काठमाडौंमा नयाँ अनुहारको हस्तक्षेप- उपत्यका - कान्तिपुर समाचार

काठमाडौंमा नयाँ अनुहारको हस्तक्षेप

कांग्रेसले ५ र एमालेले १ क्षेत्रमा जित्दा पहिलो पटक निर्वाचन लडेको रास्वपा ४ क्षेत्रमा विजयी
सुदीप कैनी

काठमाडौँ — काठमाडौंका १० वटै निर्वाचन क्षेत्रको प्रतिनिधिसभाको मतगणना सकिएको छ । निर्वाचन आयोगका अनुसार काठमाडौंका ५ वटा क्षेत्रमा कांग्रेस, ४ वटामा राष्ट्रिय स्वतन्त्र पार्टी र एउटामा एमालेका उम्मेदवार विजयी भएका छन् ।

काठमाडौं–१ मा प्रकाशमान सिंह, ३ मा सन्तोष चालिसे, ४ मा गगनकुमार थापा, ५ मा प्रदीप पौडेल र १० मा राजेन्द्रकुमार केसी कांग्रेसबाट निर्वाचित भएका छन् । त्यस्तै काठमाडौं–२, ६, ७, ८ मा क्रमश: स्वतन्त्र पार्टीका सोविता गौतम, शिशिर खनाल, गणेश पराजुली र विराजभक्त श्रेष्ठ निर्वाचित भएका हुन् । नेकपा एमालेका उम्मेदवार कृष्णगोपाल श्रेष्ठ क्षेत्र नम्बर ९ बाट विजयी भए । २०७४ को निर्वाचनमा काठमाडौंका ६ वटा क्षेत्रमा एमाले उम्मेदवार विजयी भएका थिए । तत्कालीन वाम गठबन्धनका कारण कांग्रेसले ४ वटा क्षेत्रमा मात्रै जित हासिल गरेको थियो । त्यतिबेला १ देखि १० क्षेत्रमा क्रमश: प्रकाशमान सिंह, माधवकुमार नेपाल, कृष्ण राई, गगनकुमार थापा, ईश्वर पोखरेल भीमसेनदास प्रधान, रामवीर मानन्धर, जीवनराम श्रेष्ठ, कृष्णगोपाल श्रेष्ठ र राजेन्द्र केसी निर्वाचित भएका थिए । नेपाल, राई, पोखरेल, मानन्धर, जीवनराम र कृष्णगोपाल एमालेबाट र सिंह, थापा, प्रधान र केसी कांग्रेसबाट विजयी भएका थिए । यस पटकको निर्वाचनमा तीमध्ये सिंह, थापा, कृष्णगोपाल श्रेष्ठ र केसी पुन: निर्वाचित भएका हुन् ।

काठमाडौं–१ मा सिंहले राप्रपाका उम्मेदवार रवीन्द्र मिश्रलाई पराजित गरेका हुन् । सिंह ७ हजार १ सय ४३ मतसहित विजयी बने । मिश्रले ७ हजार १८ मत प्राप्त गरे । क्षेत्र नम्बर २ मा राष्ट्रिय स्वतन्त्र पार्टीकी गौतमले एमाले उम्मेदवार मणिराम फुँयाललाई हराएकी छन् । उनले १५ हजार २ सय २९ मत प्राप्त गर्दा फुँयालले ११ हजार ५ सय ५५ मत प्राप्त गरेका छन् । पूर्वसांसद राईलाई हराउँदै क्षेत्र नम्बर ३ मा सन्तोष चालिसे विजयी भए । चालिसेले १५ हजार १ सय ५८ मत प्राप्त गर्दा राईले ११ हजार १ सय ९६ मत ल्याएका छन् ।

क्षेत्र नम्बर ४ मा गगन थापाले २०७४ कै प्रतिस्पर्धी राजन भट्टराईलाई हराएका हुन् । थापाले २१ हजार ३ सय २ मत प्राप्त गर्दा भट्टराईले १३ हजार ८ सय ५५ मत प्राप्त गरे । क्षेत्र नम्बर ५ मा प्रदीप पौडेल एमाले नेता ईश्वर पोखरेललाई हराउन सफल भए । उनले १५ हजार २ सय ३७ मत ल्याउँदा पोखरेलले १० हजार १ सय ७५ मत ल्याए ।

