३०.१२°C काठमाडौं
भक्तपुरमा आगलागी हुँदा २५ वर्षे युवतीको जलेर मृत्यु
भक्तपुर — भक्तपुरको मध्यपुर थिमि नगरपालिका–६, राईटोलमा बुधबार बिहान आगलागी हुँदा २५ वर्षे युवतीको जलेर मृत्यु भएको छ । माथिल्लो कुण्डोलस्थित आत्माराम केसीको इँटा र काठले बनेको जस्ताको छानो भएको तीन तले कच्ची घरमा बिहान पौने ८ बजे अचानक आगलागी सुरु भएको थियो ।
आगलागीमा परी केसीकी २५ वर्षीया छोरी अस्मिता केसीको जलेर मृत्यु भएको जिल्ला प्रहरी परिसर भक्तपुरका डीएसपी राजु पाण्डेले जानकारी दिए । उनी बौद्धिक अपांग हुनुका साथै र प्यारालाइसिसबाट ग्रसित थिइन् ।
आगलागी भएको खबर पाउने बित्तिकै घटनास्थलमा प्रहरी पुगेको थियो । भक्तपुरबाट गएका दुईवटा दमकल, नेपाल प्रहरी, नेपाली सेना र सशस्त्र प्रहरी र स्थानीयले करिब नौ बजे आगो नियन्त्रणमा लिएका थिए । आगलागीमा परी केसीकी १४ वर्षे छोरी नित्मा केसी घाइते भएकी छिन् ।
उनको उद्धार गरी कोरियन अस्पतालमा प्राथमिक उपचारपछि डिस्चार्ज गरिएको छ । घटनाको क्षतिको पूर्ण विवरण आउन बाँकी रहेको र थप अनुसन्धान भइरहेको प्रहरीले जनाएको छ।
प्रकाशित : कार्तिक ३०, २०७९ ११:०७
