२०७२ वैशाखको भूकम्पका कारण चाँगुनारायण मन्दिर परिसरको उत्तर–पश्चिम (किलेश्वर महादेव पुजारी पाटी) सँगैको क्षेत्र भासियो । भूक्षय नियन्त्रण नगरी चौघेरा सत्तल (पाटी) मन्दिर पुनर्निर्माण गर्न सक्ने अवस्था रहेन । पुरातत्त्व विभागले टेको र पर्खाल लगाएपछि मात्र चौघेरा सत्तलको पुनर्निर्माण थालेको छ । अझै उक्त क्षेत्र भूक्षयको जोखिममा छ ।
नेपालको पयर्टन प्रवर्द्धन र वातावरणीय मुद्दामा विश्व समुदायको ध्यानाकर्षण गर्न ‘विश्व भ्लग प्रतियोगिता’ हुने भएको छ । प्रतियोगितामा ११ देशका ११ जना फिल्मकर्मी तथा भ्लगरहरूको सहभागिता रहने आयोजक पार्टी नेपालले जनाएको छ ।
काठमाडौं महानगरपालिका वडा नं–१९ का अध्यक्ष शशीलाल श्रेष्ठको बिहीबार निधन भएको छ । ६५ वर्षीय उनको निर्भिक अस्पतालमा उपचारको क्रममा साँझ ७ बजे निधन भएको हो ।
सरकारले काठमाडौं उपत्यकाको फोहोर बन्चरेडाँडामा व्यवस्थापन गर्ने भएको छ । सिसडोल ल्यान्डफिल साइट जाने सडक बिग्रिएसँगै स्थानीयले अवरोध गरेपछि एक महिनादेखि उपत्यकामा फोहोर थुप्रिएको छ । सिसडोलका स्थानीय र महानगरबीच मंगलबार सहमति भएपछि बुधबारदेखि फोहोर उठाउन थालिएको छ ।
नागढुंगा–सिस्नेखोला सुरुङ मार्ग आयोजनाको धादिङतर्फको प्रवेशद्वार धुनीबेंसी–९ मा पानी पर्नासाथ पहिरो खस्ने गरेको छ । सिस्नेखोलास्थित खत्रीपौवा डाँडोबाट लेदो माटोसहितको पहिरो खस्दा सडक अवरुद्ध हुने गरेको छ । झरिसकेको पहिरोलाई पालले छोपिएको भए पनि माथिबाट लेदो खसिरहेको छ ।
पूर्वभूमिसुधार तथा व्यवस्थामन्त्री जगन्नाथ आचार्यले हनुमन्ते खोलाले चर्चेको जमिन आफ्नो नाममा दर्ता गरी बिक्री वितरण गरेको ४७ वर्षपछि अख्तियार दुरुपयोग अनुसन्धान आयोगले अनुसन्धान अघि बढाएको छ । खोला बगेको जग्गा व्यक्ति विशेषको नाममा दर्ता गरी बिक्री वितरण गरेको पाइएको भन्दै आयोगले अनुसन्धान नसकिएसम्म हक हस्तान्तरण हुन नपाउने गरी जग्गा रोक्का राख्न समेत निर्देशन दिएको छ ।
प्रहरीले अवैध हुण्डी कारोबारमा संलग्नको अभियोगमा २ जनालाई पक्राउ गरेको छ । काठमाडौं–१४ कुलेश्वरस्थित फलफूल बजारबाट अवैध हुण्डी कारोबारमा संलग्न रहेको अभियोग मंगलबार २ जनालाई ३० लाख ७ हजार रुपैयाँसहित पक्राउ गरेको हो ।
सूर्यविनायक नगरपालिकाका ३४ शिक्षकले स्वैच्छिक अवकाश लिएका छन् । नगरभित्रका सामुदायिक विद्यालयमा दरबन्दी मिलान र व्यवस्थापन गर्न निवृत्तिभरण भइसकेका र अनिवार्य अवकाश चाहने शिक्षकलाई डेढ लाखदेखि साढे ३ लाख रुपैयाँसम्म प्रोत्साहन सुविधा दिएपछि उनीहरूले उक्त निर्णय लिएका हुन् ।
इच्छुमती उद्यान र टुकुचा करिडोर तयार भएको छ । काठमाडौं महानगरपालिकाका प्रमुख विद्यासुन्दर शाक्यले झिगु इच्छुमती पार्क र प्रदेशसभा सदस्य केशव स्थापितले शंकरदेव क्याम्पसबाट प्रदर्शनी मार्ग जोड्ने टुकुचा करिडोरको शनिबार उद्घाटन गरेका छन् ।
