ललितपुरको नगरसभा स्थगित
ललितपुर — राजनीतिक खिचातानीका कारण ललितपुर महानगरपालिकाले कानुनले तोकेको समय असार १० गतेभित्र बजेट पेस गर्न सकेन । एमाले र माओवादी केन्द्रबाट निर्वाचित जनप्रतिनिधिले बहिष्कार गरेपछि नगरसभा शनिबारका लागि सारिएको छ ।
स्थानीय सरकार सञ्चालन ऐन–२०७४ को दफा ७१ मा बजेट, नीति तथा कार्यक्रम कार्यपालिका बैठकबाट पारित गरेर मात्र नगर सभामा पेस गर्नुपर्ने कानुनी व्यवस्था छ । ललितपुर महानगरका प्रमुख चिरीबाबु महर्जनले बुधबार कार्यपालिकामा प्रस्तुत गरेको बजेट, नीति तथा कार्यक्रमको खाका अध्ययनकै क्रममा रहेका बेला बिहीबार नगरसभा बोलाएर पारित गर्न लागेको भन्दै एमाले र माओवादीबाट निर्वाचित जनप्रतिनिधिले विरोध जनाएका हुन् ।
महानगरका ३९ जना कार्यपालिका सदस्यमध्ये २६ जना र ९२ जना नगरसभा सदस्यमध्ये ६६ जना एमाले र मओवादी केन्द्रका छन् । उनीहरूले स्थानीय सरकार सञ्चालन ऐन–२०७४ को मर्म र भावनाविपरीत प्रमुख चिरीबाबु महर्जनले बजेट ल्याउन खोजेको आरोप लगाएका छन् ।
ललितपुर–३ का वडाध्यक्ष श्रीगोपाल महर्जनले बजेट, नीति तथा कार्यक्रम जनप्रतिनिधिबीच समन्वय र छलफल गरेर ल्याउनुपर्ने बताए । ‘हामी ताली बजाउन मात्र बसेका होइनौं,’ उनले भने ।
प्रकाशित : असार ११, २०७८ ०८:१८
