काठमाडौंको फोहोर ढुवानीमा संघ-संस्थाको सहयोग- उपत्यका - कान्तिपुर समाचार

काठमाडौंको फोहोर ढुवानीमा संघ-संस्थाको सहयोग

कान्तिपुर संवाददाता

काठमाडौँ — धेरै मात्रामा फोहोर थुप्रिएपछि उपत्यकाको फोहोर ढुवानीमा काठमाडौं महानगरपालिकालाई विभिन्न संघ-संस्थाहरूले सघाउने भएका छन् ।

महानगरपालिका र निजी क्षेत्रसँग भएका गाडीबाट ढुवानी गर्दा थुप्रिएको फोहोर हटाउन गर्न धेरै समय लाग्ने भएपछि महानगरले नेपाल टिपर तथा ट्रक व्यवसायी सं‌घसँग सहमति गरेको छ ।

मेयर बालेन शाहको सचिवालय सदस्य एवं फोहोर व्यवस्थापन हेर्दै आएका इन्जिनियर सुनिल लम्सालका अनुसार बिहीबार संघका २० वटा टिपरले फोहोर बोकेर बन्चरेडाँडातर्फ गएका छन् । उनका अनुसार ढुवानीमा लाग्ने इन्धन र चालक भत्ता महानगरपालिले बेहोर्ने सहमति भएको छ ।

यस्तै, विभिन्न कन्सट्रक्सन कम्पनीहरुले महानगरलाई नि:शुल्क रुपमा फोहोर ढुवानी गर्न सहयोग गर्ने भएका छन् । ती कम्पनीहरुले तेल र चालक भत्ता पनि नलिने गरी आफ्नै खर्चमा फोहोर ढुवानी गरिदिने प्रस्ताव गरेको लम्सालले जानकारी दिए । बिहीबार बन्चरेडाँडामा करिब ५० वटा टिपरले निःशुल्क रुपमा फोहोर ढुवानी गर्ने उनले बताए ।

यस्तै, अन्य संस्थाहरुले पनि थुप्रिएको फोहोर उठाउन सहयोग गर्ने प्रतिबद्धता जनाएपछि शुक्रबारदेखि थप सय वटा टिपरले फोहोर ढुवानी गर्ने उनले बताए । हाल दैनिक रुपमा १८० वटा टिपरले फोहोर विसर्जन गर्दै आएका छन् ।

प्रकाशित : भाद्र २, २०७९ १०:२०
प्रतिक्रिया
पठाउनुहोस्

आगलागीमा परेर मोरङमा एकको मृत्यु

कान्तिपुर संवाददाता

मोरङको सुन्दर हरैचा नगरपालिका–११ मा आगलागीमा परेर एकको मृत्यु भएको छ ।

इलाका प्रहरी बेलबारीका अनुसार बेलेपुरस्थित बालकृष्ण गिरीको काठ र टिनको दुई तले घरमा बुधबार राति १० बजे विधुत् सर्ट भएर आगो लाग्दा घरका कामदार कुमार श्रेष्ठको मृत्यु भएको हो ।

श्रवणशक्ति कम भएका श्रेष्ठले कानमा एयरफोन लगाएर संगीत सुनेर सुतेका कारण बाहिरबाट बोलाउँदा पनि थाहा नपाएका कारण आगलागीबाट बच्न नसकेको प्रहरीले बताएको छ ।


प्रकाशित : भाद्र २, २०७९ १०:०८
पूरा पढ्नुहोस्
प्रतिक्रिया
पठाउनुहोस्
×