काष्ठमण्डप धुरीमा गजुर चढाउने तयारी, पुनर्निर्माण अन्तिम चरणमा [तस्बिरहरू]- उपत्यका - कान्तिपुर समाचार

काष्ठमण्डप धुरीमा गजुर चढाउने तयारी, पुनर्निर्माण अन्तिम चरणमा [तस्बिरहरू]

हिमेश, तस्बिर : बिजु महर्जन

काठमाडौँ — पुनर्निर्माणको अन्तिम चरणमा रहेको पुरातात्त्विक सम्पदा काष्ठमण्डपमा गजुर भित्र्याइएको छ । काष्ठमण्डपको धुरीमा राखिन उक्त गजुर धार्मिक विधिपूर्वक भित्र्याइएको हो । 

अब छाना छाउने कामसँगै पुनर्निर्माण सकिने काष्ठमण्डप पुनर्निर्माण समितिले जनाएको छ ।


सालको काठबाट बनेको गजुरका १३ चक्का छन् । यसलाई तामाको पाताले मोरेर धुरीमा स्थापना गरिनेछ । काष्ठमण्डपको मूल गजुर यही हो ।


समिति अध्यक्ष राजेश शाक्यले अबको दुई महिनामा सबै काम सक्ने लक्ष्य रहेको बताए । वाग्मती प्रदेशका सांसदसमेत रहेका शाक्यले भने, ‘अब चाँडै पुनर्निर्माण कार्य सकिनेछ ।’


काठमाडौं सहरको प्रतीक मानिने काष्ठमण्डपमा भित्र्याउनुअघि गजुरलाई नजिकैको सिंख्व: मू विहारमा तीन दिनसम्म तान्त्रिक विधिसहित पूजा गरिएको थियो ।


भित्र्याइएपछि पण्डित यज्ञमानपति वज्राचार्यको नेतृत्वमा रहेको समूहले वज्रयानी बौद्ध परम्पराअनुसार चर्या नृत्य गर्दै गजुर प्रतिस्थापनको पूजा गरेका थिए ।


सातौं शताब्दीमा निर्माण भएको मानिने काष्ठमण्डप ०७२ सालको भूकम्पमा पूरै भत्किएको थियो । पहिलेको संरचना पूरै एउटा रूखले बनेको मानिन्छ ।


काठमाडौं महानगरपालिकाको आर्थिक लगानीमा यसको पुनर्निर्माण ०७५ बाट सुरु भएको थियो । शाक्यका अनुसार अहिलेसम्म महानगरले ११ करोड ५० लाख रुपैयाँ प्रदान गरिसकेको छ ।



प्रकाशित : श्रावण १५, २०७८ १०:२४
प्रतिक्रिया
पठाउनुहोस्

समाधान भएन विद्यार्थीको माग

कान्तिपुर संवाददाता

इलाम — महेन्द्ररत्न बहुमुखी क्याम्पस इलामस्थित बीएस्सी हर्टिकल्चरका विद्यार्थीहरू आफ्नो माग सम्बोधन नभएको भन्दै चिन्तित भएका छन् । लोकसेवाको सुनिश्चितता र त्यसअघिको सहज पठनपाठनको माग गर्दै विद्यार्थीले चरणबद्ध आन्दोलन गरिरहेका छन् ।

इलाम सदरमुकामस्थित महेन्द्ररत्न बहुमुखी क्याम्पस । तस्बिर : क्याम्पसको वेबसाइटबाट

२०६९ सालदेखि क्याम्पसमा नयाँ विषयका रूपमा बीएस्सी हर्टिकल्चर पढाइ सुरु भए पनि बागवानीबाहेकका विषयमा लोकसेवामा सहभागी हुने अवसर पाएका छैनन् । जसका कारण पहिलो ब्याजदेखिकै विद्यार्थीले समस्या भोग्नुपरेको बताउँदै आएका छन् । मापदण्ड पुगेका कृषि प्रसार, बाली संरक्षण, माटो विज्ञान र बाली विकास) मा लोकसेवाको सुनिश्चितता हुनुपर्ने मागसहित विद्यार्थीहरू आन्दोलनमा उत्रिएका हुन् ।

इलाममा कोरोना संक्रमण दर निरन्तर उकालो लागेको अवस्थामा पनि आन्दोलनमा उत्रनुको विकल्प नरहेको विद्यार्थीको भनाइ छ । गएको असारमा पनि विद्यार्थीहरूले आन्दोलन गरेका थिए । क्याम्पस प्रशासनसहित गएको टोली राजधानीसम्म पुगेर कृषि मन्त्रालय, लोकसेवा आयोगमा मागको सुनुवाइ गरिदिन आग्रह गरेका थिए । विद्यार्थीको मागप्रति बेवास्था गर्दा पुनः आन्दोनल गर्न बाध्य भएको संघर्ष समितिका संयोजक किशोर आचार्यले बताए ।

साउनको पहिलो साता हुने पाँचौँ र सातौँ सेमेस्टरको परीक्षामा समेत सहभागी नहुने अडान राखेपछि स्थगित गरेर भदौ १ गते पुर्‍याइएको छ । यो परीक्षा अगावै समस्या समाधान हुनुपर्ने विद्यार्थीको माग छ । कृषि र पशु विज्ञान अध्ययन संस्थानअन्तर्गत त्रिभुवन विश्वविद्यालयका ४ वटा आंगिक क्याम्पससहित देशभरका ८ वटा क्याम्पसमा कृषि पढाइ हुन्छ । यीमध्ये हर्टिकल्चर पढाइ हुने इलाम एक मात्र क्याम्पस हो ।

त्रिभुवन विश्वविद्यालयअन्तर्गत कृषि तथा पशु विज्ञान अध्ययन संस्थाद्वारा मान्यताप्राप्त यो क्याम्पस स्वायत्ततामा गएसँगै हर्टिकल्चरको पढाइ सुरु भएको हो । यस क्याम्पसमा हालसम्म २ सय २८ जनाले बागवानीमा बीएस्सी गर्दै छन् भने १ सय २० जनाले अध्ययन सकेका छन् । १ सय ८ जना अहिले अध्ययनरत छन् ।गत सोमबारदेखि विद्यार्थीले क्याम्पस परिसरमा नै पुनः आन्दोलन थालेका थिए ।


प्रकाशित : श्रावण १५, २०७८ १०:१४
पूरा पढ्नुहोस्
प्रतिक्रिया
पठाउनुहोस्
×