हत्या आरोपमा दुई पक्राउ 

गत वैशाख २८ गते सिन्धुपाल्चोक जुगल गाउँपालिका–८ बराम्चेका ३५ वर्षीय कान्छा लामा तामाङलाई कुटपिट गरी हत्या गरेको अभियोगमा उनीहरुलाई प्रहरी पक्राउ गरेको हो । शुक्रबार पक्राउ परेका दुवै जनालाई प्रहरीले सोमबार सार्वजनिक गरेको हो ।

प्रहरीका अनुसार काठमाडौं दक्षिणकाली नगरपालिका–१ पावर हाउस नजिक वाग्मती नदी किनारमा जेठ ५ गते कान्छा लामाको शव सडिगलेको अवस्थामा फेला परेको थियो । सोही घटना अनुसन्धानको क्रममा उनीहरूलाई पक्राउ गरेको काठमाडौं उपत्यका अपराध अनुसन्धान कार्यालयका प्रवक्ता एसपी कृष्णप्रसाद कोइरालाले बताए ।

प्रहरीको प्रारम्भिक अनुसन्धानमा काठमाडौं महानगर–१६ नयाँबजार विष्णुमती पुल नजिक ‘बालाजु संरक्षण समिति एवं श्री शिव मन्दिर गंगा पहलमान पौवा परिसर’ भित्रको भवनमा वैशाख २८ गते कान्छा लामालाई कान्छामान ठोकर, गायत्री नगरकोटी र मकवानपुर वाग्मती गाउँपालिका फापरबारी ठूलो कायरका दिपक वाइबा तामाङसमेत मिलेर कुटपिट गरी टाउकोमा हम्मरले हानेर घाँटीमा सलले बाँधेर हत्या गरेको पाइएको छ ।

हत्यापछि सलले बाँधेर शव तन्ना र म्याट्रिसले बेरेर प्लास्टिकको डोरीले बाँधी कान्छामान ठोकर र गायत्री नगरकोटीले विष्णुमती खोलामा फालेको खुल्न आएको एसपी कोइरालाले बताए । पक्राउ परेका दुवै जनालाई आवश्यक कानुनी कारबाहीको लागि काठमाडौं प्रहरी परिसर टेकु पठाएको जनाएको छ ।