कर्मचारीकै मिलेमतोमा बैंकको रकम चोरी, चार पक्राउ- उपत्यका - कान्तिपुर समाचार

कर्मचारीकै मिलेमतोमा बैंकको रकम चोरी, चार पक्राउ

रासस

काठमाडौँ — कर्मचारीकै मिलेमतोमा एनआइसी एसिया बैंकको लाखौं रुपैयाँ चोरी भएको पाइएको छ । महानगरीय प्रहरी परिसरका अनुसार उक्त बैंकको नगद सङ्कलक काठमाडौंको काँडाघारी बस्ने प्रदीप खत्रीसहितका चार व्यक्तिलाई पक्राउ गरेपछि उक्त रहस्य खुलेको हो ।

उनले काठमाडौं महानगरपाकिला–१० को कार्यालयबाट १२ लाख ४५ हजार रुपैयाँ र मेट लाइफ इन्योरेन्स शान्तिनगरबाट तीन लाख २५ हजार गरी १६ लाख ३० हजार बैंक दाखिला गर्न जाने क्रममा लुटपाट भएको भनी प्रहरीमा सूचना प्राप्त भएको थियो ।

पुस १८ गतेको उक्त घटनाबारे प्रहरी वृत्त बानेश्वर र महानगरीय अपराध महाशाखाको संयुक्त टोलीबाट अनुसन्धान गर्दा खत्रीमाथि शङ्का लागेपछि पक्राउ परेका थिए । उनीमाथिको अनुसन्धानमा मिलेमतोमा उक्त नगद चोरी गरी भागबण्डा गरेको फेला परेको प्रहरी उपरीक्षक दिनेशराज मैनालीले जानकारी दिए ।

प्रहरीले चोरीमा सङ्लग्न खत्रीसहित ललितपुर धापाखेल बस्ने २४ वर्षीय विमल तामाङ, रामेछाप घर भई ललितपुर बस्ने राज पौडेल र अनिश खड्कालाई पक्राउ गरेको शुक्रबार एक सूचना जारी गरी जनाएको छ ।

उनीहरूले सबै पैसा भागबण्डा लगाएर बाँडेको फेला परेको जानकरी दिँदै प्रहरीले अहिलेसम्म १३ लाख ४६ हजार फेला परेको र दुई लाख ८२ हजार भने खर्च गरेको खुलेको छ ।

प्रकाशित : पुस २३, २०७८ २०:५२
प्रतिक्रिया
पठाउनुहोस्

'ओलीले अम्बाको पात खाने भन्नुभयो, देउवाले खोप-खोप-खोप भनेको बुझ्नुभयो होला नि'

आनन्द गौतम

ताप्लेजुङ — नेपाली कांग्रेसका महामन्त्री विश्वप्रकास शर्माले आफ्ना कार्यकर्तालाई निर्वाचन केन्द्रित हुन आग्रह गरेका छन् । पार्टीको एघारौं जिल्ला अधिवेशन उद्घाटन कार्यक्रमपछि महामन्त्री शर्माले यस्तो बताएका हुन् ।

अधिवेशन उद्घाटनपछि सिदिङवा गाउँपालिकाको केन्द्र साब्लाखु भञ्ज्याङ पुगेका नेता शर्माले वैशाखमा हुने स्थानीय तह, अर्को आर्थिक वर्षमा हुने प्रतिनिधि र प्रदेशसभाको निर्वाचनमा लाग्न अपिल गरेका थिए ।

‘हिजो एमाले र माओवादी एक भए, अबको ५० वर्ष हामी शासन गर्छौं, गर्छौं, गर्छौं भने, हामीले ठीकै छनि त भन्यौं । तर, जनता कोरोना कहरले आक्रान्त भइरहँदा बालुवाटारमा कुर्सीको तानातान गरिरहे,’ महामन्त्री शर्माले भने ।

भात पकाउँदा पानी र आगो दुवै चाहिने उल्लेख गर्दै शर्माले आगो-पानी दुवै भए पनि भान्से बसेका ओलीले चलाउन नसक्दा नेकपा विभाजन भएको बताए ।

यस्तै शर्माले कोरोना विरुद्धको खोपको जस कांग्रेस सभापति देउवालाई नै दिनुपर्ने संकेत गरेका थिए । कोरोना महामारी उत्कर्षमा पुगेका बेला पूर्वप्रधानमन्त्री केपी ओलीले खोपको कुरा नगरेर अवैज्ञानिक तर्क गरेको स्मरण गर्दै शर्माले खोपको जस प्रधानमन्त्री शेरबहादुर देउवालाई दिनुपर्ने बताए ।

शर्माले भने, ‘ओलीले प्रष्ट भाषामा बुझिने गरी हर्रो र अम्बाको पात पकाएर खाँदा कोरोना चट् हुन्छ भन्नुभयो, हाम्रा सभापतिको बोली बुझिँदैन भन्छन् तर उहाँले खोप- खोप-खोप भनेको त तपाइँहरूले बुझ्नुभयो होला नि ।’ नेताको बोली नभएर कर्म र भाषण नभएर शासन बुझिने हुनुपर्नेमा शर्माको भनाइ थियो ।

प्रकाशित : पुस २३, २०७८ २०:३९
पूरा पढ्नुहोस्
प्रतिक्रिया
पठाउनुहोस्
×