बजार अनुगमनमा महानगरको टोली- उपत्यका - कान्तिपुर समाचार
कान्तिपुर वेबसाईट
AdvertisementAdvertisement

बजार अनुगमनमा महानगरको टोली

संगम स्वीट्समा पनि भेटियो अखाद्य तेल
आफू ठगिएको शंका लागे १६६००१०५५११ नम्बरको टोल फ्रि नम्बरमा पनि सम्पर्क गर्न महानगरको आग्रह 
कान्तिपुर संवाददाता

काठमाडौँ — काठमाडौं महानगरपालिकाको बजार अनुगमनका क्रममा संगम स्वीट्सको भान्सामा अखाद्य तेल भेटिएको छ । महानगरको बजार व्यवस्थापन तथा उपभोक्ता हित संरक्षण समितिकी संयोजक एवं उपप्रमुख सुनिता डंगोल नेतृत्वको अनुगमन टोलीले कालीमाटी क्षेत्रका खाद्य पसलहरू अनुगमन गर्ने क्रममा संगम स्वीट्सको भान्सामा अखाद्य तेल भेटिएको महानगरले जनाएको छ ।

मिठाइ बनाउँदै गरिएको तेल अखाद्य भेटिएकोले त्यसलाई नष्ट गरिएको थियो । यस्तै, डीएण्डडी खाद्य सप्लायर्सबाट पनि अखाद्य सामग्रीहरू अनुगमन टोलीले बरामद गरेको छ ।

सप्लायर्सबाट ७७ बोरा/प्याकेट र अमन खाद्य किराना पसलबाट ४ बोरा / प्याकेट अखाद्य वस्तु बरामद गरेको थियो । सप्लायर्सलाई एप्पल ब्राण्डका १० बोरा चामल बिक्री गर्न रोक लगाइएको उपमेयर डंगोलको सचिवालयले जनाएको छ ।

सप्लायर्सबाट बरामद गरिएका खाद्य सामग्रीहरूमा १० केजीका ६ बोरा र ५ केजीको १ बोरा मस्यौरा, २५ किलो तौलका ४९ बोरा र ६ बोरा लङ्ग्रेन चामल छन् । त्यस्तै १२ लिटरको एक कार्टुनमा प्याक गरिएका ९ कार्टुन तेल, २५ किलो तौल भएका २ बोरा चना, ५ कार्टुन साबुन बरामद गरिएको हो ।

अनुगमनमा खाद्य र मिठाइ गरेर सातवटा पसल हेरिएको थियो । उपप्रमुख डंगोलले भनिन्, ‘कतै थाहा नभएर त कतै लापर्वाही गरेर व्यापार गरेको देखियो । व्यापारी र उपभोक्ता दुवैलाई स्वच्छ बजार सम्बन्धी आधारभूत कानुनी ज्ञानको आवश्यकता देखियो ।’

स्वच्छ बजार निर्माणका लागि काठमाडौं महानगरपालिकाले आफ्नो क्षेत्रभित्र गर्नुपर्ने दायित्व र निकायगत समन्वयलाई प्राथमिकता दिएर काम गर्ने उनले बताइन् ।

स्थानीय वस्तु तथा सेवा र स्वच्छ बजारका लागि काठमाडौं महानगरपालिकाले ‘काठमाडौ महानगरपालिका बजार व्यवस्थापन तथा अनुगमन ऐन, २०७७’ राजपत्रमा जारी गरिसकेको छ । ऐनबमोजिम महानगर आफैंले निरीक्षण अधिकृत तोकेर अनुगमनका माध्यमबाट अनुचित व्यापारिक क्रियाकलाप रोक्न सक्छ ।

अनुगमनमा महानगरको अनुगमन तथा मूल्याङ्कन एकाइ, स्वास्थ्य विभाग, पशु स्वास्थ्य महाशाखा, नगर प्रहरी बलका अधिकारीहरूको सहभागिता थियो ।

