जागिर खोजिदिने संस्थाहरूमा छापा, ९ जना पक्राउ- उपत्यका - कान्तिपुर समाचार
कान्तिपुर वेबसाईट
AdvertisementAdvertisement

जागिर खोजिदिने संस्थाहरूमा छापा, ९ जना पक्राउ

बेरोजगारसँग फाराम र जागिर ग्यारेन्टीका नाउँमा अनधिकृत तरिकाले पैसा असुलेर ठगी गरेको आरोप
कान्तिपुर संवाददाता

काठमाडौँ — उपत्यकाका विभिन्न स्थानमा ‘जब सेन्टर’ हरू स्थापना गरी विभिन्न ठाउँमा जागिर लगाइदिने बहानामा ठगी गरेको आरोपमा ९ जना पक्राउ परेका छन् । आफूहरूसँग विभिन्न नाममा पैसा असुलेर ठगी गरेको भन्दै पीडितले उजुरी दिएपछि प्रहरीले छापा मार्दै सञ्चालकहरूलाई नियन्त्रणमा लिएको हो । 

पक्राउ पर्नेमा लोकन्थली बस्ने अर्घाखाँची छत्रदेवका २६ वर्षीय अमर पाण्डे, पेप्सीकोला बस्ने ३२ वर्षीय तिलकराम पाण्डे, तारकेश्वर बस्ने लमजुङ दूधपोखरी–२ का २२ वर्षीय आनन्द मरहठ्ठा, ललितपुर सानागाउँ सिरहाका २३ वर्षीय विवेक यादव, ओखलढुंगा घर भई कपन बस्ने २८ वर्षीय अश्विन राई छन् । त्यस्तै, जडीबुटी बस्ने सिन्धुली फिक्कलका २२ वर्षीय घनश्याम पहाडी, रौतहट चन्द्रपुरकी २५ वर्षीया सिर्जना लामिछाने, कोटेश्वर बस्ने विराटनगरकी ४० वर्षीया ज्ञानु न्यौपाने र रौतहट मौलापुरका २२ वर्षीय रामवचन कुमार यादव छन् ।

पाण्डे बानेश्वरको सोसाइटी वेलफेयर फेसिलिटिज म्यानेजमेन्ट सर्भिस प्रालिका सञ्चालक हुन् । मरहठ्ठा बालाजुको दूधपोखरी जब प्लेसमेन्ट एन्ड ट्रेनिङ सेन्टर, विवेक यादव कोटेश्वरको एनएन मल्टिप्रपोज प्रालि र राई काठमाडौं–३२ आकाशेपुलस्थित एबीसी जब एन्ड ट्रेनिङ सेन्टर प्रालि र हलेसी सेक्युरिटी सर्भिस प्रालिका सञ्चालक हुन् । यसैगरी पहाडी कोटेश्वरको सिन्धु रोजगारी सेवा, लामिछाने चाबहिलको प्राश्ना जब इन्टरनेसनल मल्टिप्रपोज प्रालि, न्यौपाने कोटेश्वरको क्विकमान्डु एमपी प्रालि र रामवचन कोटेश्वरकै अनमोल जब मल्टिपल प्रालिका सञ्चालक रहेको प्रहरीले जनाएको छ ।

जागिर लगाइदिने बहानामा ठगी गरेको उजुरी परेपछि महानगरीय अपराध महाशाखाको विशेष टोलीले अनुसन्धान क्रममा आइतबार कोटेश्वर, नयाँ बानेश्वर, चाबहिल, बालाजुलगायतका स्थानबाट उनीहरूलाई पक्राउ गरेको प्रहरीले जनाएको छ । कम्पनी खोलेपछि सामाजिक सञ्जाल, पत्रपत्रिका, प्रचार पम्प्लेटका माध्यमबाट ‘घरमै बसीबसी जागिर पाइन्छ’ भनेर प्रचार गर्दै सम्पर्कमा आएकालाई ठगेको उजुरी प्रहरीमा परेको हो । बेरोजगारसँग जागिरका ३ सयदेखि ५ सय रुपैयाँसम्म फाराम शुल्क र १ हजारदेखि ६ हजारसम्म जब ग्यारेन्टी शुल्क लिने गरेको पाइएको महाशाखाका प्रवक्ता एसपी कृष्णप्रसाद कोइरालाले बताए ।

