विदेश पठाइदिने लोभ देखाएर २२ लाख ठगी, दुई पक्राउ- उपत्यका - कान्तिपुर समाचार
कान्तिपुर वेबसाईट
AdvertisementAdvertisement

विदेश पठाइदिने लोभ देखाएर २२ लाख ठगी, दुई पक्राउ

कान्तिपुर संवाददाता

काठमाडौँ — बेलायत र दुबई पठाइदिन्छु भन्दै विभिन्न व्यक्तिले २२ लाख रुपैयाँभन्दा बढी ठगी गरेको पाइएको छ । प्रहरीले दुई छुट्टाछुट्टै ठगी अपराधमा संलग्न रहेको आरोपमा आइतबार दुई जनालाई पक्राउ गरेको छ । 

बेलायत पठाइदिने लोभ देखाएर १५ लाख रुपैयाँ ठगी गरेको अभियोगमा काठमाडौं महानगरपालिका–२९ सामाखुसी बस्ने इलामका ३७ वर्षीय प्रकाश राईलाई प्रहरीले पक्राउ गरेको छ । राईले पाँच जनालाई सिजनल भिसामा बेलायत जानका लागि प्रतिव्यक्ति नौ लाख रुपैयाँ लाग्ने र त्यहाँको कम्पनीमा चार लाख रुपैयाँ तलब हुन्छ भनी लोभ देखाएर पाँच जनाबाट प्रतिव्यक्ति तीन लाख रुपैयाँ ठगी गरेको खुल्न आएको छ ।

त्यसपछि फरार रहेका उनलाई उपत्यका अपराध अनुसन्धान कार्यालयबाट खटिएको प्रहरीले सिनामंगलबाट पक्राउ गरेको हो । उनलाई थप अनुसन्धान तथा कारबाहीका लागि वैदेशिक रोजगार विभाग बुद्धनगरमा पठाइएको छ ।

यस्तै दुबई पठाइदिन्छु भन्दै ठगी गरेको अभियोगमा काठमाडौंको टोखा बस्ने सिन्धुपाल्चोक सुनकोसी गाउँपालिका–७ खाडीचौरका २७ वर्षीय अविनाश कार्कीलाई पनि आजै प्रहरीले पक्राउ गरेको छ । वर्किङ भिसामा दुबई जानका लागि सात लाख ५० हजार लाग्ने र त्यहाँ मासिक रु एक लाखसम्म तलब हुने भनी सात लाख ५० हजार रुपैयाँ लिई उनी फरार भएका थिए । उनलाई पनि सोही कार्यालयबाट खटिएको प्रहरीले आज गोगंबुबाट पक्राउ गरी थप कारबाहीका लागि विभागमा पठाइएको प्रहरी प्रधान कार्यालयले जनाएको छ ।

प्रकाशित : श्रावण २९, २०७९ १९:३१
प्रतिक्रिया
पठाउनुहोस्

८ ट्रक सुपारी छाड्न उच्च अदालतले दिएन अन्तरिम आदेश

ट्रकको सिलबन्दी यथास्थितिमा राख्न आदेश दिँदै दुबै पक्षलाई छलफलका लागि बोलाइयो 
देवनारायण साह

मोरङ — उच्च अदालत विराटनगरले ८ ट्रक सुपारी छाड्नका लागि अन्तरिम आदेश दिन अस्वीकार गरेको छ । अदालतले ट्रकको सिलबन्दी यथास्थितिमा राख्दै दुवै पक्षलाई उपस्थितिका लागि बोलाएको छ । उच्च अदालत विराटनगरका न्यायाधीश मिलनकुमार राईको एकल इजलासले उक्त आदेश दिएको अदालतका रजिष्टार जितेन्द्रबाबु थपलियाले बताए ।


भारत निर्यात भएको ८ ट्रक सुपारी 'रिरुट' गरेर लैजाने क्रममा प्रहरीले विराटनगरस्थित रानीबाट नियन्त्रणमा लिएर राजश्व अनुसन्धान कार्यालयमा बुझाएको थियो । त्यसपछि सुपारी निर्यातकर्ता मनकामना ट्रेडर्सका प्रोप्राइटर नविन घिमिरेले उच्च अदालतमा सुपारी तत्काल छाड्न र भारतको जोगबनी भन्सार कार्यालयले लगाएको 'सिल' यथास्थितिमा राख्न अन्तरिम आदेशका लागि गत बिहीबार रिट निवेदन दायर गरेका थिए । घिमिरेले जिल्ला प्रहरी कार्यालय मोरङ, भन्सार विभाग, भन्सार कार्यालय विराटनगर र राजस्व अनुसन्धान कार्यालयलाई विपक्षी बनाई रिट निवेदन दायर गरेका थिए ।

