टोखा नगर प्रमुखमा तीन महिला प्रतिस्पर्धी- उपत्यका - कान्तिपुर समाचार

टोखा नगर प्रमुखमा तीन महिला प्रतिस्पर्धी

१२ जना आकांक्षीमध्ये कांग्रेस, एकीकृत समाजवादी र नेपाल समावेशी पार्टीले उठाए महिला उम्मेदवार, एमालेमा पुरानै अनुहार
मधु शाही

काठमाडौँ — आसन्न स्थानीय तह निर्वाचनअन्तर्गत टोखा नगर प्रमुखका लागि ३ महिला उम्मेदवार प्रतिस्पर्धामा उत्रिएका छन् । समग्रमा स्वतन्त्रसमेत गरी कुल १२ जना नगर प्रमुखको आकांक्षी छन् भने उपप्रमुखमा ६ जनाले उम्मेदवारी दिएका छन् ।

सत्तारूढ ५ दलबीच मुलुकभर गठबन्धन भए पनि टोखामा कांग्रेस एक्लै चुनावी मैदानमा उत्रिएको छ । कांग्रेसले रजनी थापालाई प्रमुखको उम्मेदवार बनाएको छ । २०७४ सालको स्थानीय निर्वाचनमा उपप्रमुखमा पराजित भएकी थापा यसपटक प्रमुखको प्रत्याशी बनेकी हुन् । गत निर्वाचनमा एमालेका प्रकाश अधिकारी प्रमुख र ज्ञानमाया डंगोल उपप्रमुखमा विजयी भएका थिए । एमालले यस पटक पनि यीनै अनुहारलाई दोहोर्‍याउँदा थापालाई चुनौती र अवसर दुवै छ । थापाबाहेक अन्य दुई महिलाहरू नेकपा (एकीकृत समाजवादी) बाट लक्ष्मीदेवी कार्की र नेपाल समावेशी पार्टीबाट निर्मलादेवी कोइराला पनि प्रमुख पद हत्याउने दौडमा छन् ।

कांग्रेसले उपप्रमुखमा भने मुरारी तामाङलाई अघि सारेको छ । शिक्षा, स्वास्थ्य, स्वरोजगार, यातायात, विद्युत्, खानेपानीलगायत आधारभूत पूर्वाधार खडा गर्ने उसको घोषणापत्रमा उल्लेख छ । थापाले ‘कम बोलेर धेरै काम गर्ने’ बताउँदै आएकी छन् । आमसभा र घरदैलो अभियानमा खटिएकी ३० वर्षीया थापा युवा पुस्तामाझ लोकप्रिय देखिएकी छन् । उनको विचारमा विकास भनेको पूर्वाधार मात्रै होइन, सोचको विकास हुन सकेन भने स्थानीय तहको दीर्घकालीन समृद्धि हुन सक्दैन । ‘म भौतिक विकासमा मात्रै केन्द्रित हुन चाहन्नँ,’ उनी भन्छिन्, ‘भिजनसहितको विकास जरुरी छ ।’ उनले नगरवासीको दृष्टिकोणमा परिवर्तन ल्याउने योजना बनाएको बताइन् ।

एमालेबाट उम्मेदवार बनेका अधिकारीका हकमा यो निर्वाचन पछिल्लो कार्यकालको मूल्यांकन रूपमा समेत हेरिएको छ । कोरोना महामारीका समयमा नगरवासीको स्वास्थ्य सुरक्षाप्रति अधिकारी संवेदनशील बनेको बताइन्छ । एमाले नगर प्रवक्ता बच्चुराज बस्यालले जनताले एमाले जनप्रतिनिधिको पछिल्लो ५ वर्षको कार्यअनुभव मन पराएको दाबी गरे । ‘यसपटक पनि एमालेले नै जित्छ भन्नेमा सतप्रतिशत ढुक्क छौं,’ उनले भने, ‘घरदैलोमा जाँदा जनताले फेरि आउनु भन्दै आशिर्वाद दिएका छन् ।’

