ललितपुरमा बैंकिङ कसुरका फरार प्रतिवादी पक्राउ- उपत्यका - कान्तिपुर समाचार
कान्तिपुर वेबसाईट
AdvertisementAdvertisement

ललितपुरमा बैंकिङ कसुरका फरार प्रतिवादी पक्राउ

कान्तिपुर संवाददाता

ललितपुर — बैंकिङ कसुरका फरार प्रतिवादीलाई प्रहरीले पक्राउ गरेको छ । पक्राउ पर्नेमा खोटाङ दिक्तेल रुपाकोट मझुवागढी नगरपालिका–१० घरभई मध्यपुर थिमि नगरपालिका–९ बोडे बस्ने ३२ वर्षीय हिरालाल श्रेष्ठ रहेका छन् । 

बैंकिङ कसुर मुद्दामा उच्च अदालत पाटनको २०७८ असार २९ गतेको फैसलाले १० दिन कैद र २५ लाख रुपैयाँ जरिवाना ठहर भएपछि फरार रहेका श्रेष्ठलाई शुक्रबार प्रहरी प्रधान कार्यालय केन्द्रीय अनुसन्धान ब्यूरोले ललितपुरबाट पक्राउ गरेको हो । श्रेष्ठले आफ्नो खातामा पर्याप्त मौज्दात रकम नभएको भन्ने जानी–जानी पीडितहरूलाई झूक्याई सेन्चुरी बैंकको चेक दिई बैंकिङ कसुरजन्य अपराध गरेको ठहर गरी अदालतले उक्त फैसला गरेको थियो ।

श्रेष्ठलाई फैसला कार्यान्वयनका लागि जिल्ला अदालत ललितपुरमा पेस गरिएको ब्यूरोले जनाएको छ ।

प्रकाशित : आश्विन १, २०७८ १७:११
प्रतिक्रिया
पठाउनुहोस्

भ्रमवश एमालेमा बसिरहेकाहरु ढिलो चाँडो हाम्रो पार्टीमा आउनेछन् : नेपाल

कान्तिपुर संवाददाता

काठमाडौँ — नेकपा (एकीकृत समाजवादी) पार्टीका अध्यक्ष माधवकुमार नेपालले भ्रमका कारण एमालेमा रहेका मानिसहरु ढिलो चाँडो आफ्नो पार्टीमा आउने बताएका छन् । 

शुक्रबार एकीकृत वैदेशिक रोजगार व्यवसायी संगठनले आयोजना गरेको व्यवसायी भेलामा बोल्दै अध्यक्ष नेपालले कतिपय मानिसहरु अल्मलिएर एमालेमै बसेको भन्दै असल भावना भएका मानिसहरु ढिलो चाँडो एकीकृत समाजवादीमा आउने बताएका हुन् । उनले विगतमा एमालेभित्र बनेका समानान्तर कमिटीहरु समाजवादीमा रुपान्तरित भइरहेको भन्दै आफ्नो पार्टी नितान्त नयाँ नभएको उल्लेख गरे ।

'पार्टीको ७७ वटै जिल्लामा संगठन बनिरहेको पनि उनले बताए । पार्टीको ७७ वटै जिल्लामा संगठनहरु बनिरहेका छन् । हिजो हामीले २०७७ चैत्र ४ र ५ गते पश्चात् बनाएका पार्टी र सबै जनवर्गीय संगठनहरु रुपान्तरित भइरहेका छन् । त्यस अर्थमा यो नितान्त नयाँ पार्टी होइन । पुरानो पार्टी भित्रको क्रान्तिकारी धारले, नेकपा (एमाले) भित्रको क्रान्तिकारी धारले सुरु गरेको यो पार्टीको नयाँ यात्रा हो । क्रान्तिकारीहरु, परिवर्तनकारीहरु, इमान्दार र निष्ठावानहरु अहिले यो पार्टीमा आबद्ध भएका छन्,' उनले भने, 'कतिपय मानिसहरु अझै त्यहाँ अल्मलिएका होलान्, असल मानिसहरु पनि भ्रमवश बसिरहेका होलान् । ती व्यक्तिहरुले ढिलो चाँडो हाम्रो यो पार्टीमा आउनैपर्छ । उहाँहरुलाई हामी स्वागत गर्नेछौं ।’

अध्यक्ष नेपालले व्यवसायीहरुलाई राष्ट्रिय अर्थतन्त्रको विकासमा सहयोग पुर्‍याउन पनि आग्रह गरे । व्यवसायीहरुलाई जलविद्युत्, पर्यटन, कृषि लगायतका क्षेत्रमा लगानी गरी राष्ट्र निर्माणमा योगदान पुर्‍याउन उनको आग्रह छ ।

प्रकाशित : आश्विन १, २०७८ १६:५५
पूरा पढ्नुहोस्
प्रतिक्रिया
पठाउनुहोस्
×