यात्रुसँग बढी भाडा लिन खोज्‍ने ९ पक्राउ- उपत्यका - कान्तिपुर समाचार
कान्तिपुर वेबसाईट
AdvertisementAdvertisement

यात्रुसँग बढी भाडा लिन खोज्‍ने ९ पक्राउ

कान्तिपुर संवाददाता

काठमाडौँ — उपत्यका बाहिर जाने यात्रुसँग तोकिएकोभन्दा बढी भाडा लिन खोज्‍ने ९ जनालाई प्रहरीले पक्राउ गरेको छ । विभिन्‍न टिकट काउन्टरमा आबद्ध भई बिना परिचयपत्र बसपार्क आसपास यात्रुलाई टिकट काटिदिने भन्दै मोलमोलाई गर्ने भरतपुर चितवनका ३८ वर्षीय समिर श्रेष्ठ, धनकुटाका ३० वर्षीय किरण लिम्बू र सुनसरीका २८ वर्षीय सविन राईलाई प्रहरीले पक्राउ गरिएको ट्राफिक प्रहरी महाशाखाले जनाएको छ ।

त्यस्तै, टिकट काउन्टरको कर्मचारी हुँ भन्दै भाडा बार्गेनिङ गर्ने काठमाडौं बस्ने ४६ वर्षीय राज ठकुरी, दाङ घोराहीका २९ वर्षीय विशाल गुरुङ र कैलालीका २९ वर्षीय रमेश कठायतलाई गोगंबुबाट पक्राउ गरिएको महाशाखाका प्रमुख एसएसपी जनक भट्टराईले जानकारी दिए । उनीहरूलाई आवश्यक कारबाहीका लागि प्रहरी प्रभाग नयाँ बासपार्कमा बुझाइएको उनले बताए ।

त्यसैगरी कलंकीबाट ३९ वर्षीय नवीन केसी र बल्खुबाट शुभयात्री काउन्टरमा काम गर्ने निजगढका अरुण मगर र जाजरकोट घर भई कीर्तिपुर बस्ने नारायणी काउन्टरका ३७ वर्षीय विनोद रानालाई समेत पक्राउ गरी कारबाहीको लागि प्रहरी वृत्त कालीमाटीमा बुझाइएको महाशाखाले जनाएको छ ।

यात्रुलाई परेको समस्या समधान गर्न महाशाखाले उपत्यकाको विभिन्‍न १४ स्थानमा यात्रु सहायता कक्ष स्थापना गरेको छ । चाडपर्वको समयमा उपत्यका बाहिरिने यात्रुहरुको चाप अत्याधिक हुँदा भिडभाडको मौका छोपी यात्रुहरुलाई ठगी गर्ने, बढी भाडा लिने, डबल टिकट काट्ने समूहलाई नियन्त्रण गर्न र सहज र सुरक्षित यात्राको व्यवस्था गर्न ट्राफिक प्रहरीले विशेष निगरानी एवं अनुगमन गर्न टोली परिचालन गरेको छ ।

तोकिएको टिकट काउन्टरमा परिचयपत्र बहाकहरुले मात्र टिकट काट्ने व्यवस्था भएपनि अनाधिकृत व्यक्तिहरूले बिचौलिया बनेर यात्रुसँग मोलमोलाई गरी तोकिएको भन्दाबढी भाडा लिँदै गरेको अवस्थामा उनीहरुलाई पक्राउ गरिएको एसएसपी भट्टराईले जानकारी दिए ।

प्रकाशित : आश्विन २१, २०७८ १५:१५
प्रतिक्रिया
पठाउनुहोस्

गोरखा दरबारको दसैंघरमा राखियो जमरा

हरिराम उप्रेती

गोरखा — हिन्दू नेपालीहरुको प्रमुख चाड दसैंको पहिलो दिन आज (बिहीबार) घरघरमा वैदिक विधिपूर्वक दियो कलश र गणेश स्थापना गरेर घटस्थापना गरिएको छ । ऐतिहासिक गोरखा दरबारमा पनि विधिपूर्वक पूजा गरी ११.४६ बजेको १४ घडी १८ पलाको उत्तम साइतमा जमरा राखियो ।

घडी पला अनुसार उत्तम साइतमा विधिपूर्वक गोरखकाली मन्दिरको दसैं घर र जमरा कोठामा जमरा राखिएको गोरखा दरबारका पूजारी शारदा प्रसाद भट्टराईले बताए । दसैंघर र जमरा कोठामा २ पाथी ४ माना, गोरखनाथ गुफामा १ पाथी, उपल्लो कोटमा २ माना र तल्लो कोटमा १ माना जौको जमरा राखिएको उनले बताए ।

‘परापूर्वक कालदेखिको प्रचलनलाई निरन्तरता दिँदै आज जमरा राख्यौँ, घटस्थापना स्थापना गरेर आजै शैलिपुत्री भगवतिको पूजा भएको छ,’ भट्टराईले भने । नवरात्रभर गोरखा दरबारमा विशेष पूजा हुँदैआएको छ । गोरखा दरबारमा पूजाका लागि बिहीबार साँझबाटै सूसारेहरु सक्रिय थिए ।

बुधबार बिहान ५.४० को शुभ साइतमा हर्षबढाइँका साथ कैलाशकोठाबाट मूल पूजाकोठामा भगवति सवार गरिएको गोरखा दरबार हेरचाह अड्डाका प्रमुख हरि भुसालले बताए । ‘उज्यालो पनि होइन अँध्यारो पनि होइन, नाडीको रौँ देखिने उज्यालोमा देवता सार्ने उहिलेदेखिकै चलन हो,’ उनले भने, ‘गोरखा दरबार पुनर्निर्माणको क्रममा छ, पहिले जस्तै कैलाशकोठाबाट रंगमहल हुँदै कालीका मन्दिरको उपभोग गर्न सकेनौँ, स्थान यताउता भए पनि संस्कृति गतिविधिलाई भने निरन्तरता दियौँ ।’ बुधबार चित्रा नक्षर र बैघेटी योग परेकाले स्वस्ती पूजा पनि भएको उनले बताए ।

भुसालका अनुसार दसैंभर हुने विशेष पूजाका लागि कलह, भाडार्वत थरघरको परम्पराअनुसार सफा गरिएको छ । दसैंको पहिलो दिन १५ ब्राह्मण र १० सूसारे तथा भृकोटे पूजामा संलग्न छन् । नियमित पूजा बाहेक कालिका र गोरखनाथमा दुईवटा सरकारी बली पनि चढाइएको उनले बताए । नवरात्रभर पञ्चमीसम्म गोरखा दरबारमा परम्परादेखिको विशेष पूजालाई निरन्तरता दिन सबै तयारी गरिएको भुसालको भनाइ छ ।


प्रकाशित : आश्विन २१, २०७८ १४:४२
पूरा पढ्नुहोस्
प्रतिक्रिया
पठाउनुहोस्
×