जागिरका लागि फाराम भर्ने व्यक्तिहरूलाई विज्ञापनमा उल्लिखित सर्तबमोजिमको काममा नलगाउने तथा जागिरमा लगाए पनि तोकिएबमोजिम तलब सुविधा नदिई केही समयमै जागिर छोड्न बाध्य पार्ने गरेको प्रहरीको अनुसन्धानमा पाइएको छ । कुनै एक जब सेन्टरमा फाराम दर्ता गरिसकेको व्यक्तिलाई तपार्इंको जागिर पक्का भइसकेको छ भनी एकबाट अर्को जब सेन्टरमा पठाई त्यहाँसमेत फाराम शुल्क असुल्ने गरेको पाइएको महाशाखाले जनाएको छ । पक्राउ परेकाहरूलाई आवश्यक कारबाहीका लागि महानगरीय प्रहरी वृत्त नयाँ बानेश्वर र बालाजुमा पठाइएको छ ।

प्रकाशित : फाल्गुन २४, २०७८ ०८:०६
प्रतिक्रिया
पठाउनुहोस्

अमेरिकी डलर, सुन र पेट्रोलको भाउ उचाइमा

जानकार भन्छन्– ‘संकटले निरन्तरता पाए आउँदा दिनमा मूल्यवृद्धि थप अकासिन्छ, अर्थतन्त्र झनै नराम्रो अवस्थामा पुग्न सक्छ’
यज्ञ बञ्जाडे, हेमन्त जोशी

काठमाडौँ — मुलुकको आर्थिक अवस्था संकटको संघारमा रहेका बेला आन्तरिक बजारमा पनि अमेरिकी डलर, सुन, पेट्रोलियमलगायतको मूल्यले नयाँ उचाइ कायम गरेका छन् । यस्तो अवस्थाले निरन्तरता पाए आउँदा दिनमा मूल्यवृद्धि अझै अकासिनुका साथै अर्थतन्त्र झनै नराम्रो अवस्थामा पुग्ने जानकारहरू बताउँछन् ।

नेपाल राष्ट्र बैंकले मंगलबारका लागि एक अमेरिकी डलरको विनिमय दर १ सय २३.४४ रुपैयाँ (बिक्रीदर) तोकेको छ । यो हालसम्मकै उच्च हो । यसअघि २०७७ वैशाख १० मा डलरको भाउ त्यतिबेलासम्मकै उच्च १२३.२४ रुपैयाँसम्म पुगेको थियो । करिब ३ महिना अघिसम्म डलर उकालो लाग्ने दरमा केही कमी आएपछि केही सातायता निरन्तर उकालो लाग्दै आएको छ ।

गत असारको तुलनामा पुससम्म अमेरिकी डलरसँग नेपाली रुपैयाँ ०.९४ प्रतिशतले अधिमूल्यन भएको राष्ट्र बैंकको प्रतिवेदनमा उल्लेख छ । गत आर्थिक वर्षको सोही अवधिमा नेपाली रुपैयाँ २.८७ प्रतिशतले अधिमूल्यन भएको थियो । पछिल्ला ४ वर्षमा अमेरिकी डलर भाउ करिब १९ रुपैयाँ बढेको छ । डिसेम्बर २०१७ मा एक अमेरिकी डलरको भाउ १०२ रुपैयाँ मात्रै थियो । विश्वबजारमा अमेरिकी डलरको माग अकासिएपछि भाउ पनि बढेको हो ।

डलरसँगै आन्तरिक बजारमा सुनको मूल्य पनि लगातार उकालो लाग्दै आएको छ । सोही क्रममा सोमबार नेपाली बजारमा सुनको भाउ प्रतितोला १ लाख ३ हजार रुपैयाँ कायम भएको छ । आइतबारको तुलनामा सोमबार तोलामा १ हजार १ सय रुपैयाँ बढेर प्रतितोला १ लाख ३ हजार रुपैयाँ कायम भएको नेपाल सुनचाँदी व्यवसायी महासंघले जनाएको छ । यसअघि आइतबार प्रतितोला १ लाख १ हजार ९ सय रुपैयाँमा सुनको कारोबार भएको थियो । यसअघि २०७७ साउन २३ गते सुनको मूल्य प्रतितोला १ लाख ३ हजार ५ सय रुपैयाँसम्म पुगेको थियो । सोमबार दिउँसोसम्म अन्तर्राष्ट्रिय बजारमा सुनको मूल्य प्रतिऔंस १ हजार ९ सय ८० अमेरिकी डलरभन्दा माथि पुगेको थियो । नेपाली समयअनुसार मध्याह्नपछि सुनको मूल्यको वृद्धिदरमा कमी आए पनि बढ्ने क्रम भने जारी छ ।

