काठमाडौं उपत्यका छाड्ने बढ्दै, कुन दिन कति बाहिरिए ?- उपत्यका - कान्तिपुर समाचार

काठमाडौं उपत्यका छाड्ने बढ्दै, कुन दिन कति बाहिरिए ?

रासस

काठमाडौँ — हिन्दूको महान् पर्व दसैंको मुख्य दिन नजिकिएसँगै काठमाडौं उपत्यका छाड्ने नेपालीको सङ्ख्या दिनदिनै बढ्दो छ । अन्य समयमा शनिबार प्रायः खाली हुने काठमाडौंका सडकमा आज भने सवारी साधनको बाक्लो उपस्थिति छ । 

पोका/पुन्तुरा बोकेर मानिस उपत्यका छाड्न हतारिएका दृश्य विभिन्न क्षेत्रमा देख्न सकिन्छ । टिकट काटेकाहरु सवारीसाधन कुरिरहेका देखिए भने टिकट नकाट्ने यात्रु सिट खाली रहेका सवारी साधनको प्रतिक्षा गरिरहेका भेटिए । सिट नपाएका ट्रक तथा अन्य सवारी साधनमा समेत गइरहेका थिए । पश्चिम नेपाल जान कलंकी पुगेकी निर्मला शर्मा टिकट नपाइएकाले सिट खाली भएको गाडीको प्रतीक्षा गरिरहेको बताइन् ।

काठमाडौं उपत्यका ट्राफिक प्रहरी कार्यालयका अनुसार दसैं सुरु भएपछि घटस्थापनादेखि क्रमशः बाहिरिने यात्रुको चाप बढिरहेको छ । त्यसदिन ६० हजार यात्रुले उपत्यका छाडेका थिए । बिहीबार ७१ हजार सात सय यात्रुले उपत्यका छाडेकामा शुक्रबार उपत्यका छाड्नेको सङ्ख्या ८४ हजार रह्यो । आज भने त्यसको तुलनामा दोब्बर (दुई लाख) बढीले उपत्यका छाड्ने अनुमान गरिएको कार्यालयका सहप्रवक्ता प्रहरी उपरीक्षक अवदेश विष्ट क्षेत्रीले जानकारी दिए ।

आज साँझसम्म झण्डै पाँच लाख मानिसले उपत्यका छाडेने उनको अनुमान थियो । काठमाडौं उपत्यका ट्राफिक प्रहरी कार्यालयका अनुसार प्रहरीको अभिलेखभन्दा बाहिर रिजर्व गरेर विभिन्न नाका हुँदै जाने र निजी सवारीमा जानेको सङ्ख्या यकीन नभएकाले उपत्यका छाड्ने सङ्ख्या त्यसको दोब्बर हुनसक्ने अनुमान छ ।

यही असोज १० गतेदेखि १४ गते शुक्रबारसम्म कूल तीन लाख ५३ हजार ४८५ बाहिरिएका छन् आज भने झण्डै दुई लाख बाहिरिने अनुमान गरिएको छ । प्रहरीका अनुसार कूल ५० हजार सवारी साधनमा उनीहरु यसरी बाहिरिएका हुन् ।आजदेखि दसैं बिदा भएकाले आज भने सडकमा अत्यधिक भीड रहेको र विभिन्न नाका तथा बसपार्क क्षेत्रमा उपत्यका छाड्ने यात्रुको बाक्लो उपस्थिति रहेको प्रहरी उपरीक्षक क्षेत्रीको भनाइ थियो ।

कुन दिन कति यात्रु भित्रिए कति बाहिरिए ?

