'नागिचा प्याखँ' पुन: सञ्चालन- उपत्यका - कान्तिपुर समाचार
कान्तिपुर वेबसाईट
AdvertisementAdvertisement

'नागिचा प्याखँ' पुन: सञ्चालन

सीमा तामाङ

काठमाडौँ — काठमाडौं महानगरपालिकाको आर्थिक अनुदानमा 'नागिचा प्याखँ' (नाच) पुन: सञ्चालन भएको छ । आर्थिक अभावका कारण २०७० सालपछि रोकिएको नाच यस वर्षदेखि सुरु भएको हो ।

महानगरको वडा–७ चारुमती विहारमा ०७० सालमा प्रदर्शन भएको नाच त्यसपछि ०७८ असोज पहिलो साता प्रदर्शन गरिएको हो । हरेक वर्ष येंया पुन्हीबाट सुरु भएर ३ दिनसम्म चाबाहिल, जय बागेश्वरीलगायतका ९ ठाउँमा नाच प्रदर्शन गर्ने परम्परा छ । यो नाच मंगलबार बेलुका साढे ६ बजे जयबागेश्वरी मन्दिर परिसरमा नचाइएको छ ।

महानगरका मेयर विद्यासुन्दर शाक्यले असोज पहिलो साता नाचमा बजाइने बाद्य सामाग्री गुठीयारहरुलाई दिएर नाच शुभारम्भ गरेका थिए । असोज पहिलो साता विहारमा नाच्नुअघि चावहिल स्तुपनजिक रहेको नास द्य: (नाचका देवता) को पूजा गरेर नाच सुरु गरिएको थियो । यो पूजा जयबागेश्वरीका गुरुजुले गराउने प्रचलन छ ।

मेयर शाक्यले, आर्थिक अभाव भएर मौलिक र परम्परागत कुनै पनि सांस्कृतिक चलन नरोकिने बताए । ‘गुठीयारहरुसँग समन्वय भएका सबै ठाउँमा हामी पुगेका छौं । गुठीयारको सहभागिता भएन भने हाम्रो प्रयास अपर्याप्त हुन्छ,’ उनले भने, ‘त्यसको संरक्षणमा समस्या हुन सक्छ । हामी सम्पदा बनाउँछौं, जोगाउँछौं र त्यसलाई जीवन्त बनाउने क्रियाकलापका लागि गुठीयारलाई जिम्मा लगाउँछौं ।’

यो नाच पशुपति क्षेत्रमा रहेको अमालकोट कचहरीले सञ्चालन गर्ने गरेको थियो । ‘यसका लागि महानगरले एक लाख रुपैयाँ दिने गथ्र्यो, त्यो रकमले नाचसँग सम्बन्धित क्रियाकलाप सञ्चालन गर्न नपुग्ने भएपछि बन्द भएको थियो,’ नागिचा प्याखँ संरक्षण समितिका अध्यक्ष जलाद वैद्यले भने, ‘महानगरले नाचलाई पुनर्जीवन दियो, यसबाट स्थानीयहरुमा खुशीको सञ्चार प्रवाह भएको छ ।’

नाचलाई नियमित गर्न महानगरले गत वर्ष १० लाख रुपैयाँ विनियोजन गरेको थियो । जसमध्ये ६ लाख रुपैयाँ निकासा भइसकेको सम्पदा तथा पर्यटन विभागका उपनिर्देशक सृजु प्रधानले बताइन् । ‘नाच पुन:सञ्चालन गर्न प्रशिक्षण चलाउनुपर्ने, बाजा, पोसाक, मुकुट र गहना किन्नुपर्ने भएकोले गएको बर्ष धेरै रकम थियो,’ उनले भनिन्, ‘अहिलेसम्ममा नाच सञ्चालन गर्ने आधार तयार भएको छ । यस वर्षका लागि ५ लाख रुपैयाँ छ ।’


प्रकाशित : आश्विन ५, २०७८ २२:०१
प्रतिक्रिया
पठाउनुहोस्

भान्सामा एलपी ग्यास होइन, विद्युतीय चुल्हो राखौं : ऊर्जामन्त्री भुसाल

कान्तिपुर संवाददाता

काठमाडौँ — ऊर्जा जलस्रोत तथा सिँचाइमन्त्री पम्फा भुसालले घरायसी उपभोगमा प्रयोग हुने विद्युत् महसुल दर घट्ने भएकाले भान्सामा विद्युतीय चुल्हो प्रयोग गर्न अपिल गरेकी छन् । उनले आफ्नै देशको उत्पादन विद्युत् उपभोग गरेर लाभान्वित हुन आग्रह गरिन् ।

ऊर्जा क्षेत्रमा उत्कृष्ट व्यावसायिक सीप केन्द्रको मंगलबार शुभारम्भ गर्दै उनले भनिन्, 'घरायसी उपभोगको विद्युत् महसुल दरमा कम गरेको छु । नयाँ महसुल दर लागू भएपछि एलपी ग्यासभन्दा विद्युतीय चुल्हो सस्तो हुन्छ ।' ललितपुरको थेँचोमा स्नाइडर इलेक्ट्रिक फाउन्डेशनले डन बोस्को इन्स्टिच्युटसँगको साझेदारीमा नेपालमा पहिलो पटक त्यस्तो केन्द्र शुभारम्भ गरिएको हो ।

आफ्नै देशमा उत्पादित विद्युत् खपत गरे चुलिएको व्यापारघाटा कम हुने विश्वास व्यक्त गर्दै मन्त्री भुसालले समृद्धिका लागि पनि विद्युत् उत्पादन र खपतलाई सरकारले केन्द्रमा राखेको बताइन् । नेपाल विद्युत् प्राधिकरणले २० युनिटसम्मको बिजुली निःशुल्क उपलब्ध गराउने र कृषि सिँचाइमा प्रयोग हुने विद्युत्मा सहुलियत दिने निर्णय गरेको जानकारी गराउँदै उनले सो निर्णय कार्यान्वयन भएसँगै जनताले राहत पाउने विश्वास व्यक्त गरिन् । गोदावरी नगरपालिकाका प्रमुख गजेन्द्र महर्जनले आफ्नो क्षेत्रमा ऊर्जाको उत्कृष्ट केन्द्र सञ्चालन भई दक्ष जनशक्ति उत्पादन हुनु गौरवको विषय भएको भन्दै त्यसका लागि थप सहयोग गर्न नगरपालिका तयार रहेको बताइन् ।

प्रकाशित : आश्विन ५, २०७८ २१:५३
पूरा पढ्नुहोस्
प्रतिक्रिया
पठाउनुहोस्
×