अन्तर्राष्ट्रिय बजारमा सुनको मूल्य कतिले बढ्छ त्यसका आधारमा मंगलबार नेपाली बजारमा सुनको मूल्य कति माथि पुग्छ भन्ने तय हुने जानकारहरू बताउँछन् । अन्तर्राष्ट्रिय बजारमा सुनको भाउ बढेकाले नेपालमा असर परेको महासंघको दाबी छ । महासंघका अनुसार युक्रेनमाथि रुसको आक्रमणलाई लिएर अमेरिका, बेलायतलगायत राष्ट्रसँग रुसको विवाद बढ्दा सुनको माग बढ्न गएको हो । त्यसको असरले केही सातायता नेपाली बजारमा सुनचाँदीको मूल्य अकासिएको महासंघको निष्कर्ष छ । भारतीय मुद्रा कमजोर भएकाले नेपाली मुद्राको भाउ अवमूल्यन भएको हो । नेरु र भारुबीच स्थिर विनिमय दर छ । कुल वैदेशिक व्यापारको ठूलो हिस्सा भारतमा निर्भर रहेकाले भारुको विनिमय दर घटबढ भएपछि नेरु पनि प्रत्यक्ष प्रभावित हुन्छ । सोमबार साँझसम्म भारुसँग एक अमेरिकी डलरको विनिमय दर ७७ रुपैयाँ कायम भएको छ । यो पनि हालसम्मै उच्च हो । त्यसको असरले नेरुको मूल्य पनि अवमूल्यन भएको हो । चालु आर्थिक वर्षको पहिलो ६ महिनाको तथ्यांक हेर्दा नेपालको कुल वैदेशिक व्यापारको करिब ६३ प्रतिशत हिस्सा भारत केन्द्रित छ । विगतका वर्षमा कुल व्यापारमा यस्तो हिस्सा ६५ प्रतिशतसम्म पनि पुगेको थियो ।

चाँदीको मूल्य पनि सोमबार प्रतितोला १० रुपैयाँ बढेर १ हजार ४ सय २५ रुपैयाँमा कारोबार भएको छ । आइतबार चाँदीको मूल्य प्रतितोला १ हजार ४ सय १५ रुपैयाँ थियो ।

विश्वबजारमा मूल्य बढेर आएको भन्दै नेपाल आयल निगमले गत साता इन्धन (पेट्रोलियम पदार्थ)को मूल्य बढाएर हालसम्मकै उच्च कायम गरेको छ । यसअनुसार प्रतिलिटर पेट्रोल मूल्य १ सय ५० रुपैयाँ छ । २०७० फागुन ३० मा प्रतिलिटर पेट्रोलको मूल्य १ सय ४० रुपैयाँ थियो । त्यतिबेला अन्तर्राष्ट्रिय बजारमा कच्चातेलको मूल्य प्रतिब्यारेल १ सय ८ अमेरिकी डलर र डलरसँग नेपाली मुद्राको विनिमय दर ९८ रुपैयाँ मात्र थियो । त्यसयता अन्तर्राष्ट्रिय बजारमा तेलको मूल्य र अमेरिकी डलरको विनिमय दर निरन्तर उकालो लागेका छन् । सोही क्रममा सोमबार साँझसम्म अन्तर्राष्ट्रिय बजारमा कच्चा तेलको मूल्य प्रतिब्यारेल १ सय २० अमेरिकी डलर हाराहारीमा छ ।

गत माघ ५ मा पेट्रोलको मूल्य प्रतिलिटर १ सय ३९ रुपैयाँ रहेकामा माघ १८ मा १ सय ४२ रुपैयाँ पुगेको थियो । त्यसयता हरेक साता पेट्रोलको मूल्यले लगातार नयाँ कीर्तिमानी कायम गर्दै आएको छ ।

प्रकाशित : फाल्गुन २४, २०७८ ०७:५७
पूरा पढ्नुहोस्
प्रतिक्रिया
पठाउनुहोस्
x
×