काठमाडौंमा बजार अनुगमन सुरू, तरकारी पसल दर्ता गर्न महानगरको आग्रह

उपप्रमुख सुनिता डंगोलको नेतृत्वमा नगर प्रहरी, खाद्य तथा गुण नियन्त्रण विभागका प्रतिनिधि, भेटेरिनरी टोलीसहित अन्य सरकारी निकायका प्रतिनिधिहरु टोलीमा छन् ।

उपमेयर डंगोलको टोलीले प्रदर्शनीमार्गको तरकारी बजार, खसी बजारसहित खाद्य संस्थानमा अनुगमन गरेको थियो । अनगुमनको क्रममा तरकारी पसलहरू दर्ता बिना नै सञ्चालन गरिएको पाइएको उपप्रमुख डंगोले जानकारी दिइन् । डंगोलले तरकारी पसलहरुलाई महानगरमा दर्ता गर्नका लागि आग्रह गरिएको बताइन् । उनले कान्तिपुरसित भनिन्,'हामीले अनुगमन गर्दा धेरै तरकारी पसलहरुलाई दर्ता गर्नुपर्छ भन्ने जानकारी नै रहनेछ । हामीले एक पटकका लागि भनेर कसैलाई कारबाही गरेनौं, उहाँहरुलाई दर्ता गर्नु भनेर भनेका छौं । '

महानगरको टोलीले दोस्रोपटक सोही ठाउँमा अनुगमनका लागि पनि जाने उनले जानकारी दिइन् । बजार अनुगमनको क्रममा टोलीले मूल्य, दर्ता, प्याकेज मितिलगायतको विवरण हेरेको थियो । खसी बजार क्षेत्रमा अनुगमनको क्रममा भेटेरिनरी प्राविधिकहरुको पनि उपस्थिति थियो ।

महानगरको अर्को टोली चाबहिल र कलंकी क्षेत्रमा पनि अनुगमान गरिरहेको डंगोलले जानकारी दिइन् । बजार अनुगमान दसैं‌तिहार भर नै चल्ने महानगरले जनाएको छ ।