काठमाडौं महानगरको वार्षिक खर्च ४४ प्रतिशतमात्रै 

महानगरपालिकाको आर्थिक वर्ष २०७८/०७९ को स्वीकृत बजेट १६ अर्ब ५२ करोड ८७ लाख ११ हजार रुपैयाँ थियो । तर, त्यसमध्ये ७ अर्व ३१ करोड ३५ लाख २९ हजार ४४२ रुपैयाँ ४७ पैसा मात्रै खर्च भएको हो । समीक्षा बैठकमा महानगरपालिकाका विभाग, आयोजना, एकाई र सचिवालयले गरी २४ वटा प्रस्तुतीकरण हुनेछन् ।

समीक्षा बैठकमा सम्बोधन गर्दै मेयर बालेन्द्र शाहले बिगतको तथ्यांक र तथ्यांकीय अवस्थाबाट सिकेर आगामी दिनमा सुधार गरेर अघि बढ्नुपर्ने बताएका छन् । ‘अघिल्लो वर्षको अवस्था के थियो ? बजेट कस्तो थियो ? यसवर्षको बजेटमा के छ ? यो समीक्षापछि हामीले कार्ययोजना र समय तालिका बनाएर कार्यान्वयनमा जोड दिनुपर्ने हुन्छ,’ मेयर शाहले भनेका छन्, 'राम्रो कुरा सिकेर निरन्तरता दिऔँ । गल्तीहरु नदोहोर्‍याऔँ ।'

प्रमुख प्रशासकीय अधिकृत लोकनाथ पौड्यालले प्रस्तुतिहरुमा समस्यासँगै समाधानका उपायसमेत खोज्नुपर्ने बताए । ‘समीक्षाबाट प्राप्त भएको तथ्यका आधारमा सुधार गर्दै जानुपर्छ । विगतमा देखिएका कमजोरी दोहोरिन दिनुहुँदैन । यसबाट सिकेर महानगरले चालु आर्थिक वर्षको कार्यक्रम कार्यान्वयनमा प्रगति गर्न सक्छ,’ उनले भनेका थिए ।