अर्कैको जग्गा बिक्री गर्ने भन्दै ठगी
काठमाडौँ — जग्गा बिक्री गर्ने भन्दै ६८ लाख ९० हजार रुपैयाँ ठगी गरेको अभियोगमा प्रहरीले एक जनालाई पक्राउ गरेको छ । पक्राउ पर्नेमा काठमाडौं–३२ बस्ने धरान–९ का ३६ वर्षीय रुसिल कटुवाल छन् ।
काठमाडौं–१० बस्ने मोरङको केराबारीका धीरजकुमार दाहालसँग मिलेर कटुवालले एक व्यक्तिबाट मोरङको जग्गाको मूल्य कायम गरी काठमाडौंको सुकेधारामा बैना गरेका थिए । उक्त रकम लिई जग्गा पास नगरी सम्पर्कविहीन भएपछि पीडितले प्रहरीलाई जानकारी गराएका थिए ।
साविक केराबारी गाविस–६ मा रहेको कित्ता नम्बर ६३८ को क्षेत्रफल ०–१–१० र कित्ता नम्बर ६४० को क्षेत्रफल ०–७–२–० को जग्गाको मूल्य कायम गरी बैना लिएपछि उनीहरू फरार भएको पीडितको भनाइ छ ।
मालपोत कार्यालय मोरङमा गई बुझ्दा अन्य व्यक्तिहरूकै नाममा बिक्री भइसकेको जग्गा पुनः आफूलाई बिक्री गर्ने योजना बनाएको बुझेको पीडितले बताए । कटुवाललाई महानगरीय अपराध महाशाखाले मंगलबार पक्राउ गरी ठगी कसुरमा थप अनुसन्धानका लागि काठमाडौं परिसर पठाएको छ ।
प्रकाशित : भाद्र ३१, २०७८ ०७:१४