सीमित उपस्थितिमा रातो मत्स्येन्द्रनाथको जात्रा- उपत्यका - कान्तिपुर समाचार

सीमित उपस्थितिमा रातो मत्स्येन्द्रनाथको जात्रा

कान्तिपुर संवाददाता

ललितपुर — रातो मत्स्येन्द्रनाथको जात्रा न्यून जनसहभागितामा स्वास्थ्य मापदण्ड अपनाएर गर्ने बारेमा आइतबार सरोकारवालाबीच सहमति भएको छ ।

ललितपुरको पुल्चोकमा रातो मत्स्येन्द्रनाथको रथ बनाइँदै। तस्बिर : प्रशान्त/कान्तिपुर

ज्यापू समाजले डाकेको बैठकमा ललितपुर प्रशासन, महानगर, गुठी संस्थान, २१ वटा जातीय खलः पुच र जनप्रतिनिधिबीच जात्राको सञ्चारमाध्यमबाट प्रत्यक्ष प्रसारण गर्ने निर्णयसमेत भएको छ । जसको व्यवस्थापनको जिम्मा ललितपुर महानगरले पाएको छ ।

सडक मर्मतको जिम्मा सडक विभागलाई दिइएको ज्यापू समाजका अध्यक्ष चन्द्र महर्जनले बताए । ‘रातो मत्स्येन्द्रनाथ र मीननाथको जात्रामा सीमित व्यक्ति मात्र सहभागी गराइने र उनीहरूको ज्वरो मापन गरी मास्क, ग्लोब्स र सेनिटाइजर अनिवार्य गर्ने निर्णय भएको छ,’ उनले भने, ‘स्वयंसेवक र प्रहरी परिचालन गरी जात्राको क्रममा विभिन्न ३८ वटा नाका बन्दसमेत गरिनेछ ।’


प्रकाशित : वैशाख २७, २०७८ ०७:३१
प्रतिक्रिया
पठाउनुहोस्

म्यानचेस्टरको जित

एएफपी

लन्डन — म्यानचेस्टर युनाइटेडले इंग्लिस प्रिमियर लिग फुटबलमा आइतबार एस्टन भिल्लालाई ३–१ ले हराएको छ । यो जितपछि म्यानचेस्टर शीर्षस्थानको म्यानचेस्टर सिटीसँग १० अंकको दूरीमा रहन सफल भयो ।

एस्टन भिल्लाविरुद्ध गोल गरेपछि म्यानचेस्टर युनाइटेडका एडिसन काभानी । तस्बिर : एपी

त्यसमा म्यानचेस्टरका लागि ब्रुनो फर्नान्डेज, मेसन ग्रिनउड र वैकल्पिक खेलाडी एडिसन काभानीले निर्णायक गोल गरे । भिल्लाका लागि अन्तिम समयमा ओली वाटकिन्सले एक गोल फर्काएका थिए ।

अर्को खेलमा उल्भसले एक गोलले पछाडि रहेको स्थिति उल्टाएर १० खेलाडीमा समेटिएको ब्राइटनलाई २–१ ले हरायो । यसअघि लिग उपाधि जित्न ३ अंकमात्र चाहिने म्यानचेस्टर सिटी शनिबार चेल्सीको हातबाट घरमा २–१ ले पराजित भएको थियो । यो नतिजापछि सिटीले उपाधिका लागि अझै कुर्नुपर्ने भएको छ ।

रहिम स्टर्लिङको गोलले अग्रता लिए पनि सिटीले त्यसलाई जोगाउन सकेन । चेल्सीका लागि हाकिम जिएच र मार्कोस अलोन्सोले गोल गरेका थिए । सिटीका लागि सर्जियो अगुइरो पेनाल्टीमा पनि गोल गर्न चुके । यो नतिजापछि सिटी ८० अंकमै कायम रह्यो । चेल्सीको भने ६४ अंक भएको छ । टोली तेस्रो स्थानमा उक्लेको छ । शनिबारकै अर्को खेलमा लिभरपुलले साउथह्याम्पटनलाई २–० ले हराएको थियो ।


प्रकाशित : वैशाख २७, २०७८ ०७:३०
पूरा पढ्नुहोस्
प्रतिक्रिया
पठाउनुहोस्
×