योगमा रम्दै महानगरवासी- उपत्यका - कान्तिपुर समाचार
कान्तिपुर वेबसाईट
AdvertisementAdvertisement

योगमा रम्दै महानगरवासी

कान्तिपुर संवाददाता

काठमाडौँ — ललितपुर महानगरपालिका–१६ का ४४ वर्षीय रवीन्द्र महर्जन तीन महिनादेखि पाटनमा सञ्चालित योग केन्द्रमा धाइरहेका छन् । यसअघि उनीले योग सिकेका थिएनन् । हातखुट्टा झम्झमाउने, ग्यास्ट्राइटिस बढ्ने, छाती दुख्ने समस्या भएपछि उनी योग सिक्न चाहन्थे । तर, समय अभावका कारण टाढा जान नसक्ने भएकाले के गर्ने भन्ने विषयमा अन्योलमा थिए उनी ।

ललितपुर महानगरपालिका–१६ ले योग केन्द्र सञ्चालनमा ल्याएपछि उनी त्यहाँ निरन्तर सहभागी छन् । भन्छन्, ‘योगले तन र मन फूर्तिलो भएको छ; विचार स्वच्छ भएको छ । योगका कारण आज नयाँ जीवन पाएको महसुस भएको छ ।’

मंगलबजारका ५८ वर्षीय हरिप्रसाद श्रेष्ठले पनि योग केन्द्र सञ्चालनमा आएदेखि योग गर्नका लागि नियमित गइरहेका छन् । वडाको सूचनामार्फत थाहा पाएर सहभागी भएको बताउने उनले पनि योग सिकेको यो पहिलो पटक हो । उनले भने, ‘उमेर ढल्किँदै गयो । योगले बुढेसकालमा पनि जवान झैं स्वस्थ, स्फूर्त र मांशपेशीलाई बलियो बनाउँदो रैछ ।’

उनले रोगी भएर अस्पताल धाउनुभन्दा योगमार्फत निरोगी हुनु उत्तम भएको बताए । ‘तर, योग गर्न खुला ठाउँको अभावका कारण गर्न सकिरहेको थिइनँ,’ उनले भने, ‘योगले तनाव भगाएको छ; मीठो निद्रा र भोक जगाउने काम गरेको छ ।’

टापाहिटी टोलका ५२ वर्षीया शोभा जोशी योग गर्नकै लागि कहिले ललितपुर महानगरपालिका–२ स्थित मल पोखरी त कहिले पशुपति क्षेत्रसम्म पुग्ने गर्थिन् । ‘कहिले बाटो, कहिले टोल चोकतिर योगाभ्यास गर्न बाध्य थिएँ,’ उनले भनिन्, ‘वडाले योगशाला सञ्चालनमा ल्याएपछि सहज भएको छ ।’

अहिले ललितपुर महानगरपालिका–१६ द्वारा सञ्चालित योग केन्द्रमा ७० जनाले सदस्यता लिएका छन् । उनीहरू प्रत्येक दिन बिहान ५ देखि ७ बजेसम्म योग साधनामा भाग लिँदै आइरहेका छन् । वडाले योग सिकाउन दानशोभा शाक्य, उषा बज्रचार्य, रमिता बज्रचार्य, भोला डंगोल, दिनेश शर्मा, विक्रम शाक्य गरी ६ जना सह–शिक्षकको व्यवस्थापन गरेको छ । उनीहरूले पालैपालो योग प्रशिक्षण दिने गरेका छन् । सह-शिक्षक रमिता भन्छिन्, ‘योगले औषधि विज्ञानले निको पार्न नसकेका रोगहरू निको पार्न सकिन्छ । औषधि सेवनले केही हदसम्म निको होला तर खान छोडेमा रोग पुनः बल्झिन सक्छ । तर, योगबाट निको भएको रोग फेरि बल्झिँदैन ।’

ललितपुर महानगरपालिका–१६ का वडाध्यक्ष निर्मलरत्न शाक्यले स्वस्थ र सकारात्मक जीवन बाच्नका लागि योग आवश्यक रहेको बताए । ‘एक हजार रुपैयाँ तिरेर आजीवन सदस्यता लिएपछि वडाबाट दिइने अन्य स्वास्थ्य सुविधा पनि पाउन सकिन्छ,’ उनले भने, ‘दसैंलगतै फिजियोथेरापी केन्द्र सञ्चालन गर्ने योजना छ ।’

प्रकाशित : आश्विन ११, २०७९ १९:४५
प्रतिक्रिया
पठाउनुहोस्

अन्जनको ह्याट्रिकमा नेपालको सानदार जित

हिमेश

काठमाडौँ — अन्जन विष्टले गरेको ह्याट्रिकको मद्दतले नेपालले अन्तर्राष्ट्रिय मैत्रीपूर्ण खेलमा बांग्लादेशलाई ३-१ गोलअन्तरले पराजित गरेको छ । दशरथ रंगशालामा भएको मैत्रीपूर्ण खेलमा विष्टले उत्कृष्ट प्रदर्शन गर्दै ऐतिहासिक व्यक्तिगत उपलब्धिसमेत चुमेका छन् ।

नेपालका लागि यो छैटौं ह्याट्रिक हो । यसअघि गणेश थापा, नरेश जोशी, निराजन रायमाझी, भरत खवास र नवयुग श्रेष्ठले एक-एक ह्याट्रिक गरेका छन् । यो ह्याट्रिकसँगै नेपालका लागि विष्टको व्यक्तिगत गोल संख्या १० पुगेको छ । यो नेपालका लागि सम्भवतः खेलको पूर्वार्द्धमा भएको पहिलो ह्याट्रिक पनि हो । विष्ट नेपालका लागि सबैभन्दा बढी गोल गर्ने सूचीको दोस्रो स्थानमा पनि उक्लिएका छन् ।

विष्टले १८औं मिनेटमा पहिलो गोल गरे । विमल घर्तिमगरको फ्रि किकमा हेडबाट पहिलो गोल गरेका उनले २६औं मिनेटमा दोस्रो गोल थपे । तेज तामाङको सुरुवाती प्रहारमा बांग्लादेशी गोलरक्षक अनिसुर रहमानले बचाए पनि फर्केको बलमा उनले गोल गरे ।

विष्टले खेलको ३७औं मिनेटमा ह्याट्रिक पूरा गरे । विशाल राईको फ्रि किकमा हेडबाट गोल गर्दै उनले ह्याट्रिक पूरा गरेका हुन् । खेलको १७औं मिनेटमा बांग्लादेशी कप्तान जमल भुयाले २० यार्डबाट प्रहार गरेको बल पोस्टमा लागेर बाहिरिएको थियो । ६७औं मिनेटमा मोहम्मद हुसेन बादशाहले एक गोल फर्काए ।

यस खेलबाट नेपालका लागि ऋतिक खड्का र आशीष चौधरीले डेब्यु गरे । यो खेलसँगै नेपाल बांग्लादेशविरुद्धका पछिल्ला पाँच प्रतिस्पर्धामा अपराजित रहेको छ ।

प्रकाशित : आश्विन ११, २०७९ १९:३३
पूरा पढ्नुहोस्
प्रतिक्रिया
पठाउनुहोस्
×