लागूऔषधसहित भारतीय नागरिक पक्राउ- उपत्यका - कान्तिपुर समाचार
कान्तिपुर वेबसाईट
AdvertisementAdvertisement

लागूऔषधसहित भारतीय नागरिक पक्राउ

रासस

काठमाडौँ — नेपाल प्रहरीले काठमाडौंको नागढुङ्गाबाट लागूऔषधसहित एकजनालाई पक्राउ गरेको छ ।

वीरगञ्जबाट काठमाडौं आउँदै गरेको प्रदेश २–००३–००१ ख ३६२२ नम्बरको यात्रुबाहक बस चेकजाँचका क्रममा लागूऔषधसहित भारत विहारका २० वर्षीय प्रेमकुमार महतोलाई सोमबार महानगरीय प्रहरी प्रभाग नागढुङ्गाको टोलीले पक्राउ गरी मंगलबार सार्वजनिक गरेको हो ।

महानगरीय प्रहरी परिसर काठमाडौंका प्रवक्ता, प्रहरी उपरीक्षक दिनेशराज मैनालीले पक्राउ परेका महतोले झोलामा लागूऔषध लिएर काठमाडौंभित्र प्रवेश गर्दै गरेको अवस्थामा प्रहरीले पक्राउ गरेको जानकारी दिए ।

प्रहरीले महतोसँग २०० एम्पुल नुर्फिन, २०० एम्पुल फेनार्गन र २०० एम्पुल डाइजेपाम बरामद गरेको हो । पक्राउ परेका महतोलाई लागूऔषध नियन्त्रण ऐन–२०३३ बमोजिम महानगरीय प्रहरी वृत्त थानकोटबाट अनुसन्धान भइरहेको उनले बताए ।

प्रकाशित : पुस २७, २०७८ २१:४४
प्रतिक्रिया
पठाउनुहोस्

त्रिशूली अस्पताल तोडफोड

कान्तिपुर संवाददाता

नुवाकोट — चिकित्सकको लापरबाहीले सुत्केरीको मृत्यु भएको भन्दै आफन्तहरुले त्रिशूलीस्थित जिल्ला अस्पताल तोडफोड गरेका छन् । सोमबार सुत्केरी भएकी विदुर–७ तुप्चेकी २७ वर्षीया सावित्री कोइराला (अर्याल) को उपचारकै क्रममा मृत्यु भएको थियो ।

सालनाल नझरेपछि चिकित्सकले उच्च डोजको औषधि प्रयोग गर्दा कोइरालाको मृत्यु भएको आफन्तहरुको आरोप छ । अस्पतालका मेडिकल सुपरिन्टेन्डेन्ट दीपेन्द्र पाण्डेले भने बढी रक्तस्राव हुँदा मृत्यु भएको दाबी गरे । ‘लापरबाही गरिएको होइन । जति गर्दा पनि बचाउन सकिएन । मेडिकल कम्प्लिकेसन हो,’ उनले भने । घटनापछि आफन्तले अस्पतालमा तोडफोड गरेको उनको आरोप छ । तर मृतकका बुबा रामचन्द्र कोइरालाले कुनै तोडफोड नगरेको बताए । ‘एक बाबुले यस्तो पनि हुन्छ भनेर टेबुलमा मुड्की बजारेका हुन्,’ उनले भने, ‘हामीले कुनै तोडफोड गरेका छैनौं । त्यतिकै आरोप लगाए ।’

नवजात शिशुको हाल कान्ति अस्पतालको भेन्टिलेटरमा उपचार भइरहेको छ ।

प्रकाशित : पुस २७, २०७८ २१:३७
पूरा पढ्नुहोस्
प्रतिक्रिया
पठाउनुहोस्
×