आफू ठगिएको शंका लागे महानगरलाई नि:शुल्क टोल फ्रि नम्बरमा पनि सम्पर्क गर्न आग्रह गरेको छ । महानगरले १६६००१ ०५५११ र ११८० गरेर टोल फ्री नम्बर सञ्चालनमा ल्याएको छ ।

प्रकाशित : आश्विन १२, २०७९ २१:५५
प्रतिक्रिया
पठाउनुहोस्

‘हामी भित्र लड्दैछौं, बाहिर तपाइँहरू संघर्ष गर्नुस्’

कान्तिपुर संवाददाता

काठमाडौँ — आगामी मंसिर ४ गते हुने निर्वाचनका लागि न्यायोचित ढंगले टिकट वितरण हुनुपर्ने भन्दै नेपाली कांग्रेसमा संघर्ष गरिरहेका नेताहरूले बुधबार नेता शेखर कोइराला र महामन्त्री गगन थापासँग छलफल गरेका छन् ।

दिउँसो सानेपास्थित कांग्रेस मूख्यालयमा धर्ना दिएर फर्किएका नेताहरूले अपराह्न नेता कोइराला र महामन्त्री थापालाई भेटेर पार्टीभित्र समान अवसर र न्यायोचित रुपमा टिकट वितरणका लागि सशक्त अडानसहित भूमिका निभाउन आग्रह गरेका हुन् ।

नेता कोइराला तथा महामन्त्री थापा र सहमहामन्त्री बद्री पाण्डेले नेताहरू गुरुराज घिमिरे, जगदिश्वरनरसिंह केसी, भुपेन्द्रजंग शाहीसहित संघर्षमा रहेका नेताहरूसँग अलग–अलग छलफल गरेका थिए । यस क्रममा नेता कोइरालाले पार्टीभित्र समान रुपमा अवसरको वितरण गर्ने विषयमा आफूले सभापति शेरबहादुर देउवालाई विगतदेखि भन्दै आएको र टिकट वितरणको विषयमा पनि सोही कुरा आग्रह गरेको बताएका थिए ।

महामन्त्री थापाले भने आफूले पदाधिकारीभित्र संघर्ष गरिरहेको भन्दै बाहिरबाट संघर्ष जारी राख्न आह्वान गरेका छन् । ‘हामी भित्र संघर्ष गरिरहेका छौं । बाहिर तपाइँहरूले जुन संघर्ष गरिरहनुभएको छ, त्यसलाई निरन्तर गर्नुस्,’ थापाको भनाइ उदृत गर्दै एक नेताले इकान्तिपुरसँग भने, ‘समानुपातिकको बन्द सूची बनाउने निर्णय प्रक्रियामा हाम्रो सहमति थिएन, जुन सूची छ, बाहिर तपाइँहरूको आन्दोलन र संघर्षका कारण अहिले सभापतिजी सच्याउन तयार हुनुभएको छ । त्यो सच्याइनुपर्छ ।’

महामन्त्री थापाले प्रत्यक्षतर्फको उम्मेदवार चयनमा समेत पार्टीले सबै ढंगले सक्षम र योग्य उम्मेदवारहरूलाई न्यायोचित रुपमा टिकट वितरण हुनुपर्ने विषयमा आफूहरू संघर्ष गरिरहेको बताएका थिए ।

कोइराला समूहले समानुपातिकतर्फको बन्द सूचीमा आफ्नो समूहका नेताहरूको नाम समावेश नगरिएको, गरिएकाहरूको नाम पनि निर्वाचित हुने गरी समावेश नगरिएको र सभापति देउवाले एकलौटी रुपमा आफ्नो समूहका नेताहरूको मात्रै नाम राखेको आरोप लगाउँदै आएको छ ।

कोइराला समूहका नेताहरूले विरोधकै कार्यक्रम स्वरुप बिहीबार बिहान अर्को सभा राखेका छन् । सभामा नेता कोइराला र महामन्त्री थापासहित शीर्ष नेताहरूले समेत सम्बोधन गर्ने कार्यक्रम छ ।

प्रकाशित : आश्विन १२, २०७९ २१:३८
पूरा पढ्नुहोस्
प्रतिक्रिया
पठाउनुहोस्
×