय

मन्त्रीहरुले आफ्ना र दलका शीर्ष नेताका निर्वाचन क्षेत्र केन्द्रित गरी विनियोजित बजेटमा सांसदहरूले संसद्मा गरेको विरोधबारे तपाईंको धारणा के छ ?

x