२१.१२°C काठमाडौं
काठमाडौंमा वायुको गुणस्तर: १६७

भत्काइएका संरचना महानगरले बिहीबारदेखि सफा गर्ने

काठमाडौँ — काठमाडौं महानगरपालिकाले भत्काएर छाडेका अनधिकृत संरचना बिहीबारदेखि सफा गर्ने भएको छ । मेयर बालेन्द्र शाहले सुरु गरेको अनधिकृत संरचना हटाउने अभियान दुई साता बिते पनि भत्काएर छाडिएका संरचना कसैले नउठाएपछि महानगर आफैंले उठाउन लागेको हो ।

भत्काइएका संरचना महानगरले बिहीबारदेखि सफा गर्ने

सम्बन्धित घरधनी र संरचना बनाउने व्यवसायीले नै भत्किएका संरचना सफा गर्नुपर्ने भए पनि कसैले फोहोर नसोहोरेपछि महानगर आफैंले हटाउन लागेको हो ।

अधिकांश स्थानमा भत्काएर छाडिएका संरचना असरल्ल हुँदा सर्वसाधरणलाई सास्ती हुने गरेको छ । भत्काइएको ठाउँमा भएका जस्तापाता, निर्माण सामग्रीलगायत अन्य वस्तुहरू छरपस्ट हुँदा पैदलयात्रुलाई सास्ती भएको छ ।

कोटेश्वर, न्युरोड, नयाँ बसपार्क क्षेत्रमा महानगरले डोजर चलाएर भत्काएका संरचना त्यसै छाडिएका हुन् ।

महानगरपालिकाका नगर प्रहरी प्रमुख राजुनाथ पाण्डेले सम्बन्धित घरधनीले नै सबै सामग्रीहरू लैजाने प्रतिबद्धता गरेपछि नउठाइएको बताए । उनले इकान्तिपुरसित भने,‘ हामीलाई सम्बन्धित घरधनीले भत्काएका संरचना र सामग्रीहरू आफैं उठाउँछौं भन्नेपछि छाडिदिएका हौं ।’

तर बिहीबारसम्म नउठाएमा नगर प्रहरी बलले ती स्थानमा अनुगमन गर्ने र महानगर आफैंले सोहोर्ने उनले बताए । ‘भोलि बिहीबार नगर प्रहरीको टोली अनुगमन गरेर सबै हटाउँछ, ’ उनले भने । यस्तै, असनमा भत्काइएको संरचना र सामग्री सम्बन्धित व्यवसायीले नै लगेको उनले जानकारी दिए ।

प्रकाशित : भाद्र २२, २०७९ १७:३०
प्रतिक्रिया
पठाउनुहोस्
जनताको राय

स्वयंसेवी संस्था स्काउटको स्वामित्वमा रहेको सार्वजनिक जग्गा कब्जा गरी वर्षौंदेखि भाडामा लगाउने कांग्रेसका सांसद दीपक खड्कालाई अब के गर्नुपर्छ ?