‘मेयर दीर्घायू कार्यक्रम’, ‘मेयर दिवा खाजा कार्यक्रम’, ‘टोखाका बिरामीलाई निःशुल्क रगत’, ‘उपमेयरसँग बालबालिका कार्यक्रम’, ‘मेयर उज्यालो कार्यक्रम’, झोंरमा १२ करोडको खानेपानी योजनालगायत जनसेवामुखी काम गरेर अधिकारीले टोखावासीको मन जितेको प्रवक्ता बस्याल बताउँछन् । पछिल्लो कार्यकालमा काम गर्दागर्दै अधुरा रहेका योजनालाई पूरा गर्न पनि फेरि आफू नेतृत्वमा आउनुपर्ने तर्क गर्छन् अधिकारी ।

‘एक घर एक कौसी खेती अभियान’, ९ वटा बोरिङको पानी घर–घर पुर्‍याउने, खानेपानी समस्या समाधान गर्न मेलम्चीको पाइपलाइनलाई जनताको घरदैलोसम्मै लैजाने अधुरा योजना पूरा गर्ने उनको लक्ष्य छ ।

नगर प्रमुखमै विवेकशील साझा पार्टीबाट लक्ष्मण राज सिटौला चुनावी मैदानमा छन् । सिटौलाको व्यक्तिगत व्यवहार मन छुने भएकाले चुनावी मैदानमा कांग्रेसपछि दोस्रो स्थान हासिल गर्न सक्ने पार्टी केन्द्रीय नेता प्रकाशचन्द्र परियार दाबी गर्छन् । राष्ट्रिय प्रजातन्त्र पार्टीका भरतबहादुर केसी प्रमुख र दुर्गा पौडेल उपप्रमुखको प्रत्याशी छन् । मजदुर किसान पार्टीबाट रवीन्द्र डंगोलले प्रमुख पदमा उम्मेदवारी दिएका छन् । ६ जना स्वतन्त्र उम्मेदवार छन् ।

प्रकाशित : वैशाख २४, २०७९ ०८:३८
प्रतिक्रिया
पठाउनुहोस्

चोरेर अमेरिका पुर्‍याइएको अंशुवर्माकालीन पार्वती मूर्ति घर फर्काइँदै

कान्तिपुर संवाददाता

काठमाडौँ — भक्तपुरको एक प्राचीन मन्दिरबाट झन्डै ४५वर्षअघि चोरिएको र अमेरिकाको कनेक्टिकट राज्यस्थित येल विश्वविद्यालयको आर्ट ग्यालरीमा फेला परेको कलात्मक पार्वती(तारा)को मूर्ति नेपाल फर्काउनेबारे सहमति भएको छ ।

न्युयोर्कस्थित कार्यवाहक महावाणिज्यदूत विष्णुप्रसाद गौतमले दिएको जानकारीअनुसार, गत वर्ष असारमा उक्त मूर्तिको अवस्थितिका बारेमा जानकारी आए पनि आवश्यक तथ्य पहिचान र प्रमाणीकरणपछि घर फर्काउन विश्वविद्यालय तयार भएको हो । अंशुवर्माकालीन सम्पदा मानिने पार्वतीको मूर्तिलाई विश्वविद्यालयको वेबसाइटमा ‘बुद्धिस्ट गडेस तारा’ भनेर उल्लेख गरिएको थियो ।

भक्तपुरको गोलमढीस्थित वीरभद्रेश्वर महादेव मन्दिरमा उक्त मूर्ति २०३३ सालसम्म रहेको थियो । त्यही वर्ष यो मूर्ति लन्डनको एक निजी कला संग्रहकर्ताकहाँ फेला परेको र त्यहाँबाट लिलामी/बिक्रीको अनेक चरणमा सन् २०१५ मा येल विश्वविद्यालयमा पुगेको देखिन्छ ।

विश्वविद्यालयकी आर्ट क्युरेटर एन्टोनिय बर्तोलले कार्गोको पक्रिया र सुरक्षा प्रबन्धसँगै नेपालको सम्पदालाई छिट्टै घर फर्काइने प्रतिक्रिया दिइन् । उक्त मूर्ति फर्काएपछि गोलमढीको यथास्थान मन्दिरमा प्रतिस्थापन गरिने प्रतिबद्धता भक्तपुर नगरपालिकाले जनाइसकेको छ ।

उक्त मूर्ति हराएको र अमेरिकामा फेला परेकोबारे लस्ट आर्ट्स अफ नेपालले पहिलो पटक सूचना बाहिर ल्याएको थियो ।

प्रकाशित : वैशाख २४, २०७९ ०८:३२
पूरा पढ्नुहोस्
प्रतिक्रिया
पठाउनुहोस्
×