माग बमोजिम आदेश जारी हुनु नपर्ने भए आदेश जारी हुनु नपर्ने आधार र कारण खुलाइ लिखित प्रमाणसमेत साथै राखी बाटोको म्याद बाहेक १५ दिनभित्र विपक्षीहरुलाई उच्च सरकारी वकिलको कार्यालयमार्फत लिखित जवाफ पेस गर्न आदेशमा भनिएको छ । ‘यस सम्बन्धमा दुवै पक्षलाई छलफलमा राखेर मात्र उचित निष्कर्षमा पुग्न मनासिब हुने देखिएकाले साउन ३१ गते अन्तरिम आदेश छलफलका लागि उपस्थित हुन विपक्षीहरूलाई जानकारी दिई नियमानुसार पेस गर्नू,’ आदेशमा भनिएको छ, ‘उक्त अवधिसम्म निवेदनमा उल्लेखित ८ वटा ट्रकमा जोगबनी भन्सार कार्यालय भारतबाट लागेका सिलबन्दीलाई यथास्थितिमा राख्नू भनी उच्च अदालत नियमावली २०७३ को नियम ४२ बमोजिम विपक्षहरुको नाममा अल्पकालिन अन्तरिम आदेश जारी गरिदिएको छ ।’

विराटनगरस्थित एकीकृत चौकीबाट जाँच पास भएर भारत निर्यात भइसकेको ८ करोड ६३ लाख ८१ हजार ५ सय ६८ रुपैयाँ मूल्य बराबरको २ लाख १९ हजार ५ सय ९६ किलो सुपारी लोड भएको ८ वटा ट्रक प्रहरीले रानीबाट नियन्त्रणमा लिएको छ । इलाका प्रहरी रानीले साउन ५ गते राति १० बजे नियमित जाँच गर्ने क्रममा सुनसरीको भण्टाबारी हुँदै भारत लगिरहेको सुपारी बोकेको उक्त ट्रक नियन्त्रणमा लिएको हो । जिल्ला प्रहरी मोरङले उक्त सुपारीसहितको ट्रक र ट्रक चालकलाई कारबाहीका लागि राजश्व अनुसन्धान कार्यालय इटहरीमा साउन ७ गते बुझाएको छ ।

साउन ७ गतेदेखि उक्त सुपारीसहितको ट्रक राजश्व अनुसन्धान कार्यालय इटहरी परिसरमा राखिए पनि हालसम्म कुनै कारबाही अघि बढ्न सकेको छैन । राजश्व अनुसन्धान विभागका महानिर्देशक झलकराम अधिकारीले नेपालबाट निकासी भएर भारतीय भन्सारले सिल लगाइसकेको वस्तु भएकाले महानिर्देशकको हैसियतले त्यो छुने अधिकार आफूलाई नभएको बताउँदै आएका छन् ।

इन्डोनेसियाबाट आयात गरिएको सुपारीलाई सुपारी खेती विकास संस्था अर्जुनधारा, झापाले दिएको सिफारिसको आधारमा उद्योग वाणिज्य संघ झापाले उत्पत्तिको प्रमाण पत्र दिई चौतर्फी सेटिङमा भारत निर्यात गरिन लागेको हो । प्रदेश १ का झापा, सुनसरी, मोरङ, इलामलगायतका जिल्ला व्यवसायिक उत्पादन भइरहेको सुपारी नेपालमा खपत हुन नसकेर भारत निर्यात हुँदै आएको छ । प्रदेश १ कृषि निर्देशनालयको तथ्यांक अनुसार आर्थिक वर्ष ०७७/७८ मा यस प्रदेशमा मात्रै कुल ३ हजार ९६७ हेक्टरमा भएको व्यावसायिक सुपारी खेतीबाट १४ हजार ५१२ मेट्रिकटन उत्पादन भएको तथ्यांक छ ।

विराटनगरका नविन घिमिरेको मनकामना ट्रेडर्स विराटनगर १४ को नाममा झापाबाट खरिद गरी भारतको आइसा एक्सपोर्ट कलकतालाई बिक्री गरी निर्यात गरेर लैजाने क्रममा प्रहरीले नियन्त्रणमा लिएको हो । विराटनगर भन्सार कार्यालयको तथ्यांक अनुसार इन्डोनेसियाको सुपारी थाइल्याण्ड र सिंगापुरको पोर्टबाट विराटनगरका ६ वटा व्यापारिक फर्मले गत आर्थिक वर्षमा ७५ करोड ४९ लाख ३२ हजार मूल्य बराबरको ५ हजार ७८४ दशमलव २६ मेट्रिकटन आयात गरेका छन् । बरामद भएको समेत गरी ९० करोड ६७ लाख १८ हजार मूल्य बराबरको २२ लाख ४८ हजार ८ सय ५ किलो सुपारी भारत निर्यात भएको विराटनगर भन्सारको तथ्यांकले जनाएको छ । सुपारी आयात गर्नेमा अम्बे ट्रेडिङ, राठी ट्रेडिङ, ग्लोबल विराट इन्टरनेसनल, पिके ट्रेडर्स, तिरुपति ट्रेड लिंक्स र नेसनल मोटर्स छ तर निर्यात गर्नेमा मनोकामना ट्रेडर्स मात्रै छ ।

प्रकाशित : श्रावण २९, २०७९ १९:३०
पूरा पढ्नुहोस्
प्रतिक्रिया
पठाउनुहोस्
x
×