पद धारण गर्न शैक्षिक योग्यताको प्रमाणपत्र किर्ते - उपत्यका - कान्तिपुर समाचार
कान्तिपुर वेबसाईट
AdvertisementAdvertisement

पद धारण गर्न शैक्षिक योग्यताको प्रमाणपत्र किर्ते 

कान्तिपुर संवाददाता

काठमाडौँ — नेपाल प्रहरीको केन्द्रीय अनुसन्धान ब्युरोले शैक्षिक योग्यताको प्रमाणपत्र किर्ते गरेको अभियोगमा एक जनालाई पक्राउ गरेको छ । प्रक्राउ पर्नेमा ललितपुर महानगरपालिका–१३ कुसुन्ती ५३ वर्षीय माधवप्रसाद तिमल्सिना छन् । 

नेपाल सरकार भूमि व्यवस्था सहकारी तथा गरिबी निवारण मन्त्रालयअन्तर्गत राष्ट्रिय सहकारी विकास बोर्डको सञ्चालक पदमा नियुक्तिका लागि शैक्षिक योग्यताको प्रमाणपत्र किर्ते गरेको प्रारम्भिक अनुसन्धानमा खुलेको ब्युरोका प्रवक्ता एसपी श्यामकुमार महतोले बताए ।

पाटन बहुमुखी क्याम्पसबाट स्नातक तह उत्तीर्ण गरेको माधवप्रसाद तिमल्सिनाको नाममा जारी भएको चारित्रिक प्रमाणपत्र र उनकै नाममा पाटन मल्टिपल क्याम्पसको स्नातकको ‘हुम्यानिटिज र सोसल साइन्सको ट्रान्सक्रिप्ट’ किर्ते गरी २०७८ चैत ६ गते निवेदन साथ राष्ट्रिय सहकारी विकास वोर्डमा पेश गरेको पाइएपछि उनलाई मंगलबार ललितपुर थसीखेलबाट पक्राउ गरेको एसपी महतोले बताए । उनलाई लिखतसम्बन्धी कसुरमा जिल्ला अदालत काठमाडौंबाट ५ दिन म्याद लिई थप अनुसन्धान भइरहेको प्रहरीले जनाएको छ ।

प्रकाशित : असार १४, २०७९ २१:२८
प्रतिक्रिया
पठाउनुहोस्

कोलम्बियाको जेलभित्र हिंसात्मक प्रदर्शन हुँदा ५१ कैदी मारिए

एजेन्सी

काठमाडौँ — कोलम्बियाको एक कारागारमा दंगा हुँदा ५१ जना मारिएका छन् । कोलम्बियाको तुलुवा सहरस्थित क्वेजोन सिटी जेलमा रातभर बन्दीहरूले प्रदर्शन गर्दा आगजनीसमेत भएको थियो ।

अधिकारीहरूका अनुसार यो कोलम्बियामा पछिल्लो समय भएका सबैभन्दा खराबमध्येको एक घटना हो । जेलभित्र दंगा हुँदा कैदीहरूले सुत्न र बस्न प्रयोग गरिने केही गद्दाहरू जलाएका थिए । यस क्रममा आगो फैलिएर ४९ जनाको घटनास्थलमै मृत्यु भएको अधिकारीहरूले जनाएका छन् ।

अन्तर्राष्ट्रिय सञ्चारमाध्यमका अनुसार दुई जनाको भने अस्पतालमा उपचारको क्रममा मृत्यु भएको हो । यस घटनामा ३० जना घाइते भएका छन् । जहाँबाट अरु दर्जनौं बन्दीलाई सकुशल उद्धार गरिएको थियो ।

देशको दक्षिण-पश्चिम सहरमा रहेको उक्त जेलमा १ हजार २ सय ६७ बन्दी छन् । आगलागी भएको स्थानमा मात्रै १८० वटा घरहरू रहेको बताइएको छ । कोलम्बियाका प्राय: कारागारहरूमा क्षमताभन्दा ठूलो भीड हुने गरेको बताइन्छ ।

देशभर ८१ हजार बन्दी अटाउने क्षमताका जेल रहे पनि ९७ हजार जना बन्दीहरू रहेको तथ्यांक छ । हाल पोर्चुगल भ्रमणमा रहेका कोलम्बियाका राष्ट्रपति इभान ड्युकले मंगलबार भएको जेलभित्रको हिंसात्मक घटनाको छानबिन गरिने बताएका छन् । साथै उनले उक्त घटनाप्रति दु:ख व्यक्त गरेका छन् ।

यसअघि २०२० मा कोलम्बियामा भीडभाड र सेवा अभावविरूद्ध बन्दीहरूले प्रदर्शन गर्दा २० जनाभन्दा धेरै मारिएका थिए । त्यस क्रममा कोलम्बियाको सरकारले केही कैदीहरूलाई रिहा गरेको थियो।

प्रकाशित : असार १४, २०७९ २१:१५
पूरा पढ्नुहोस्
प्रतिक्रिया
पठाउनुहोस्
×