काठमाडौं–६ मा एमाले उम्मेदवार एवं पूर्वप्रहरी महानिरीक्षक सर्वेन्द्र खनाललाई हराउँदै स्वतन्त्र पार्टीका शिशिर खनाल विजयी बनेका हुन् । शिशिरले १४ हजार २ सय ४ मत प्राप्त गर्दा सर्वेन्द्रले ८ हजार ९ सय ११ मत मात्रै प्राप्त गरे । उक्त क्षेत्रका पूर्वसांसद प्रधानले ८ हजार ८ सय ५ मत मात्रै प्राप्त गरेका छन् । क्षेत्र नम्बर ७ मा पनि स्वतन्त्र पार्टीले जित निकालेको छ । पराजुलीले ८ हजार ७ सय ४३ मत प्राप्त गरेका छन् भने उनका निकटतम प्रतिस्पर्धी एमाले उम्मेदवार श्यामकुमार घिमिरेले ६ हजार ८ सय मत ल्याएका छन् । उक्त क्षेत्रमा सत्ता गठबन्धनकी उम्मेदवार मानुषी यमी भट्टराईले ६ हजार ६३ मत मात्रै पाएकी छन् । स्वतन्त्र उम्मेदवारी दिएका पूर्वसांसद मानन्धरले ७ सय ५३ मत मात्रै प्राप्त गरे ।

क्षेत्र नम्बर ८ मा हाम्रो नेपाली पार्टीका सुमन सायमीलाई करिब दोब्बर मतान्तरले पराजित गर्दै विराजभक्तले जित निकालेका हुन् । उक्त निर्वाचन क्षेत्रमा सत्ता गठबन्धनका उम्मेदवार तेस्रो र एमाले उम्मेदवार चौथो भएका छन् । उक्त क्षेत्रका पूर्वसांसद जीवनरामले ४ हजार ८ सय ७७ मत मात्रै ल्याए । उनी सत्ता गठबन्धनतर्फका उम्मेदवार थिए । काठमाडौं ९ मा एमाले उम्मेदवार तथा पूर्व सांसद श्रेष्ठ ११ हजार ९ सय ५६ मत सहित विजयी भएका हुन् । उनका प्रतिस्पर्धी स्वतन्त्र पार्टीका टेकबहादुर पोखरेलले १० हजार ९ सय ६१ मत प्राप्त पाएका छन् । काठमाडौं १० मा भने एमाले उम्मेदवार हिमेश केसीलाई पराजित गर्दै राजेन्द्र केसी विजयी बनेका छन् । उनले १४ हजार ४ सय ४८ मत प्राप्त गर्दा हिमेशले ११ हजार ७ सय ८६ मत प्राप्त गरेका छन् ।

माओवादी केन्द्रले सत्ता गठबन्धनको तर्फबाट काठमाडौं २, ७, ९ र १० मा उम्मेदवारी दिएको थियो । यी ४ वटै क्षेत्रमा माओवादी केन्द्रका उम्मेदवार तेस्रो र चौथो भएका छन् । २ मा ओनसरी घर्ती, ७ मा यमी भट्टराई, ९ मा कल्पना धमला र १० मा अञ्जना बिशंखेले उम्मेदवारी दिएका थिए । २०७४ को प्रतिनिधिसभामा वाम गठबन्धन गर्दासमेत माओवादी उम्मेदवार काठमाडौंमा पराजित भएका थिए ।

प्रकाशित : मंसिर ८, २०७९ ०६:४१
प्रतिक्रिया
पठाउनुहोस्

रुपन्देही-५ मा एमालेका वासुदेव घिमिरे विजयी

 औपचारिक घोषणा हुन बाँकी
अमृता अनमोल

बुटवल — रुपन्देहीको क्षेत्र नम्बर ५ मा एमालेका वासुदेव घिमिरे निर्वाचित भएका छन् । निर्वाचन आयोगले मतपरिणामको औपचारिक घोषणा गर्न भने बाँकी छ । मुख्य निर्वाचन अधिकृत चिन्तामणि शर्माले प्रक्रिया मिलाउने क्रममा रहेकाले केहीबेरमा औपचारिक घोषणा गर्ने बताए । 

अन्तिम मतपरिणाममा एमाले उम्मेदवार घिमिरेले ३६ हजार ८ सय २२ मत ल्याएका छन् । उनका निकटतम प्रतिनिधि नेपाली कांग्रेसका भरतकुमार शाहले २७ हजार १ सय २० मत ल्याएका छन् । घिमिरे यसअघि तिलोत्तमा नगरपालिका प्रमुख बनेर नमुना काम गरेको भनी पटक-पटक पुरस्कृत भएका थिए ।

कांग्रेसका निर्वतमान सांसद शाह २०५६ सालदेखि यस क्षेत्रमा उम्मेदवार बनेर २०७० बाहेक अरु चुनावमा जितेका थिए । उनी पूर्वअर्थमन्त्री तथा संसदीय लेखा समिति सभापति हुन् ।

प्रकाशित : मंसिर ८, २०७९ ०६:३९
पूरा पढ्नुहोस्
प्रतिक्रिया
पठाउनुहोस्
×