ट्राफिक प्रहरीका अनुसार असोज १० गते आठ हजार सात सय २९ वटा सवारी साधानमा ४५ हजार आठ सय २३ यात्रु भित्रिएका थिए भने आठ हजार नौ सय चार सवारी साधनमा ६० हजार आठ सय ४१ यात्रु बाहिरिएका थिए ।

असोज ११ गते आठ हजार चार सय २७ सवारी साधानबाट ४५ हजार ३३ यात्रु भित्रिएका मा नौ हजार एक सय ६१ सवारी साधनबाट ६२ हजार चार सय ३२ यात्रु बाहिरिएको अभिलेख छ ।

यस्तै असोज १२ गते आठ हजार नौ सवारी साधनबाट ४५ हजार दुई सय ६० यात्रु भित्रिएकामा १० हजार ८६ सवारी साधनबाट ७१ हजार ७६३ यात्रु बाहिरिएका थिए । यस्तै असोज १३ गते आठ हजार २३ सवारी साधन मार्फत सोही हाराहारीमा यात्रु भित्रिएकामा १० हजार दुई सय १९ सवारी साधनमार्फत ७४ हजार तीन सय ६२ यात्रु बाहिरिए ।

असोज १४ गते शुक्रबार भने सात हजार ४६० सवारीमार्फत ३७ हजार तीन सय ४० यात्रु भित्रिँदा १० हजार दुई सय ६७ सवारी साधनमार्फत ८४ हजार ८७ यात्रु बाहिरिएको तथ्याङ्क छ । यो प्रहरीले अभिलेख गरेको सार्वजनिक सवारी साधनमार्फत यात्रु भित्रिएका र बाहिरिएकाको विवरण हो । यसबाहेक पनि मोटरसाइकल तथा अन्य निजी सवारी साधनमार्फत बाहिरिने यात्रुको सङ्ख्या ठूलो रहेको ट्रापिक प्रहरीले जनाएको छ ।


प्रकाशित : आश्विन १५, २०७९ १८:०८
प्रतिक्रिया
पठाउनुहोस्

गोरखामा मुख्य निर्वाचन अधिकृतको कार्यालय स्थापना

हरिराम उप्रेती

गोरखा — प्रतिनिधिसभा र प्रदेशसभाको आसन्न निर्वाचनका लागि मुख्य निर्वाचत अधिकृतको कार्यालय स्थापना गरिएको छ । जिल्ला समन्वय समितिको भवनमा शनिबार मुख्य निर्वाचन अखधिकृतको कार्यालय र प्रतिनिधिसभा निर्वाचन क्षेत्र नम्बर १ को कार्यालय स्थापना गरिएको हो ।

प्रतिनिधिसभा निर्वाचन क्षेत्र नम्बर २ को गोरखा नगरपालिका–९ स्थित दलभञ्याङको भू तथा जलाधार व्यवस्थापन कार्यालय गोरखामा कार्यालय स्थापना गरिएको छ ।

मुख्य निर्वाचन अधिकृत तथा प्रतिनिधिसभा निर्वाचन क्षेत्र नम्बर १ को अधिकृतमा जिल्ला न्यायाधीश तेजेन्द्रप्रसाद शर्माले जिम्मेवारी पाएका छन् ।

प्रतिनिधिसभा निर्वाचन क्षेत्र नम्बर २ मा विशेष अदालत काठमाडौंका उपसचिव नारदप्रसाद भट्टराईले निर्वाचन अधिकृतको जिम्मेवारी पाएका छन् । शनिबार कार्यालय स्थापनासँगै निर्वाचन आचार संहिता र उम्मेदवारको मनोनयन पत्र दर्ता्सम्बन्धी जानकारी पनि गराइएको छ ।

निर्वाचन कार्यतालिकाअनुसार असोज २३ गते उम्मेदवारको मनोनयन पत्र दर्ताको कार्यसूची छ । उम्मेदवारी दर्ताको दिन नजिकिएसँगै जिल्लामा निर्वाचन तयारी तीव्र पारिएको छ ।

प्रकाशित : आश्विन १५, २०७९ १७:५८
पूरा पढ्नुहोस्
प्रतिक्रिया
पठाउनुहोस्
×