काठमाडौँ — अमेरिकी राजदूतावासको सहयोगमा जेभियर इन्टरनेशनल कलेजले बिहीबार शैक्षिक मेलाको आयोजना गरेको छ । बिहीबार दिउँसो कलेजको प्राङ्गणमा २० वटा अमेरिकी विश्वविद्यालयका प्रतिनिधिले नेपाली छात्रछात्रालाई परामर्श दिएका थिए ।

अमेरिकाका विभिन्न स्टेटमा रहेका विश्वविद्यालयले स्नातक, स्नातकोत्तर र विद्यावारिधी गर्नका लागि आवश्यक प्रक्रिया, शुल्क, छात्रवृत्ती, आवश्यक शैक्षिक योग्यता लगायतका सूचना, जानकारी र सल्लाह अमेरिकाबाट आएका विश्वविद्यालयका प्रतिनिधिले दिएका थिए ।

जेभियर इन्टरनेशनल कलेजका प्रिन्सिपल दीपेन दाहालका अनुसार मेलामा कक्षा ११ र १२ र ए लेभल कोर्ष लिएर फाइदा लिन सक्ने बताए । उनले अहिलेको युवापुस्ताले विदेशमा गएर उच्च शिक्षा हासिल गरेर त्यहाँ लिएका ज्ञान र सिप नेपालमा कार्यान्वयन गर्न सकुन् भन्ने पनि मेलाको उद्देश्य भएको बताए । यस्तै यो मेलाले विदेशमा गएर राम्रो उच्च शिक्षा हासिल गरेर नेपालमै केही गरुँ भन्ने विद्यार्थीको लागि उपयोगी भएको ए लेभल पढ्दै गरेकी छात्रा अक्षता राज्यलक्ष्मी शाहले बताइन् ।

उनले यस्ता मेलाले विद्यार्थीले कुन विश्वविद्यालयमा कस्तो अध्यापन र कस्तो सुविधा अनि कस्ता विषयमा पढाइ हुन्छ भन्ने जानकारी दिने बताइन् । उनले भनिन्, '१/१२ वा एलेभल पढिरहेका स्टुडेन्टले युनिभर्सिटीकाबारे जानकारी लिन सक्ने रहेछन् । जसले गर्दा पढाइको अवसर खोजिरहेका विद्यार्थीलाई उपयोगी हुन्छ ।' अमेरिकी राजदूतावासले नेपालभरी रहेका कलेजमध्येबाट जेभियर इन्टरनेशनल कलेजलाई मेला आयोजना गर्न छनोट गरेको थियो ।